தி.மு.க., ஆட்சியில் ஊழல் நிறைந்த துறையாக மின்துறை இருந்தது: ஜெயலலிதா குற்றச்சாட்டு!!

சென்னை: ""தி.மு.க., ஆட்சியில், ஊழல் நிறைந்த துறையாக மின்துறை இருந்தது. ஆட்சி அதிகாரத்தில் இருந்தவர்கள், கமிஷன் சம்பாதிப்பதற்காக, அரசு மின் உற்பத்தி நிலையங்களை முடக்கிவிட்டு, அதிக விலை கொடுத்து, தனியாரிடம் இருந்து மின்சாரம் வாங்கினர்,'' என, முதல்வர் ஜெயலலிதா குற்றம் சாட்டினார்.

நிருபர்களிடம் நேற்று அவர் கூறியதாவது: மின் கட்டணத்தை உயர்த்தும் திட்டம் எதுவும் அரசிடம் இல்லை. எந்த சூழலிலும், மக்கள் மீதுள்ள சுமையை அதிகரிக்க செய்ய மாட்டோம். மின்சார நிலைமையைப் பற்றி, சில கருத்துக்களை கூற வேண்டும். கடந்த அ.தி.மு.க., ஆட்சியில், மின் வெட்டு இல்லாத நிலை இருந்தது. 10 ஆயிரத்து, 111 மெகாவாட் மின் நிறுவுத்திறனை ஏற்படுத்தி, முழுவதுமாக உற்பத்தி செய்தோம். இருக்கும் உற்பத்தித் திறனை முழுவதுமாக செயல்படுத்தினோம். இதனால், மக்களுக்கு தேவையான மின்சாரத்தை வினியோகம் செய்ததுடன், உபரி மின்சாரத்தை, அண்டை மாநிலங்களுக்கு விற்பனை செய்து, வருமானம் ஈட்டினோம்.

இன்று, நிலைமை முற்றிலும் மாறிவிட்டது. முந்தைய ஆட்சியின் தவறான நிர்வாக செயல்பாடுகள் காரணமாக, மின் உற்பத்தி கடுமையாக வீழ்ச்சி அடைந்தது. இதற்கு, சில காரணங்கள் இருக்கின்றன. ஒன்று, மின்துறையில் அளவுக்கு அதிகமாக நடந்த ஊழல். இரண்டாவது, தரம் குறைந்த நிலக்கரியை இறக்குமதி செய்து, ஊழல் செய்தது. சரிவர, பராமரிப்பு இல்லாததும், மின் உற்பத்தி வீழ்ச்சிக்கு ஒரு காரணம். பராமரிப்பு செய்கிறோம் எனக் கூறி, பல அனல்மின் நிலையங்களை மூடினர். ஒரே நேரத்தில், அனைத்து அனல் மின் நிலையங்களையும் மூடியதால், மின் உற்பத்தி குறைந்தது. இதில், சரியான திட்டமிடுதல் இல்லாமல், முந்தைய அரசு செயல்பட்டது.

பல நாட்களில், பல மின் உற்பத்தி நிலையங்கள், உற்பத்தியே செய்யாமல் இருந்துள்ளன. அரசின் மின் உற்பத்தி நிலையங்களை சரியாக பராமரித்து, உற்பத்தியை மேற்கொள்ளாமல், ஆட்சி அதிகாரத்தில் இருந்தவர்கள், கமிஷன் சம்பாதிக்க வேண்டும் என்பதற்காகவே, அதிக விலை கொடுத்து, தனியாரிடம் இருந்து மின்சாரத்தை வாங்கினர். இதுபோன்ற சீர்கேடுகளால் தான், மின் வினியோகத்தில் பிரச்னை இருக்கிறது. இதை, படிப்படியாக சீர் செய்வோம். குறிப்பாக, மின் துறையில் ஊழலை முழுமையாக ஒழிப்போம். இருக்கும் மின் உற்பத்தித் திறனை முழுமையாக பயன்படுத்தி, மின்சாரத்தை உற்பத்தி செய்வதுடன், கூடுதலாகவும் மின் உற்பத்தியை பெருக்க, நடவடிக்கை எடுப்போம். தேர்தல் அறிக்கையில், 5,000 மெகாவாட் கூடுதலாக மின் உற்பத்தி செய்வோம் என, வாக்குறுதி கொடுத்துள்ளோம். அந்த இலக்கையும் தாண்டி, அதிகளவில் மின்சாரத்தை பெறுவதற்கு தேவையான நடவடிக்கைகளை எடுப்போம். இப்பணிகளை எல்லாம், ஒரே நேரத்தில் செய்ய முடியாது. படிப்படியாகத் தான் நிறைவேற்ற முடியும். இவ்வாறு முதல்வர் ஜெயலலிதா கூறினார்.

தினமலர்!