ரஜினி உங்களைச் சந்திப்பார்… அமைதியாக இருங்கள்!’ – லதா ரஜினி

ஆண்டவன் அருளாள் ரஜினி நலமுடன் உள்ளார். வதந்திகளை நம்ப வேண்டாம். பரப்பவும் வேண்டாம். ரஜினி உங்களை விரைவில் சந்திப்பார். ரசிகர்களிடமும் பேசுவார்,” என்று லதா ரஜினிகாந்த் தெரிவித்தார்.

கடந்த மூன்று தினங்களாக ரஜினி உடல்நிலை குறித்த வதந்திகள் ரசிகர்களை நிலைகொள்ளாமல் செய்துள்ளன. திருச்சி அருகே ஒரு ரசிகர் தற்கொலைக்கு முயன்று காப்பாற்றப்பட்டுள்ளார். வெளிநாடுகளில் உள்ள ரசிகர்கள் பலர் மிகுந்த வேதனையுடன் தங்களுக்குத் தெரிந்தவர்களிடமெல்லாம் போன் செய்து தலைவர் உடல்நிலை குறித்து பதட்டத்துடன் விசாரித்து வருகின்றனர்.

எனவே ரஜினி உடல்நிலை குறித்து ஒரு முழுமையான ரிப்போர்ட்டை தயார் செய்துள்ளோம். லதா ரஜினி அவர்களிடம் இதுபற்றி பேசியபோது, இப்போதைக்கு தனது வேண்டுகோளை மட்டும் ரசிகர்களுக்குச் சொல்லுங்கள், பரிசோதனை முடிவுகள் முழுமையாக வந்தபிறகு ரஜினி உடல்நிலை பற்றி நானே சொல்கிறேன் என்றார்.

அவரது வேண்டுகோளை ஏற்று, ரசிகர்களுக்கு லதா அவர்கள் விடுத்துள்ள செய்தியை இங்கே தருகிறோம்:

ரஜினி மிக நலமாக உள்ளார். நல்ல ஓய்வில் இருக்கிறார். அவருக்காக பிரார்த்திக்கும் ரசிகர்களின் அன்பு உள்ளங்களுக்கு நன்றி. வதந்திகளை தயவு செய்து நம்ப வேண்டாம். அதை பரப்ப துணை போகவேண்டாம்.

விரைவில் ரஜினி உங்களிடம் பேசுவார். பத்திரிகையாளர்களைச் சந்திப்பார். அதுவரை பதட்டம் கொள்ளாதீர்கள். ரஜினியின் உடல்நிலை குறித்து நாங்கள் கவனம் செலுத்தும் வேளையில், வெளியில் பரவும் இதுபோன்ற வதந்திகள் எங்களை மிகவும் வருத்ததுக்குள்ளாக்கியுள்ளது.

இதுபோன்ற வதந்திகள் ரஜினிக்கும் மிக்க வேதனையைத் தந்துள்ளது. ரசிகர்கள் யாரும் தவறான முடிவுக்குப் போகாதீர்கள். ரஜினி உங்களைச் சந்திப்பார்!”

ரசிகர்களே-

தலைவரைப் பற்றிய வதந்திகள் வெளியில் பரவ சென்னையில் ரசிகர்களில் சிலரே துணை போயிருப்பதை இப்போது அறிய முடிகிறது. அந்த ‘நல்லவர்’களை அடையாளம் கண்டுகொண்டு ஒதுக்குங்கள்.

அமைதியாக இருங்கள். ரஜினி என்ற நல்ல மனிதருக்கு சோதனைகளின் முடிவில் பெரும் சாதனைகளே பரிசாகக் கிடைத்துள்ளன. இப்போதும் அதே நம்பிக்கை கொள்ளுங்கள். ஆண்டவன் வைத்த இந்த சோதனையிலிருந்தும் ரஜினி சொக்கத் தங்கமாய் மீண்டு வருவார்!

-என்வழி