ஜூன் 15 க்கு பள்ளிகள் திறக்கப்படும் - ஜெ

சென்னை: சமச்சீர் கல்வித் திட்டம் மாணவர்களின் தரத்தை உயர்த்துவதாக இல்லை என்று தெரிவித்துள்ள தமிழக அமைச்சரவை இதுகுறித்து மறு பரிசீலனை செய்ய முடிவெடுத்துள்ளது. இதன் காரணமாக ஜூன் 1ம் தேதி திறப்பதாக இருந்த பள்ளிக்கூடங்களை ஜூன் 15ம் தேதி திறக்க தீர்மானிக்கப்பட்டுள்ளது.

அமைச்சரவையின் முடிவைத் தொடர்ந்து தமிழகம் முழுவதும் ஜூன் 15ம் தேதியன்றுதான் பள்ளிகள் திறக்கப்படும்.

முதல்வர் ஜெயலலிதா தலைமையில் தமிழக அமைச்சரவைக் கூட்டம் இன்று நடந்தது. இன்றைய கூட்டத்தில் பல்வேறு முக்கியப் பிரச்சினைகள் குறித்து விரிவாக ஆலோசிக்கப்பட்டது.

தலைமைச் செயலாளர், பல்துறைச் செயலாளர்கள் இதில் கலந்து கொண்டனர். இதில் சமச்சீர் கல்வித் திட்டம் குறித்து முக்கியமாக விவாதிக்கப்பட்டது. அப்போது தற்போதைய சமச்சீர் கல்வித் திட்டம் மாணவர்களின் தரத்தை உயர்த்தும் வகையில் இல்லை என்பதால் இதை மறு பரிசீலனை செய்ய தீர்மானிக்கப்பட்டது.

இதுதொடர்பாக அரசு வெளியிட்டுள்ள அறிக்கையில்,

வாக்காளர்களுக்கு நன்றி

- அமைச்சரவைக் கூட்டத்தின் முதல் தீர்மானமாக ஜெயலலிதா மீது நம்பிக்கை வைத்து அவரது தலைமையில் ஆட்சி அமைய வாக்களித்த மக்களுக்கு நன்றி தெரிவித்து தீர்மானம் நிறைவேற்றப்பட்டது.

மே 6ல் மேட்டூர் அணை திறப்பு

- காவிரி டெல்டா பாசன விவசாயிகள் குறுவைப் பாசனத்தை உரிய காலத்தில் மேற்கொள்ள மேட்டூர் அணையில் இருந்து ஜூன் 6-ம் தேதி தண்ணீர் திறந்துவிட அமைச்சரவைக் கூட்டத்தில் முடிவெடுக்கப்பட்டது.

இந்தியா குடியரசு ஆன பின்னர் ஜூன் 12-ம் தேதிக்கு முன்னதாக தண்ணீர் திறந்துவிடப்படுவது இதுதான் முதன் முறை என்பது குறிப்பிடத்தக்கது.

சமச்சீர் கல்வித் திட்டம் நிறுத்தம்

தற்போதைய சமச்சீர் கல்வி பாடத்திட்டம் ஒட்டுமொத்த கல்வித் தரத்தை உயர்த்த வழிவகை செய்யாது என்பதால் அதை உயர்த்துவது குறித்து ஆராய வல்லுநர் குழு ஒன்றை அமைக்க அமைச்சரவை முடிவெடுத்துள்ளது.

ஜூன் 15ல் பள்ளிகள் திறப்பு

எனவே பழைய பாடபுத்தகங்களையே பின்பற்றலாம் என்றும், பாட புத்தகங்களை அச்சிட சிறிது கால அவகாசம் தேவைப்படும் என்பதால் பள்ளிகளை ஜூன் 15-ம் தேதி திறக்கலாம் என்றும் அமைச்சரவை முடிவெடுத்தது என்று அதில் தெரிவிக்கப்பட்டுள்ளது.

சமச்சீர் கல்வித் திட்டத்தை இந்த ஆண்டு முதல் அனைத்து வகுப்புகளுக்கும் அறிமுகப்படுத்த கடந்த திமுக அரசு உத்தரவிட்டிருந்தது. இதற்காக பாடப் புத்தகங்களும் அச்சடிக்கப்பட்டிருந்தன. அதில் கருணாநிதி குறித்த பாடங்களையும் சேர்த்திருந்தனர். இந்த நிலையில் ஆட்சி மாறி விட்டதால் தற்போது அவற்றை மாணவர்களுக்கு வழங்குவதில் சிக்கல் ஏற்பட்டது. இந்த நிலையில் இந்த ஆண்டு சமச்சீர் கல்வித் திட்டத்தை நிறுத்தி வைக்க அதிமுக அரசு தீர்மானித்துள்ளது.
நன்றி தட்ஸ் தமிழ்

உங்க அரசியல் போதைக்கு மாணவர்களை ஊறுகாய் ஆக்காதிங்க.

இது பெரிய அநியாயம்...
அமைச்சரவை பதவி ஏற்றவுடன் சி வி சண்முகம் சமச்சீர் கல்வி பின்பற்றப்படும் என்றார்.
அப்படியே செய்யலாம். ஏதாவது நீக்கப்பட வேண்டிய பகுதிகள் இருந்தால் நீக்கிவிட்டு பள்ளிகள் குறிப்பிட்ட காலத்திற்க்கு திறக்கப்பட வேண்டும்.
பழைய புத்தகங்களை பயன்படுத்தலாம் என்கிறபோது முந்தைய ஆண்டு படித்த மாணவர்களின் புத்தகங்களை பயன் படுத்தலாமே . அதைவிட்டு விட்டு பள்ளி நாட்களின் எண்ணிக்கையை குறைப்பது மோசமான முன் உதாரணம்.
இனி வரும் காலங்களில் மழை வெள்ளம் இயற்க்கை சீற்றங்களுக்கு, தலைவர்கள் அகால மரணம் போன்றவற்றின் பொது எல்லாம் விடுமுறை விடுவார்கள். இதனால் மாணவர்களின் கல்வித்தரம் குறைந்து சமச்சீர் கல்வியோ சாதாரண நடைமுறைக் கல்வியோ அனைத்திலும் பின் தங்கிவிடுவதர்க்கே இந்த அரசு தன் அதிகாரத்தை முதன் முதலில் கல்வித்துறையில் பயன்படுத்தியுள்ளது
முந்தைய அதே எதேச்சாதிகாரப் போக்கு !!!!

உண்மை அண்ணா!
மாணவர்களின் கல்வித் தரம் மிகவும் குறைந்துவிட்டது. இதற்கு அடிக்கடி விடுமுறைவிடுவதும் ஒரு காரணம். மழை தூறினால் கூட விடுமுறையா என மாணவர்கள் தொலைக்காட்சியை பார்க்கும் நிலைதான் தற்போது உள்ளது. இது எங்கே போய் முடியும் எனத் தெரியவில்லை.

என்றும் கல்விக்கும் பிள்ளைகளின் பாடங்களுக்கும் பள்ளிக்கும் முதலிடம் தரவேண்டும்....

தி.மு.க. ஆட்சியில் கட்டிய பாலங்களில் அடிப்படை வசதிகள் இல்லை என்று இடித்தாலும் இடிப்பார்கள். சூன் 15 பள்ளி திறப்பால் பெரிய பாதிப்பு ஏதும் வந்துவிடாது. (சனிக்கிழமைகளில் பள்ளி வைத்து அதை சரி செய்துவிடுவார்கள்)

இதைப் போன்ற குழப்பங்களால் தான் பத்தாம் வகுப்பு பொதுத் தேர்வு முடிவுகள் எப்போதென்று இன்னும் இறுதி செய்யப்படவில்லை. இதுவரை 3 முறை மாற்றிவிட்டார்கள்.