ரஜினிக்கு என்ன பிரச்சினை?

உண்மைகளைவிட வதந்திகளுக்கு வேகம் அதிகம். அவை ஜெட் வேகத்தில் பரவும். நடிகர் ரஜினிகாந்த்தின் உடல் நிலை குறித்த வதந்திகளும் அப்படித்தான் படுவேகமாக பரவுகின்றன. ‘ராணா’ படப்பிடிப்புத் தொடக்கவிழா நடந்த சிறிது நேரத்தில், உடல்நலக் குறைவால் சென்னை இசபெல் மருத்துவமனையில் அனுமதிக்கப்பட்டார் ரஜினி. மறுநாள் டிஸ்சார்ஜ் ஆனார். அவருக்கு செரிமானக் கோளாறு என்று மருத்துவ வட்டாரம் தெரிவித்தது. அதன்பிறகு, மீண்டும் ஒரு முறை மருத்துவமனையில் அனுமதிக்கப்பட்டவர், அண்மையில் ராமச்சந்திரா மருத்துவமனையில் உடல் பரிசோதனை செய்துவிட்டு ஓய்வில் இருக்கிறார். அதற்குள்ளாக, அவருடைய உடல்நிலை குறித்து ஏராளமான வதந்திகள் பரவ ஆரம்பித்துவிட்டன.

ரஜினி உடல்நலனில் என்ன பிரச்சினை என மருத்துவமனை வட்டாரங்களில் விசாரித்தோம். தமிழகத்தின் மிகப் பெரிய பிரபலத்தின் உடல்நலன் குறித்து நேரடியாகப் பேசத் தயங்கிய டாக்டர்கள், ரஜினிக்கு என்ன பிரச்சினை என்பது குறித்து தங்களின் பெயர் குறிப்பிடாமல் விளக்கினார்கள்.

“சிகரெட் அதிகம் பிடித்ததால், ரஜினிக்கு நுரையீரலில் பாதிப்பு ஏற்பட்டுள்ளது.இதை, chronic obstructive pulmonary disease (COPD) என்று சொல்வோம். இதனால் ரத்தத்தை பம்ப் செய்வதில் சிக்கல் ஏற்பட்டுள்ளது. நுரையீரலில் இருந்து இருதயத்தின் இடது பக்கத்திற்கு ரத்தம் செல்வதற்கான நேரம் அதிகரிக்கிறது. அதனால், ரத்த ஓட்டம் தடை படுகிறது. ரத்தம் என்பது பிளாஸ்மாவும் செல்களும் சேர்ந்த கலவையாகும். இந்த செல்கள்தான் ரத்தச் சிவப்பணுக்கள்(RBC), ரத்த வெள்ளையணுக்க்ள் (WBC) என இருவகைப்படுகின்றன. ரஜினிக்கு ரத்தத்தில் உள்ள செல்கள் அப்படியே தங்கியுள்ளன. பிளாஸ்மா மட்டும் வெளியேறுகிறது. அதனால், ரத்தக் குழாய்கள் மூலம் அது தண்ணீராக வெளியே வருகிறது.

இதனைக் கட்டுப்படுத்துவதற்குரிய சிகிச்சைகள் அவருக்கு அளிக்கப்பட்டு, ஓய்வெடுக்கும்படி சீனியர் டாக்டர்கள் சொல்லியிருக்கிறார்கள்” என்று விளக்கியவர்கள் மேலும், “ரஜினிக்கு renal failure எனப்படும் சிறுநீரகக் கோளாறும் ஏற்பட்டுள்ளது. இது மூன்றாவது நிலை. அதாவது, டயாலிசிஸ் செய்ய வேண்டிய நெருக்கடி ஏற்படுகிற வாய்ப்பு இப்போது இருக்காது. இரண்டாவது மற்றும் முதலாவது நிலைக்குத் தள்ளப்பட்டால்தான் டயாலிசிஸ் மற்றும் சிறுநீரக மாற்று அறுவை சிகிச்சை தேவைப்படும். தற்போதுள்ள நிலையிலேயே அவரது சிறுநீரகப் பிரச்சினையை சரிப்படுத்திவிடமுடியும். அதற்கான சிகிச்சைகளும் அளிக்கப்பட்டு வருகின்றன” என்றனர்.

ரஜினிக்கு நுரையீரலில் பாதிப்பு ஏற்படக் காரணம், புகைப் பழக்கம்தான். புகையினால் நுரையீரல் கடும் பாதிப்பை சந்திக்கும்போது மூச்சுக்காற்று சென்று வரக்கூடிய பாதை குறுகலாகிவிடும். அதனால் மூச்சுத் திணறல் ஏற்படும். நெஞ்சில் எப்போதும் ஒரு இறுக்கமான தன்மை இருக்கும். தொடர்ச்சியானஇருமல், சளி, களைப்படைதல் இவையெல்லாம் நீடிக்கும்.

சிகரெட்டை ஸ்டைலாகப் பிடிப்பதன் மூலம் ரசிகர்களைக் கவர்ந்து சூப்பர் ஸ்டார் ஆனவர் ரஜினி. அந்த சிகரெட்தான் இன்று அவரது உடல்நிலையைப் பாதித்துள்ளது. ரஜினியின் பாணியை அவரது ரசிகர்கள் பலரும் பின்பற்றுவது வழக்கம். ஆனால், படங்களில் சிகரெட் பிடிக்கும் காட்சிகள் வேண்டாம் என முன்னாள் மத்திய அமைச்சர் அன்புமணிராமதாஸ் கேட்டுக்கொண்டதையடுத்து, தன்னுடைய படத்திலிருந்து அத்தகைய காட்சிகளை நீக்கியவர் ரஜினி. அவரது ரசிகர்களும், புகைப்பிடிக்கும் விஷயத்தில் ரஜினியைப் பின்பற்றாமல், அவர் படங்களில் தவிர்த்ததைப்போல, நிஜவாழ்க்கையில் புகைப்பழக்கத்தைத் தவிர்ப்பது நல்லது. ரஜினி விரைவில் முழுமையாகக் குணமடைந்து தனது படப் பணிகளில் ஈடுபட விழைகிறோம்.



கவின் இல்லம்

ரஜினிக்கு இப்படி ஒரு வியாதியா!