10ம் வகுப்பு மதிப்பெண் பட்டியல் ஜூன் 20ல் வினியோகம் : உடனடி தேர்வுகள் தேதியும் அறிவிப்பு

சென்னை : "பத்தாம் வகுப்பு பொதுத்தேர்வுகளை எழுதிய மாணவர்களுக்கு, அந்தந்த பள்ளிகளில், ஜூன் 20ம் தேதி, மதிப்பெண் பட்டியல்கள் வழங்கப்படும்' என, தேர்வுத்துறை அறிவித்துள்ளது.
இது குறித்து, தேர்வுத்துறை கூறியிருப்பதாவது: மறு கூட்டலுக்கான விண்ணப்பங்கள், வரும் 30ம் தேதியில் இருந்து, ஜூன் 3ம் தேதி வரை, அனைத்து மாவட்ட முதன்மைக் கல்வி அலுவலகங்கள், மாவட்ட கல்வி அலுவலகங்களில் வழங்கப்படும். தேர்வுத்துறை மண்டல துணை இயக்குனர் அலுவலகங்களிலும், விண்ணப்பங்கள் வழங்கப்படும்.
உடனடித் தேர்வு: ஒன்று முதல், மூன்று பாடங்கள் வரை தோல்வியடைந்த மாணவர்களுக்கு, ஜூன், ஜூலையில் உடனடித் தேர்வு நடத்தப்படும். பள்ளி மாணவர்கள் மற்றும் தனித்தேர்வர்கள் அனைவரும், மாவட்ட கல்வி அலுவலகங்கள், முதன்மைக் கல்வி அலுவலகங்களில், வரும் 30ம் தேதி முதல், ஜூன் 3ம் தேதி வரை, விண்ணப்பங்களை பெறலாம். பூர்த்தி செய்த விண்ணப்பங்களை, தேர்வுத்துறை மண்டல துணை இயக்குனர் அலுவலகங்களில் நேரடியாகவோ, பதிவஞ்சல் மூலமாகவோ ஒப்படைக்கலாம்.

மறு கூட்டல் கட்டணம்: எஸ்.எஸ்.எல்.சி., - ஓ.எஸ்.எல்.சி., - மொழிப்பாடங்களுக்கு, 305 ரூபாய், இதரப் பாடங்களுக்கு, 205, மெட்ரிகுலேஷன் - ஒவ்வொரு பாடத்திற்கும், 305 ரூபாய். ஆங்கிலோ இந்தியன் - மொழிப்பாடம் - 205, இதரப் பாடங்களுக்கு, 305 ரூபாய்.
உடனடித் தேர்வு கட்டணம்: எஸ்.எஸ்.எல்.சி., - ஓ.எஸ்.எல்.சி., - 125 ரூபாய், மெட்ரிக் - ஒரு பாடத்திற்கு, 135, இரு பாடங்கள், 235, மூன்று பாடங்களுக்கு, 335 ரூபாய்.
ஆங்கிலோ இந்தியன் - ஒரு பாடத்திற்கு, 85, இரு பாடங்களுக்கு, 135, மூன்று பாடங்களுக்கு, 185 ரூபாய்.
உடனடித் தேர்வு அட்டவணை:
எஸ்.எஸ்.எல்.சி., - 30.6.11 முதல், 8.7.11 வரை
ஓ.எஸ்.எல்.சி., - 29.6.11 முதல், 8.7.11 வரை
மெட்ரிக், ஆங்கிலோ இந்தியன் தேர்வுகள் - 29.6.11 முதல், 9.7.11 வரை. இவ்வாறு தேர்வுத்துறை அறிவித்துள்ளது.
தினமலர்

மெட்ரிக் தேர்வு : ஈரோடு மாணவி முதலிடம்

சேலம் : பத்தாம் வகுப்பு மெட்ரிக் தேர்வில் ஈரோடு மாவட்டம் பாரதிய வித்யா பவன் பள்ளி மாணவி ஹர்சினிஸ்ரீ மாநிலத்திலேயே முதலிடத்தை பிடித்துள்ளார். இவர் 500க்கு 493 மார்க்குகளுடன் முதலிடத்தைப் பெற்றுள்ளார்.

பத்தாம் வகுப்பு தேர்வு முடிவு : 85.3 சதவீதம் தேர்ச்சி

சென்னை : கடந்த மார்ச், ஏப்ரலில், 10ம் வகுப்பு பொதுத்தேர்வுகள் நடந்தன. மார்ச் 28 முதல், ஏப்ரல் 11 வரை நடந்த எஸ்.எஸ்.எல்.சி., தேர்வை, எட்டு லட்சத்து, 57 ஆயிரத்து, 956 மாணவர்கள் எழுதினர். மெட்ரிக் தேர்வை, ஒரு லட்சத்து, 45 ஆயிரத்து, 252 பேர் எழுதினர். ஓ.எஸ்.எல்.சி., தேர்வை, 1,561 பேரும் எழுதினர். நீண்ட நாள் எதிர்பார்ப்புக்குப் பின்னர் இன்று காலை 10 மணியளவில் 10ம் வகுப்பு தேர்வு முடிவுகள் வெளியாகின. 500க்கு 496 மதிப்பெண் பெற்று 5 பேர் மாநிலத்தில் முதல் இடத்தை பிடித்துள்ளனர். 12 பேர் இரண்டாவது இடத்தையும், 24 பேர் 3ம் இடத்தையும் பிடித்துள்ளனர். இந்த ஆண்டு பத்தாம் வகுப்பு தேர்ச்சி விகிதம் 85.3 சதவீதமாகும். மாணவிகள் தேர்ச்சி விகிதம் 88.10% ; மாணவர்கள் தேர்ச்சி விகிதம் 82.30 சதவீதமாகும். வழக்கம் போல் மாணவிகள் தேர்ச்சி விகிதம் அதிகம்.
தினமலர்

தமிழில் 100க்கு 100

சென்னை : எஸ்.எஸ்.எல்.சி., பொதுத்தேர்வில் தமிழ் மொழிப் பாடத்தில் தேனி மாவட்டம் போடிநாயக்கனூர் உத்தமபாளையம் இசட் கே எம் மேல்நிலைப்பள்ளி மாணவி பிரியங்கா 100க்கு 100 பெற்றுள்ளார். இவர் பெற்ற மொத்த மதிப்பெண் 491. தமிழ் மொழிப் பாடத்தில் 2ம் இடத்தை சென்னை கீழ்பாக்கம் பள்ளி மாணவர் விக்னேஷ்குமார் பெற்றுள்ளார். இவரது மொத்த மதிப்பெண் 477. 3வது இடத்தை 99 மார்க்குகள் பெற்று அருப்புக்கோட்டை ஜெயப்பிரியா பெற்றுள்ளார். இவரது மொத்த மதிப்பெண் 495.

எஸ்.எஸ்.எல்.சி. : கணிதத்தில் 12,532 பேர் சென்டம்

சென்னை : எஸ்.எஸ்.எல்.சி. தேர்வில் கணக்கு பாடத்தில் 12,532 மாணவ, மாணவிகள் 100-க்கு 100 மதிப்பெண் பெற்று சாதனை படைத்தனர். அறிவியல் பாடத்தில் 3,677 பேர் 100க்கு 100 மதிப்பெண் பெற்றனர். சமூக அறிவியல் பாடத்தில் 756 பேர் 100-க்கு 100 மதிப்பெண் பெற்றுள்ளனர்.
தினமலர்