இந்திய மேலாண்மை நிறுவனம் திருச்சியில்

திருச்சி இந்திய மேலாண்மை நிறுவனம் (ஐ.ஐ.எம்.) ஜூன் 15-ம் தேதி அதிகாரப்பூர்வமாகத் தொடங்கப்படவுள்ளது.
தேசிய அளவில் திருச்சி உள்பட 4 இடங்களில் 2010-11 ஆம் கல்வியாண்டில் ஐ.ஐ.எம். தொடங்க மத்திய அரசு அனுமதி அளித்தது. ஆனால், சில காரணங்களால் 2010-11 ஆம் கல்வியாண்டில் திருச்சியில் இந்த நிறுவனம் அமையவில்லை.
இதனிடையே, திருச்சி பாரதிதாசன் பல்கலைக்கழகம் - அண்ணா தொழில்நுட்பப் பல்கலைக்கழக எல்லைப் பகுதியில் 192.35 ஏக்கர் நிலம் ஒதுக்கீடு செய்யப்பட்டு, அதில், கட்டடங்கள் கட்டுவதற்கான அடிக்கல் நாட்டு விழா சில மாதங்களுக்கு முன்பு நடைபெற்றது.
இதில், கட்டடங்கள் கட்டப்படும் வரை திருச்சி தேசிய தொழில்நுட்ப நிறுவனத்தில் (என்.ஐ.டி.) உள்ள பழைய நூலகக் கட்டட வளாகத்தில் இந்திய மேலாண்மை நிறுவனத்துக்கான தாற்காலிக வகுப்புகள், மாணவர்கள் விடுதிகள் அமைக்கப்பட்டு வருகின்றன.
இந்நிலையில், இந்த நிறுவனம் ஜூன் 15-ம் தேதி அதிகாரப்பூர்வமாகத் தொடங்கப்படவுள்ளது. இதை முன்னிட்டு, 3 வகுப்பறைகள், ஆசிரியர்களுக்கான அறைகள், அலுவலகம் போன்றவை மத்திய பொதுப் பணித் துறை மூலம் முழு வீச்சில் மேற்கொள்ளப்பட்டு வருகின்றன.
இதுகுறித்து நிறுவன இயக்குநர் பிரபுல்லா அக்னிஹோத்ரி கூறியது:
"திருச்சி இந்திய மேலாண்மை நிறுவனம் ஜூன் 15-ம் தேதி தொடங்கப்படவுள்ளது. தொடர்ந்து, அதே நாளில் வகுப்புகளும் ஆரம்பிக்கப்படவுள்ளன. இதை முன்னிட்டு, அதற்கான முன்னேற்பாடுகள் அனைத்தும் மேற்கொள்ளப்பட்டு வருகின்றன.
முதல் அணியில் 60 மாணவ, மாணவிகளைச் சேர்க்க வாரியம் அனுமதி அளித்துள்ளது. மாணவர் சேர்க்கை ஏற்கெனவே தொடங்கி, இதுவரை 28 பேர் சேர்க்கப்பட்டுள்ளனர். தொடர்ந்து, மாணவர் சேர்க்கை மேற்கொள்ளப்பட்டு வருகிறது.
இந்தப் படிப்புக்கான கல்விக் கட்டணமாக ரூ. 10 லட்சம் என வாரியம் நிர்ணயித்துள்ளது. இந்தக் கட்டணத்தில் புத்தகங்களும் வழங்கப்படும். அண்மையில் தொடங்கப்பட்ட மற்ற இந்திய மேலாண்மை நிறுவனங்களுடன் ஒப்பிடும்போது இந்தக் கட்டணம் குறைவுதான்.
மேலும், சிறந்த தேர்ச்சி பெற்ற ஆசிரியர்கள், பேராசிரியர்கள் 20 பேர் வரை நியமனம் செய்ய வாரியம் அனுமதித்துள்ளது.
இப்போது, முதல் கட்டமாக 14 பேருக்கு நியமனக் கடிதம் அனுப்பப்பட்டது. இவர்களில் 12 பேர் பணியில் சேர ஒப்புதல் அளித்துள்ளனர்.
நிதி நிர்வாகவியல், சந்தையியல், மனித வள மேலாண்மையியல், மேலாண்மைத் தகவல் சேவையியல், இயக்கவியல் ஆய்வு போன்ற பல்வேறு துறைகளில் ஆசிரியர்கள், பேராசிரியர்கள் நியமிக்கப்படவுள்ளனர்.
மேலும், இரண்டாம் கட்டமாக 4 பேரைத் தேர்வு செய்யும் பணி தொடங்கிவிட்டது. கெüரவப் பேராசிரியர்களும் தேர்வு செய்யப்படவுள்ளனர்.
வெளிநாடு, உள்நாட்டில் உள்ள ஐ.ஐ.டி., ஐ.ஐ.எம். போன்ற பெரிய கல்வி நிறுவனங்களில் முனைவர் பட்டம் பெற்றவர்கள், ஆய்வுத் திறனில் அனுபவம் உள்ளவர்கள், கற்பித்தல் திறன் உள்ளவர்கள், அணுகுமுறை போன்றவற்றின் அடிப்படையில் இந்த நியமனம் மேற்கொள்ளப்படுகிறது. தவிர, ஆசிரியரல்லாத பணியாளர்கள் தேர்வும் தொடங்கிவிட்டது.
2012-13 ஆம் கல்வியாண்டில் முனைவர் பட்டப் படிப்பு தொடங்க முடிவு செய்யப்பட்டுள்ளது. பொதுத் துறை, தனியார் நிறுவனங்களில் மேலாளர் பொறுப்பில் உள்ளவர்களுக்கான குறுகிய காலப் படிப்புகளும் நேரடியாகவும், இணையவழி மூலமும் தொடங்கும் திட்டம் உள்ளது.
மாணவ, மாணவிகளுக்கு முதலாமாண்டு இறுதியில் 8 வார கால கோடைகாலப் பயிற்சி அளிக்கத் திட்டமிடப்பட்டுள்ளது.
இதற்கு நம் நாட்டில் உள்ள பன்னாட்டு, தனியார் நிறுவனங்கள் ஒத்துழைப்பு தர ஒப்புதல் அளித்துள்ளன.
மேலும், ஆசிரியர், மாணவர்கள் பரிமாற்றத் திட்டத்துக்கு ஐரோப்பா, அமெரிக்கா, சிங்கப்பூர், ஆஸ்திரேலியா ஆகிய நாடுகளில் உள்ள வணிக மேலாண்மைக் கல்வி நிறுவனங்களிடமிருந்து ஒப்புதல் கிடைத்துள்ளது' என்றார் பிரபுல்லா அக்னிஹோத்ரி.

-நன்றி தினமணி