எனக்கு பிடித்த கவிதைகள் -கே, பாலா

First topic message reminder :

என்னைக் கவர்ந்த ஒரு கவிதை:

இடமற்று நிற்கும்
கர்ப்பிணியின் பார்வை தவிர்க்க
பேருந்துக்கு வெளியே
பார்ப்பதாய்
பாசாங்கு செய்யும் நீ
என்னிடம்
எதை எதிர்ப்பார்க்கிறாய்
காதலையா?

-சுகிர்தராணி

அனைத்து கவிதைகளும் அருமை. முதல் கவிதை மிக மிக அருமை.

முரளிராஜா wrote:கவிதை அருமை நண்பரே

கவிதைகள் அனைத்தும் ரசிக்கும்படி இருந்தன நண்பா பகிர்ந்தமைக்கு நன்றி

ஊழி தீ!- ராஜா.




போதைக்காக அல்லாமல்
பொழுதைக் கழிக்கவே புகைக்கிறான்
மதுவின் துளிரசம் அருந்தியதில்லை இதுவரைக்கும்
போதையில் உளறும் தந்தையாலே
குடியை வெறுத்தான் என்றபோதிலும்
புகைக்கும் அவரது தோரணையே
அவனது சிகரெட் ஈர்ப்புக்கும் காரணம்
என்ற செய்தி ரசிப்பிற்குரியதாய் இல்லை அவருக்கு
அன்றிலிருந்து அப்பா சிகரெட்டை ஒழித்தார்
என்ற ஒற்றை வரியோடு டைரியை மூடிவிட்டு
தொடர்ந்து புகைத்துக் கொண்டிருக்கிறான்
ஒவ்வொரு சிகரெட்டுக்குப் பின்னாலும்
இருக்கிறது ஒரு தீக்குச்சி
இருக்கட்டும்
அதுவல்ல இக்கவிதையின் கருப்பொருள்
அவன் புகைத்து அணைத்த முதல் சிகரெட்
இப்பொழுது கண்விழித்து
நகரத் துவங்கிவிட்டது அவன்வீட்டை நோக்கி
ஏனைய துண்டங்களும் உயிர்த்து
விரைகின்றன அதைத் தொடர்ந்தபடி
எல்லாம் சென்று சேர்ந்து
ஒன்று கூடி
சிதைமேடையென குவிகிற பொழுதில்
கிடத்தி எரிக்க
தயாராயிருக்கும் அவனது சடலம்.

உயிரோசை

அருமையான கவிதையை பகிர்ந்தமைக்கு நன்றி பாலா

நன்றி ,முரளி!

(குறிப்பு; இது இரண்டாம் பக்கம் . முதல் பக்கத்தில் எனக்கு பிடித்த 8 கவிதைகள் உள்ளது )

எனக்குத் தெரிந்தவர்கள்- மனுஷ்ய புத்திரன்

எனக்கு
ஒரு மருத்துவரைத் தெரியும்
ஒரு சித்த மருத்துவரைத் தெரியும்
ஒரு ஆயுர்வேத மருத்துவரைத் தெரியும்
ஒரு பல் மருத்துவரைத் தெரியும்
ஒரு மிருக வைத்தியரைத் தெரியும்
ஒரு பிணவறைக்காப்பாளனைத் தெரியும்

எனக்கு
ஒரு தாதாவைத் தெரியும்
ஒரு ரவுடியைத் தெரியும்
ஒரு கட்டப் பஞ்சாயத்து ஆளைத் தெரியும்
ஒரு தெருப்பொறுக்கியைத் தெரியும்
ஒரு மாமூல் வாங்குகிறவனைத் தெரியும்
ஒரு அடியாளைத் தெரியும்

எனக்கு
ஒரு கான்ஸ்டபிளைத் தெரியும்
ஒரு ட்ராஃபிக் போலீஸ்காரனைத் தெரியும்
ஒரு ஏட்டைத் தெரியும்
ஒரு இன்ஸ்பெக்டரைத் தெரியும்
ஒரு அஸிஸ்டண்ட் கமிஷனரைத் தெரியும்
ஒரு கமிஷனரைத் தெரியும்

எனக்கு
ஒரு மந்திரியின் உதவியாளரைத் தெரியும்
ஒரு மந்திரியின் வைப்பாட்டியைத் தெரியும்
ஒரு எம்.எல்.ஏ.வைத் தெரியும்
ஒரு மாவட்டச் செயலாளரைத் தெரியும்
ஒரு வட்டச்செயலாளரைத் தெரியும்
ஒரு கவுன்சிலரைத் தெரியும்

எனக்கு
ஒரு பத்திரிகை ஆசிரியரைத் தெரியும்
ஒரு செய்தி ஆசிரியரைத் தெரியும்
ஒரு உதவி ஆசிரியரைத் தெரியும்
ஒரு நிருபரைத் தெரியும்
ஒரு புகைப்படக்காரரைத் தெரியும்
ஒரு மக்கள் தொடர்பாளரைத் தெரியும்

எனக்கு
ஒரு வக்கீலைத் தெரியும்
ஒரு வக்கீல் குமாஸ்தாவைத் தெரியும்
ஒரு மாஜிஸ்ட்ரேட்டைத் தெரியும்
ஒரு நீதிமன்ற குமாஸ்தாவைத் தெரியும்
ஒரு நீதிபதியைத் தெரியும்
எனக்கு
ஒரு மளிகைக்கடைக்காரரைத் தெரியும்
ஒரு டீக்கடைக்காரரைத் தெரியும்
ஒரு காய்கறிக்கடைக்காரரைத் தெரியும்
ஒரு மாமிசக்கடைக்காரரைத் தெரியும்
ஒரு மீன்காரியைத் தெரியும்
ஒரு பூக்காரியைத் தெரியும்

எனக்கு
ஒரு மின்சாரவாரிய ஆளைத் தெரியும்
ஒரு தொலைபேசித்துறை ஆளைத்தெரியும்
ஒரு சாக்கடை சுத்தம் செய்பவரைத் தெரியும்
ஒரு கொத்தனாரைத் தெரியும்
ஒரு தச்சரைத் தெரியும்
ஒரு பிளம்பரைத் தெரியும்

எனக்கு
ஒரு பூசாரியைத் தெரியும்
ஒரு முல்லாவைத் தெரியும்
ஒரு பாதிரியைத் தெரியும்
ஒரு குருஜியைத் தெரியும்
ஒரு யோகா மாஸ்டரைத் தெரியும்
ஒரு கடவுளையும் தெரியும்

எனக்கு
ஒரு அரசியல் தரகரைத் தெரியும்
ஒரு விபச்சாரத் தரகரைத் தெரியும்
ஒரு கல்வித் தரகரைத் தெரியும்
ஒரு அதிகாரத் தரகரைத் தெரியும்
ஒரு இன்சூரன்ஸ் தரகரைத் தெரியும்
ஒரு போக்குவரத்து தரகரைத் தெரியும்

இந்த நகரத்தில்
ஒரு சிறிய மனிதனின்
ஒரு சிறிய பாதுகாப்பிற்கு
ஒரு சிறிய வாழ்க்கையின்
ஒரு சிறிய உத்தரவாதத்திற்கு
இன்னும்
யாரையெல்லாமோ
எனக்குத் தெரியும்