கோவில் விழாவில் நூதனம்

பழமையும், பாரம்பரியமும் கொண்ட தமிழகத்தில் என்னதான் விஞ்ஞான வளர்ச்சி ஏற்பட்டாலும் இன்னமும் ஆண்டாண்டு காலமாக கடைப்பிடிக்கப்பட்டு வரும் கோவில் விழாக்கள், கலாச்சாரங்கள் மாறாமல் தொன்று தொட்டு வருகிறது.


பொதுவாகவே திருமண வயது அடைந்தவுடன் தங்களது மகன், மகளுக்கு திருமணம் செய்து வைக்க வேண்டும் என்று பெற்றோர் பாடாய்படுவார்கள். அதுவும் அவர்களுக்கு பிடித்த வரன்கள் கிடைக்க வேண்டும் என்றும் எதிர்பார்ப்பது உண்டு. இதற்காக தெரிந்தவர்கள், புரோக்கர்கள் என பெண், மாப்பிள்ளை தேடி பெற்றோர் நடையாய், நடந்து வருகிறார்கள்.

ஆனால் சேலம் மாவட்டத்தில் கோவில் விழாவில் ஒரு நூதன முறையாக விரும்பிய பெண்களை வாலிபர்கள் தேர்வு செய்யும் ஒரு வினோத நிகழ்ச்சி நடந்தது. இதில் ஏராளமான இளைஞர்கள் கலந்து கொண்டு விரும்பிய பெண்களை தேர்வு செய்தனர். இந்த ருசிகர சம்பவம் பற்றிய விவரம் வருமாறு:-

சேலம் மாவட்டம் பனமரத்துப்பட்டி அருகே உள்ளது பெரமனூர் கிராமம். இந்த கிராமத்தில் புகழ்பெற்ற மகாசக்தி மாரியம்மன் கோவில் உள்ளது. ஆண்டு தோறும் சித்திரை மாதத்தில் இங்கு திருவிழா வெகுவிமரிசையாக நடத்தப்படும். அதே போல் இந்தாண்டும் கடந்த மாதம் 28-ந் தேதி பூச்சாட்டுதலுடன் கோவில் திருவிழா தொடங்கியது. இதையொட்டி தினந்தோறும் காலை, மாலை நேரத்தில் அம்மனுக்கு சிறப்பு அபிஷேகம், அலங்காரம் செய்யப்பட்டு வந்தது.

விழாவின் 15-ம் நாளில் பெண் பார்க்கும் நிகழ்ச்சி நடந்தது. இதற்காக ஊரில் உள்ள திருமணம் ஆகாத ஏராளமான இளைஞர்கள் புத்தாடை அணிந்து கொண்டு காலை நேரத்திலேயே கோவில் அருகே திரண்டு நின்றனர். பெரமனூர், களரம்பட்டி, நத்தமேடு, பள்ளிதெருப்பட்டி, உலகரை மேடு, கோம்பைக்காடு ஆகிய கிராமங்களில் இருந்து 100-க்கும் மேற்பட்ட திருமண வயதை அடைந்த பெண்கள் புத்தாடை அணிந்து, அலங்காரம் செய்து கொண்டு மாவிளக்கு தாம்பூலம் எடுத்துக் கொண்டு வந்தனர்.

அனைத்து பெண்களின் தாம்பூல தட்டிலும் ஒரே வகையான ரசத்தாளி ரக வாழைப்பழம் வைக்கப்பட்டு இருந்தது. பின்னர் ஊர்வலம் தொடங்கியதும் பெண்கள் மாவிளக்கு எடுத்துக் கொண்டு வந்தனர். அப்போது இளைஞர்கள் சிலர் தங்களுக்கு விருப்பப்பட்ட பெண்களை தேர்வு செய்தனர். இளைஞர்கள் தங்களுக்கு பிடித்த பெண்ணின் தட்டில் இருந்த ஒரு வாழைப்பழத்தை எடுத்தனர்.

இதே போல் ஏராளமான இளைஞர்கள் பெண் பார்க்கும் நிகழ்ச்சியில் தங்களுக்கு பிடித்த பெண்களை தேர்வு செய்தனர். எந்த பெண்ணின் தட்டில் இருந்து வாழைப்பழம் எடுத்தோம் என்று இளைஞர்கள் தங்களது பெற்றோரிடம் தெரிவிப்பார்கள். பின்னர் பெற்றோர் பெண் வீட்டுக்கு சென்று முறைப்படி பெண் கேட்பார்கள். இதில் பிடித்து போனால் திருமணம் செய்து வைப்பார்கள்.

இன்று நடந்த விழாவில் பல இளைஞர்கள் பெண்களை போட்டி போட்டு தேர்வு செய்தனர். இவ்வாறு வாழைப்பழம் எடுத்து திருமணம் செய்து கொண்டால் அந்த தம்பதியினர் அடுத்த கோவில் பண்டிகையில் பொங்கல் வைத்து நேர்த்திக்கடன் செலுத்துவார்கள். கடந்த ஆண்டு நடந்த விழாவில் திருமணம் செய்த தம்பதிகள் இந்தாண்டு பொங்கல் வைத்து வழிப்பட்டனர். இந்த நூதன நிகழ்ச்சியை ஏராளமான பேர் பார்வையிட்டனர். -நன்றி மாலை மலர்

சுயம்வரம்......