''திரும்பிப் பாருங்கள் திருமா!''

தேர்தல் பரபரப்பு களைகட்டிய நேரம்... ஈழ ஆதரவுக் கட்சியான விடுதலைச் சிறுத்தைகள் நிச்சயம் காங்கிரஸ் கூட்டணியில் நீடிக்காது என்கிற நிலைமை. ஆனாலும், தி.மு.க-வுடனான நெருக்கத்தில் காங்கிரஸை சகித்துக்கொள்ள திருமாவளவன் தயாராகிவிட்டதாகத் தகவல் கசிய... நாம் அப்போது அவரிடம் ஒரு பேட்டி கேட்டோம்.
''ஈழ அழிவுக்கு காங்கிரஸ்தான் காரணம் எனச் சொல்லும் நீங்கள், அதே கூட்டணியில் நீடித்தால் மக்கள் ஏற்பார்களா?''
இந்தக் கேள்வியை நாம் கேட்டதுதான் தாமதம். திருமாவுக்கு சிலுப்பிக்கொண்டு வந்தது கோபம். ''நீங்கள் எனக்கு நண்பர். உங்களுக்கு யாரோ ஓர் அயோக்கியன் நண்பர் என்றால், அதற்காக உங்களின் நட்பை நான் உதற முடியுமா? நான் தி.மு.க-வுடன்தான் கூட்டணி வைத்திருக்கிறேன். தி.மு.க., காங்கிரஸோடு கூட்டணி வைத்து இருப்பதற்கு என்னை எப்படிக்குற்றம் சொல்ல முடியும்?'' என ஆவேசமாகச் சொன்னார் திருமாவளவன்.


அதே வேகத்தில் அவசரகதியில் தி.மு.க. தலைவர் கருணாநிதியை சந்தித்து கூட்டணியை உறுதியாக்கி 10 ஸீட்டுகள் பெற்றார். 'ஈழப் படுகொலைகளுக்குக் காரணமே காங்கிரஸ்தான்!’ என ஆவேசம் பாடியதை மறந்துவிட்டு, கடலூர் மாவட்டத்தில் காங்கிரஸ் வேட்பாளர்களை ஆதரித்துப் பிரசாரம் செய்தார்.

தமிழகம் வந்த காங்கிரஸ் தலைவி சோனியாவுடன் கலந்துகொண்டு போஸ் கொடுத்தார். 'ஈழ ஆதரவுத் தலைவர்’ என்கிற அடையாளத்தையே துடைத்து வீசியவராக, தி.மு.க. - காங்கிரஸ் கூட்டணிக்கு ஆதரவு திரட்டி அலைந்தார். சிறுத்தைகள் கட்சி போட்டியிட்ட 10 தொகுதிகளிலும் துடைத்து எறியப்பட்ட நிலையில், 'திருமா திரும்பிப் பார்க்க வேண்டும்!’ என்கிற ஆதங்கக் குரல்கள் அடங்க மறுத்துக் கிளம்புகின்றன.

''ஆரம்பம்தொட்டே ஈழ விவகாரத்தில் திருமாவின் நிலைப்பாடு என்ன என்பது பலருக்கும் புரியாத கேள்வி. 'நாடாளுமன்றத் தேர்தலின்போதே ஈழத்துக்காகத் தனி அணி கட்டுவோம் என அழைத்தேன். ஆனால், ஈழ ஆதரவுத் தலைவர்கள் அதற்கு முன்வராததால், தி.மு.க. கூட்டணியிலேயே நீடிக்கவேண்டிய கட்டாயம் உருவானது!’ என்ற விளக்கத்தை திருமா தொடர்ந்து சொல்லி வந்தார். ராஜபக்ஷேவை காமன் வெல்த் விழாவுக்கு சோனியா காந்தி அழைத்ததைக் கண்டித்த திருமா, சென்னைப் பொதுக் கூட்டத்தில் எந்த முகத்தோடு சோனியாவை எதிர்கொண்டார்?

அரசியல் பங்கேற்பு இல்லாத காலகட்டத்திலேயே திருமாவின் வார்த்தைகளுக்கு ராணுவம் கணக்காகக் கட்டுப்பட்டு இருந்தவர்கள் சிறுத்தைகள். ஆனால், இந்தத் தேர்தலில் திருமா எடுத்த நிலைப்பாட்டுக்கு கட்சிக்குள்ளேயே கடுமையான எதிர்ப்பு. இலங்கையின் போர்க் குற்றம் தொடர்பாக எவ்விதக் குரலையும் எழுப்பாமல், காங்கிரஸ் அரசு இறுக்கம் காட்டிய நிலையில்... 'போர்க் குற்ற நடவடிக்கை தேவை’ என வலியுறுத்தியபடியே பழைய கூட்டணியில் திருமாவால் எப்படித் தொடர முடிந்தது? இதற்கிடையில், ஸீட் ஒதுக்கீட்டிலும் சிக்கல்கள் வெடித்து, பல நிர்வாகிகள் சிறுத்தைகளை எதிர்த்தே போட்டி வேட்பாளர்களாகக் களம் கண்டார்கள்.

திருமாவின் வார்த்தைகளுக்குப் பதில் பேசாத நிர்வாகி கள் அவருக்கு எதிராகவே பாய்கிற அளவுக்கு மாறி னார்கள். ஒரு கட்சியின் தலைவராக, சுயமாகக் கட்சியின் எதிர்காலத்தை மனதில்கொண்டவராக கூட்டணி முடிவை எடுத்திருக்க வேண்டிய திருமா, தி.மு.க-வுக்கு நன்றி பாராட்டுவதிலேயே குறியாக இருந்தார். இப்போது, 'காங்கிரஸுடனான கூட்டுதான் தி.மு.க. கூட்டணியின் தோல்விக்குக் காரணம்!’ என திருமா சொல்கிறார்.

காங்கிரஸுடன் கூட்டு சேர்ந்தால் இந்தக் கதிதான் ஆகும் என அப்போதே தெரிந்து இருந்தும், தி.மு.க-வோடு இவரும் ஏன் அந்தப் படுகுழியில் விழுந்தார்? கட்சியின் அடிமட்ட நிர்வாகி​களின் மனக் கருத்துக்குக்கூட முக்கியத்துவம் கொடுக்கும் திருமாவுக்கு என்ன நேர்ந்தது?கட்சிக்குக் கிடைத்திருக்க வேண்டிய அங்கீகாரம் பறிபோனதும் இந்தப் பாசத்தால்தான் என்பதை திருமா இனியாவது புரிந்துகொள்ள வேண்டும்!'' என நீளுகிறது ஆதங்கப் புள்ளிகளின் வாதம்.

''தி.மு.க. கூட்டணியில் திருமாவுக்கு நிகழ்ந்த அவமானங்கள் அதிகம். சீனியர் அமைச்சர்கள் சிலரது விஷமத்தனமான கிண்டல்களும் பாராமுகமும் திருமாவை பல சந்தர்ப்பங்களில் சங்கடத்தில் ஆழ்த்தி இருக்கின்றன. ஒரு முக்கியமான காலகட்டத்தில் மு.க.ஸ்டாலினை சந்திக்க திருமா போனார்.
'வெளியே போங்கள்’ என விரட்டாத குறையாகத் திருப்பி அனுப்பப்பட்டார்.

இத்தனை அவமானங்களைத் தாங்கியபடி, தி.மு.க-வின் ஈழத் துரோகங்களுக்கு பூச்சுப் பூசுபவராக திருமா தன்னை வரித்துக்கொண்டது ஏன்?'' - 10 இடங்களில் தோற்றாலும் இன்னமும் திருமாவை நம்பிக்கை மிகுந்த தலைவராகப் பார்க்கும் தொண்டனின் கேள்வி இது!

தோல்விகளில் இருந்து என்ன பாடம் படிக்கப்​போகிறார் என்று பார்ப்போம்!

நன்றி விகடன்

இந்த இரட்டை வேஷம் மக்களுக்கு நன்றாக தெரிந்துதான் இவரை வீட்டுக்கு அனுப்பி இருக்கிறார்கள்.

அவருக்கு தற்போது களுத்து சுளுக்கு ஏற்பட்டு இருக்குது