என் வீட்டிலிருந்து என் பயணம்

அப்துல்லாஹ் · அப்துல்லாஹ் Sat May 28, 2011 6:11 pm

சின்னதாய் வீடு கட்டி
சிறப்பாக வாழவேண்டும்

என்னையும் மதித்து வந்த
ஏந்திழை கையைப்பற்றி
உன்னத உறவு கூடி
உவப்புடன் வாழ வேண்டும்

அன்னையுடன் தந்தை கூடி
அன்பொழுகப் பலதும் பேசி
அண்டை வீட்டாரும் வாழ்த்த
அற்புதமாய் வாழ்தல் வேண்டும்

எந்திரம் போன்ற வாழ்வில்
இழந்திட்ட மகிழ்ச்சி எல்லாம்
மந்திரம் போட்டது போல்
மாறித் தான் போக வேண்டும்

சின்னதாய் தோட்டமிட்டு
சிறுமலர் பதியனிட்டு
சிரித்திடும் மலர்கள் கண்டு
சிலிர்த்திடும் கணங்கள் வேண்டும்

கொக்குடன் கிளிகள் காகம்
கூவிடும் குயில்கள் எல்லாம்
திக்குகள் எட்டும் விட்டு
தேடி என் வீட்டை சேர

வசந்தமும் வாடைக்காற்றும்
வந்து எனைத் தழுவும் நேரம்
அசதியுடன் துன்பம் சோகம்
ஆற்றிடச் செய்தல் வேண்டும்

வான் மழைத் தூறல் பட்டு
வாசனை கொண்ட மண்ணை
ஆசையோடு நான் நுகர்ந்து
அதில் கிடந்து புரள வேண்டும்

குன்று போல் நெல்மணிகள்
குவித்திடக் குதிரும் வேண்டும்
கன்றுடன் பசுவும் நிற்க்க
கட்டாயம் தொழுவம் வேண்டும்

செக்கரு வானம் காட்டும்
செம்பிழம்பு கதிரொளியும்
கருநீல வான்விரிப்பில்
குளிர்தரு நிலவும் வேண்டும்

நித்திரை சுகமாய் வேண்டும்
நீண்டதாய் இரவும் வேண்டும்
பத்திரமாய் வாழ்ந்து விட்டு
பாசம் சுவைத்துச் சாகவேண்டும்.

முற்றத்தில் எனைக்கிடத்தி
முடிச்சில்லா கபனுடுத்தி
மூடுங்கள் என்முகத்தை
முக்கியமாய் எனது வீட்டில்

கபன்: சடலத்தை போர்த்தப் பயன்படும் ஆடை