வாக்கு எண்ணிக்கையில் எந்தத் தவறும் நடக்காது:பிரவீன்

வாக்கு எண்ணிக்கையின் போது எந்தவித தவறும் நடைபெறாத அளவுக்கு உரிய ஏற்பாடுகள் செய்யப்பட்டு உள்ளது என்று தமிழக தலைமைத் தேர்தல் அதிகாரி பிரவீன் குமார் தெரிவித்தார்.




வாக்கு எண்ணிக்கையின் போது முறைகேடுகள் நடைபெறாமல் இருக்க நேர்மையான அதிகாரிகளை நியமிக்க வேண்டும் என்று தேர்தல் ஆணையத்தை அதிமுக பொது செயலாளர் ஜெயலலிதா கேட்டுக் கொண்டுள்ளார்.

இதுதொடர்பாக டெல்லியில் உள்ள தலைமை தேர்தல் ஆணையர் குரேஷிக்கு அவர் மனு ஒன்றை அனுப்பியுள்ளார். இந்த மனுவின் நகலை அதிமுக நிர்வாகிகள் ஓ.பன்னீர்செல்வம், கே.ஏ.செங்கோட்டையன், பால் மனோஜ் பாண்டியன் ஆகியோர் தமிழக தேர்தல் அதிகாரி பிரவீன் குமாரிடம் இன்று நேரில் அளித்தனர்.

அந்த மனுவில் '2009 ஆம் ஆண்டு நாடாளுமன்ற தேர்தலின் போது, சிவகங்கை நாடாளுமன்ற தொகுதியில் அதிமுக வேட்பாளர் ராஜ கண்ணப்பனுக்கு பதிவான வாக்குகளை காங்கிரஸ் வேட்பாளர் ப.சிதம்பரத்திற்கு பதிவானதாக மாற்றி, அவர் வெற்றி பெற்றதாக அதிகாரிகள் அறிவிக்கப்பட்டு இருந்தது. அத்தகைய முறைகேடுகள் இந்த முறை நடைபெறாமல் தடுப்பதற்கு நேர்மையான அதிகாரிகளை நியமித்து உரிய முறையில் தேர்தல் ஆணையம் கண்காணிக்க வேண்டும்.

வாக்கு எண்ணிக்கையின் போது எந்த இயந்திரத்தில் எவ்வளவு வாக்குகள் பதிவாகி உள்ளது என்று பதிவு செய்யும் டேட்டா எண்ட்ரி படிவம் 20ஐ தலைமை ஏஜெண்ட்டுகள் பார்வையிட அனுமதிக்க வேண்டும்,' என்று கூறப்பட்டு இருந்தது.

இது தொடர்பாக தமிழக தலைமைத் தேர்தல் அதிகாரி பிரவீன் குமாரிடம் நிருபர்கள் கேட்டதற்கு,
"வாக்கு எண்ணிக்கையின் போது எந்தவித தவறும் நடைபெறாத அளவிற்கு உரிய ஏற்பாடுகள் செய்யப்பட்டு உள்ளது. வாக்கு எண்ணும் மையத்தில் உள்ள தேர்தல் அதிகாரிக்கு அருகிலேயே டேட்டா எண்ட்ரி நடைபெறும். அதனை வேட்பாளரே பார்க்கலாம். அதில் எந்த முறைகேடும் நடக்காது. அலுவலர்கள் பேப்பர் மூலம் டேட்டா எண்ட்ரி செய்யும் அதே நேரத்தில் கம்யூட்டர் மூலமாகவும் இந்த டேட்டா எண்ட்ரி நடைபெறும்.

இந்த வாக்கு எண்ணிக்கையை மேற்பார்வையிடும் பார்வையாளர் மற்றும் தேர்தல் அதிகாரி ஆகியோர் சரிபார்த்த பின்னர் தான் இறுதி முடிவு அறிவிக்கப்படும். அதனுடைய ஒரு பிரதி வேட்பாளர் வசமும் ஒப்படைக்கப்படும். எனவே இதில் எந்தவித தவறும் நடக்க வாய்ப்பில்லை.

சென்னை கோட்டையில் உள்ள பத்திரிக்கையாளர் அறையில் தனி டி.வி. மூலம் ஒவ்வொரு சுற்று வாக்கு எண்ணிக்கை முடிவும் வெளியிடப்படும். வாக்கு எண்ணிக்கை நடைபெறும் 91 மையங்களும் பதற்றமானதால் பலத்த பாதுகாப்பு போடப்பட்டு உள்ளது.

எனவே பெரிய அளவில் வன்முறை நடக்க வாய்ப்பில்லை. தேர்தல் காலத்தில் 6,818 வழக்குகள் பதிவு செய்யப்பட்டு, 5,935 வழக்குகளில் குற்றப்பத்திரிக்கை வழங்கப்பட்டு உள்ளது. 1,378 வழக்குகள் தீர்ப்பு வழங்கப்பட்டு உள்ளது. ஒரு அதிகாரி என்ற முறையில் எனக்கு வழங்கப்பட்டுள்ள பணியை நான் செய்து இருக்கிறேன்.

மீடியா, அரசியல் கட்சி பிரதிநிதிகள் வழங்கிய ஆலோசனைப்படி இந்த பணியை செய்துள்ளேன். இது எனக்கு திருப்தியாக உள்ளது," என்றார் பிரவீன் குமார்.

திமுக வெற்றிக்கு பாதிப்பு ஏற்படும் வகையில் நீங்கள் ஒருதலைபட்சமாக செயல்பட்டதாக முதல்வர் கருணாநிதி கூறியிருப்பது குறித்து கேட்டதற்கு, "தேர்தல் ஆணையம் சட்ட திட்டம், விதிமுறைகளுக்கு உட்பட்டு தான் நான் செயல்பட்டுள்ளேன். அரசியல் கட்சிகளை பார்த்து பாகுபாட்டுடன் நான் செயல்படவில்லை," என்றார் அவர்.



விகடன்