இந்திய எல்லைப் பகுதிக்குள் சீன படைகள்...ஊடுருவலா? இல்லவே இல்லை என அமைச்சகம் மறுப்பு

(காஷ்மீர்):"இந்தியப் பகுதிக்குள் சீனப் படைகள் ஊடுருவியதாக வெளியான செய்திகளில் உண்மையில்லை; அப்படி எதுவும் நடக்கவில்லை' என, சீனா மறுத்துள்ளது.இந்தியா - சீனா இடையேயான சர்வதேச எல்லையாக, ஆங்கிலேயர்களால் அங்கீகரிக் கப்பட்ட பகுதி மவுன்ட் ஜியா. கடல் மட்டத்தில் இருந்து 22 ஆயிரத்து 420 அடி உயரத்தில் உள்ளது. "பனி இளவரசி' என, ராணுவத்தால் அழைக்கப்படும் இப் பகுதி, காஷ்மீரின் லடாக், இமாச்சல பிரதேசத்தின் ஸ்பிதி மற்றும் திபெத் என, மூன்று பகுதிகளும் சந்திக்கும் இடத்தில் அமைந்துள்ளது.சமீபத்தில் இப்பகுதியில் ரோந்து சென்ற ராணுவத்தினர், பல்வேறு பாறைகளிலும் சிகப்பு வண்ணம் பூசப்பட்டு, "சீனா, சீனா' என, எழுதப்பட்டிருப்பதைக் கண்டனர்.

இதனால், இந்தியப் பகுதிக்குள் 1.5 கி.மீ., தூரத்திற்கு சீனப் படைகள் ஊடுருவியுள்ளதாக மீடியாக்கள் செய்தி வெளியிட்டன. ஆனாலும், ராணுவத் தரப்பில் இது தொடர்பாக எந்த பதிலும் இல்லை. உயர் அதிகாரிகளும் இதுபற்றி பேச மறுத்தனர்.


சுதந்திரத்திற்குப்பின், முதல் முறையாக, இந்தியப் பகுதிக்குள் சீன ராணுவம் ஊடுருவி, 1.5 கி.மீ., முதல் 1.7 கி.மீ., வரை சென்று, பாறைகளில் சிகப்பு வண்ணம் பூசியது மற்றும் "சீனா, சீனா' என, எழுதியது மிகவும் முக்கியத்துவம் வாய்ந்த பிரச்னை என, ராணுவத்தினர் கூறினர். லடாக் மற்றும் ஸ்பிதி பகுதியில் வசிக்கும் மக்களிடம் விசாரணை நடத்தி, சீன ராணுவம் ஊடுருவியதை உறுதி செய்தனர்.மறுப்பு: இந்நிலையில், இந்தியப் பகுதிக்குள் சீன ராணுவம் ஊடுருவியதாக வெளியான தகவல்களை சீன வெளியுறவு அமைச்சகம் மறுத்துள்ளது.


இதுதொடர்பாக வெளியிடப்பட்ட அறிக்கையில், "காஷ்மீரில் லடாக் பிராந்தியத்தில், சர்வதேச எல்லையை தாண்டி, இந்தியப் பகுதிக்குள் சீனப் படைகள் ஊடுருவியுள்ளதாகவும், அங்குள்ள பாறைகளில் சிகப்பு வண்ணம் பூசியதாகவும் செய்திகள் வெளியாகியுள்ளன. இந்தச் செய்திகள் ஆதாரமற்றவை. இந்தியப் பகுதிக்குள் படையெடுப்பு எதுவும் நடக்கவில்லை. இரு நாடுகளுக்கும் இடையேயான பிரச்னைகளுக்கு பேச்சுவார்த்தை மூலமாக, நட்பு ரீதியாகவே தீர்வு காண்போம்.இவ்வாறு அறிக்கையில் கூறப்பட்டுள்ளது.


இந்தியா - சீனா இடையேயான கட்டுப்பாட்டு எல்லைக் கோடு எது என்பது தொடர்பாக, கடந்த 2002ம் ஆண்டில் பேச்சுவார்த்தை நடத்தப்பட்டது. அப்போது இரு தரப்பினரும் வரைபடங்களை பரிமாறிக் கொண்டனர். இருந்தும், எல்லைப் பிரச்னை தொடர்பாக சர்ச்சை தொடர்ந்து கொண்டிருக்கிறது. இந்த நிலையில்தான், சீனப் படைகள் ஊடுருவிய தகவல் வெளியாகியுள்ளது.


எல்லை அமைதியாக உள்ளது' புதுடில்லி: "சீனப் படையெடுப்பு விவகாரம் சுமுகமான முறையில் தீர்க்கப்படும்' என, வெளியுறவு அமைச்சர் கிருஷ்ணா கூறியுள்ளார்.அவர் மேலும் கூறியதாவது:சீனா உடனான எல்லைப் பகுதி மிக அமைதியாக உள்ளது. சீனப் படையெடுப்பு அல்லது ஆக்கிரமிப்பு நிகழ்ந்திருந்தால், அது உரிய வகையில் தீர்க்கப்படும். சீனப் படையினரின் தற்போதைய அத்துமீறல், கவலை அளிக்கும் விஷயம் அல்ல. எல்லைப் பிரச்னை தொடர்பாக நியமிக்கப்பட்ட இரு நாட்டு அதிகாரிகளும் இந்தப் பிரச்னையையும் பேசித் தீர்ப்பர். இரு தரப்பும் ஏற்றுக் கொள்ளப்பட்ட எல்லைப் பகுதி இல்லாததால், இதுபோன்ற அத்துமீறல்கள் நடக்கின்றன.இவ்வாறு கிருஷ்ணா கூறினார்.