கறுப்பு பண விவகாரம்: இந்தியரின் வங்கி கணக்கு பற்றிய தகவலை மொரீஷியஸ் அரசு வெளியிட்டது

கறுப்பு பண விவகாரத்தில், இந்தியரின் வங்கி கணக்கு பற்றிய தகவலை மொரீஷியஸ் அரசு தெரிவித்து இருப்பதாக வருமான வரி அதிகாரி ஒருவர் கூறினார்.

கறுப்பு பணம்

இந்தியாவில் செய்யப்படும் வெளிநாட்டு நேரடி முதலீடுகளில் பெரும் அளவு மொரீஷியஸ் நாட்டில் இருந்து வருகிறது. கடந்த 2002-ம் ஆண்டு ஏப்ரல் மாதத்தில் இருந்து இதுவரை வந்துள்ள வெளிநாட்டு முதலீடுகளில் 42 சதவீதம் மொரீஷியஸ் நாட்டில் இருந்து வந்தது ஆகும்.

வரி ஏய்ப்பு செய்யும் இந்தியர்கள் சிலர் தங்களிடம் இருக்கும் கறுப்பு பணத்தை வெள்ளை ஆக்குவதற்காகவும், வெளிநாட்டு நேரடி முதலீட்டில் உள்ள சலுகைகளை பெறுவதற்காகவும் வரிச்சலுகை கிடைக்கும் மொரீஷியஸ் போன்ற வெளிநாடுகளில் உள்ள வங்கிகளில் ரகசியமாக முதலீடு செய்து விட்டு, பின்னர் அந்த நாடுகளில் இருந்து வரும் பணம் போல் அவற்றை இந்தியாவில் முதலீடு செய்வதாக வருமான வரித்துறை மற்றும் பல்வேறு விசாரணை அமைப்புகள் நடத்திய விசாரணையில் தெரிய வந்தது.

மொரீஷியஸ்

இந்த விசாரணையின் ஒரு பகுதியாக, மொரீஷியஸ் வங்கிகளில் கணக்கு வைத்துள்ள இந்தியர்கள் பற்றிய விவரங்களை அந்த நாட்டு அரசிடம் வருமான வரித்துறை கேட்டு உள்ளது.

கறுப்பு பணத்தை வெளிக்கொண்டு வரும் வகையில், வெளிநாடுகளுடனான இரட்டை வரி விதிப்பு தவிர்ப்பு ஒப்பந்தம் தொடர்பான சட்டப் பிரிவில் திருத்தம் செய்யப்பட்டு இருப்பதாக நிதி மந்திரி பிரணாப்முகர்ஜி நேற்று முன்தினம் தெரிவித்தார். மேலும் இது தொடர்பான தகவல்கள் பரிமாற்றம் குறித்து மொரீஷியஸ் அரசுடன் இந்தியா பேச்சுவார்த்தை நடத்தி வருகிறது.

இந்தியரின் வங்கி கணக்கு

இந்த நிலையில், வரி ஏய்ப்பு தொடர்பாக வருமான வரித்துறை விசாரணை நடத்தி வரும் நபர் ஒருவர் மொரீஷியசில் வைத்து இருக்கும் வங்கி கணக்கு மற்றும் அவர் அங்கிருந்து இந்தியாவுக்கு பணம் அனுப்பியது பற்றிய தகவல்களை அந்த நாட்டு அரசு தெரிவித்து இருப்பதாக வருமான வரி அதிகாரி ஒருவர் நேற்று டெல்லியில் நிருபர்களிடம் தெரிவித்தார். வரி ஏய்ப்பு தொடர்பான விசாரணையில் இது ஒரு முக்கிய திருப்பம் என்று கூறிய அந்த அதிகாரி, இது பற்றிய மேலும் விவரங்களை தெரிவிக்க மறுத்து விட்டார்.

இந்திய அரசின் வற்புறுத்தலை தொடர்ந்து, மொரீஷியஸ் அரசிடம் இருந்து முதல் முறையாக இந்த தகவலை பெற்று இருப்பதாகவும் அவர் கூறினார்.

தினதந்தி