திருநாகேஸ்வரத்தில் ராகு பெயர்ச்சி விழா

கும்பகோணம் : திருநாகேஸ்வரம் நாகநாத சுவாமி கோவிலில் நேற்று வெகு சிறப்பாக நடந்த ராகு பெயர்ச்சி விழாவில், ஆயிரக்கணக்கான பக்தர்கள் பங்கேற்றனர். கும்பகோணம் அருகே உள்ள திருநாகேஸ்வரத்தில், நவக்கிரக தலங்களில் ராகு பரிகார தலமாக நாகநாத சுவாமி கோவில் விளங்குகிறது. தென்மேற்கு மூலையில் ராகு பகவான் தனி சன்னிதியில், நாககன்னி, நாகவள்ளி என, இரண்டு துணைவியருடன் மங்கள ராகுவாக அருள் பாலிக்கிறார். தோஷ நிவர்த்திக்காக, இத்தலத்தில் உள்ள ராகு பகவானுக்கு, ராகு காலத்தில் பக்தர்கள் பாலபிஷேகம் செய்து வழிபடுவது வழக்கம். பாலபிஷேகத்தின் போது பால் நீல நிறமாக மாறுவது இன்று வரை நடக்கும் அதிசயம். இத்தகைய சிறப்புமிக்க தலத்தில், ராகு பகவான் தனுசு ராசியிலிருந்து விருச்சிக ராசிக்கு பெயர்ச்சியடையும் விழாவை முன்னிட்டு, கடந்த 14ம் தேதி, மாலை 6 மணிக்கு, முதல் கால யாக சாலை பூஜை துவங்கியது. நேற்று காலை 9:48 மணிக்கு சிறப்பு பாலபிஷேகமும், தொடர்ந்து தீபாராதனையும் நடந்தது. பின் தங்கக் கவச அலங்காரத்தில் ராகு பகவான் காட்சியளித்தார்.

சுவாமி தரிசனத்துக்காக, காலை 6 மணி முதல், திரளான பக்தர்கள் நீண்ட வரிசையில் காத்திருந்தனர். ராகு பகவானுக்கு ராகு கால பாலபிஷேகம் நடந்தது. அதன் பின், இரண்டாவதாக ராகு பெயர்ச்சி அபிஷேகம் துவங்கியது. இரவு 8 மணிக்கு, ராகு பகவான் வெள்ளி சேஷ வாகனத்தில் வீதியுலா வந்தார். ராகு பெயர்ச்சியை முன்னிட்டு பரிகார ராசிக்காரர்களுக்காக, நாளை (18ம் தேதி) முதல் 20ம் தேதி வரை இரண்டாம் கட்ட லட்சார்ச்சனை நடக்கிறது. நாகநாத சுவாமி கோவிலில் கேது பெயர்ச்சி விழா : நாகை மாவட்டம், தரங்கம்பாடி தாலுகா, கீழப்பெரும்பள்ளத்தில் நாகநாத சுவாமி கோவில் உள்ளது. கேது பரிஹார தலமான இக்கோவிலில் அமைந்துள்ள தனி சன்னிதியில் நவக்கிரகங்களில் முதன்மை வாய்ந்தவரான கேது பகவான் எழுந்தருளி, பக்தர்களுக்கு அருள் பாலித்து வருகிறார். ஞானத்திற்கு அதிபதியான கேது பகவான், ஒன்றரை ஆண்டுக்கு ஒரு முறை ஒரு ராசியிலிருந்து மற்றொரு ராசிக்கு பின்னோக்கி பிரவேசிக்கிறார். அதன்படி நேற்று காலை 9:56 மணிக்கு கேது பகவான், மிதுன ராசியிலிருந்து ரிஷப ராசிக்கு பிரவேசித்தார். இதையொட்டி, நேற்று முன்தினம் கேது பகவானுக்கு சிறப்பு பரிஹார ஹோமங்கள் நடத்தப்பட்டன. நேற்று காலை கேது பகவானுக்கு அபிஷேகமும், 9:56 மணிக்கு மகா தீபாராதனையும் செய்து வைக்கப்பட்டது. கேது பெயர்ச்சியையடுத்து தோஷ பரிஹாரம் செய்ய வேண்டிய மேஷம், ரிஷபம், மிதுனம், சிம்மம், கன்னி, துலாம், விருச்சிகம், மகரம், கும்பம் ஆகிய ராசிகளையுடைய ஏராளமான பக்தர்கள், கேது பகவானை தரிசித்து பரிஹார ஹோமங்கள் செய்தனர்.