போலீஸ் நடவடிக்கை குறித்து காலைதான் தெரியும்-சைட்

**சிவா** · **சிவா** Tue 11 Nov 2008 - 15:27

மலேசியாஇன்று

நேற்றிரவு மெழுகுவத்தி ஏந்திய பேரணியைக் கலைப்பதற்கு சிலாங்கூர் போலீஸ் எடுத்த நடவடிக்கை குறித்து இன்று காலைவரை தமக்கு எதுவும் தெரியாது என்று உள்துறை அமைச்சர் சைட்அமிட் அல்பார் கூறினார்.

அது தொடர்பாக தமக்கு எந்தவோர் அறிக்கையும் கிடைக்கவில்லை என்று இன்று நாடாளுமன்ற வளாகத்தில் செய்தியாளர்களிடம் அவர் தெரிவித்தார்.

போலீசார் சட்டப்படிதான் நடந்து கொண்டிருப்பார்கள் என்பதில் தமக்கு நம்பிக்கையிருப்பதாகக் கூறிய அவர் மேற்கொண்டு கருத்து தெரிவிக்க மறுத்துவிட்டார்.

“போலீசுக்கு என்ன செய்வதென்று தெரியும். சட்டத்தையும் ஒழுங்கையும் காக்க வேண்டியது அவர்களின் பொறுப்பு. அவ்விவகாரம் தொடர்பாக இதுவரை எந்த அறிக்கையையும் நான் பெறவில்லை”, என்றாரவர்.

“நீங்கள் சட்டத்தையும் ஒழுங்கையும் மீறி நடந்து கொண்டால் போலீஸ் நடவடிக்கை எடுப்பார்கள். அதில் உங்களுக்கு அதிருப்தி இருந்தால் என்னிடம் சொல்லுங்கள். நான் விசாரிப்பேன்.”

நேற்றிரவு போலீசார் அளவுமீறி முரட்டுத்தனத்துடன் நடந்து கொண்டதாகக் கூறப்படுகிறது. ஜசெக மக்கள் பிரதிநிதிகளான டோனி புவா, லாவ் வெங் சான், ரோனி லியு ஆகியோர் உள்பட 23 பேர் நேற்று போலீசால் கைது செய்யப்பட்டனர். அவர்களில் மலேசியாகினி வீடியோ பதிவாளர் சுக்ரி முகமட்டும் ஒருவர்.

**சிவா** · **சிவா** Tue 11 Nov 2008 - 15:28

கோலாலம்பூரில் கடந்த ஆண்டு நிகழ்ந்த மாபெரும் எதிர்ப்பு ஆர்ப்பாட்டத்தின் முதலாம் ஆண்டுநிறைவை ஒட்டி தூய்மையான தேர்தலுக்காக போராடும் கூட்டு அமைப்பான பெர்சே, பெட்டாலிங் ஜெயாவில் அந்த மெழுகுவத்தி ஏந்திய பேரணிக்கு ஏற்பாடு செய்திருந்தது.

கைது செய்யப்பட்டவர்களில் ஒருவரைத் தவிர மற்ற அனைவரும் இன்று காலை ஏழு மணிக்கு விடுவிக்கப்பட்டனர். நவம்பர் 24 ஆம் தேதி அவர்கள் திரும்பவும் பெட்டாலிங் ஜெயா போலீஸ் நிலையம் செல்ல வேண்டும்.

இவ்விவகாரம் குறித்து இன்று இன்று நாடாளுமன்ற வளாகத்தில் செய்தியாளர்களிடம் பேசிய ஜசெக தலைமைச் செயலாளரும் பினாங்கு முதலமைச்சருமான லிம் குவான் எங், போலீஸ் நடவடிக்கை தமக்கு ஏமாற்றம் அளிப்பதாகக் குறிப்பிட்டார்.

“போலீஸ் கைது நடவடிக்கையில் ஈடுபடும்போது வன்முறையில் இறங்க வேண்டிய அவசியமில்லை”, என்றவர் கூறினார்.

“தேர்ந்தெடுக்கப்பட்ட மக்கள் பிரதிநிதிகளே தாக்கப்படுகிறார்கள் என்றால் இதே நிலைக்கு சாதாரண மக்கள் இதைவிட எளிதாக ஆளாவார்கள்.”

அது பற்றி முழு விசாரணை நடத்தப்படும் என்று உள்துறை அமைச்சர் சொல்லியிருக்கிறார். சொல்வதுபோல் அவர் செய்துகாட்ட வேண்டும் என்று லிம் மேலும் கூறினார்.

போலீஸ் நடவடிக்கை குறித்து காலைதான் தெரியும்-சைட்

போலீஸ் நடவடிக்கை குறித்து காலைதான் தெரியும்-சைட்

Re: போலீஸ் நடவடிக்கை குறித்து காலைதான் தெரியும்-சைட்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக