Habitual Abortion

சில பெண்களுக்கு திரும்பத் திரும்ப கரு உருவாகி அபார்ஷனாகி விடும். கருப்பையில் கரு நிரந்தரமாகத் தங்காது. இதை 'Habitual Abortion’ என்பார்கள். கருப்பையின் அமைப்பு சரியில்லாமல் போனாலும் சரி, சரியான வளர்ச்சி இல்லாமல் போனாலும் சரி, முதல் 3 மாதங்களிலேயே கரு வெளியேறி விடும்.

கருப்பையின் வாய் திறந்திருந்தால்கூட இது போல் நிகழலாம். இதற்கென்று ‘ஷிரோத்கர் அறுவை சிகிச்சை’ என்ற பெயரில் கருப்பையின் வாய் பாகத்தில் சிறப்புத் தையல் போடப்படுகிறது.

கருப்பையில் இருக்கும் கரு, சரியாக உருவாகாமல் இருந்தால் இயற்கையே ஒரு வழியாக அதை அழித்து விடுகிறது. பெரும்பாலும் இது முதல் 3 மாதங்களில் நிகழ்ந்து விடுவதால், உடம்புக்கும் பெரிய பாதிப்புகள் ஏற்படுவதில்லை. முன்னோக்கி வளைந்திருக்க வேண்டிய கருப்பை, பின்னோக்கி வளைந்திருத்தல், சிலருக்கு பேரிக்காய் வடிவில் நடுவே குவிந்திருக்கும் பகுதியில் ஒரு சுவர் வளர்ந்து, இரட்டை கருப்பையாக இருத்தல்... என அபார்ஷனுக்கு வேறு காரணங்களும் உண்டு. இன்னும் சிலருக்கு தட்டம்மை, மலேரியா உள்ளிட்ட வைரஸ் தொற்று இருந்தாலும் அபார்ஷனாகலாம்.

புகைபிடிக்கும் ஆண்களின் உயிரணுக்கள், நாட்கள் செல்லச் செல்ல கொஞ்சம் கொஞ்சமாக செயலிழந்து போகும். ஒரு கட்டத்தில் மலட்டுத் தன்மையிலும் முடியும். அப்படியே கருத்தரித்தாலும், அது ஆரோக்கியமாக இல்லாமல் கலையலாம். புகையிலைப் பழக்கமும் இப்படித்தான்.

மற்றபடி மன உளைச்சலுக்கும், அபார்ஷனுக்கும் தொடர்பில்லை. இந்தக் காலப் பெண்களுக்கு வேலைச் சுமை அதிகம். அலைச்சலும் அதிகம். பொதுவாகவே இந்த கருச்சிதைவானது முதல் 3 மாதங்களுக்குள்தான் அதிகமாக நடக்கிறது என்பதால் அந்த 3 மாதங்களும் அலுங்காமல், குலுங்காமல் ஓய்வெடுப்பதும், பயணத்தைத் தவிர்ப்பதும் பாதுகாப்பானது.