2,000 டன் நிவாரண பொருட்கள் இலங்கைக்கு நாளை பயணம்

சென்னை : இலங்கையில் பாதிக்கப்பட்ட தமிழர்களுக்கு வழங்குவதற்காக 2,000 டன் எடையுள்ள 80 ஆயிரம் பார்சல்கள் சென்னை துறைமுகத்தில் இருந்து நாளை அனுப்பி வைக்கப்படுகின்றன. பொருட்களை இந்திய தூதருக்கு தமிழக அரசு அனுப்பி வைக்கிறது. இலங்கையில் பாதிக்கப்பட்டுள்ள தமிழர்களுக்கு உதவ, முதல்வர் கருணாநிதி விடுத்த வேண்டுகோளை ஏற்று, 10 கோடி ரூபாய் அளவுக்கு நிதியுதவியும், நிவாரணப் பொருட்களும் வந்து சேர்ந்துள்ளன.


அரிசி, பருப்பு, டீத்தூள், சர்க்கரை போன்ற உணவுப் பொருட்களுடன், குளியல் சோப்பு, துவைப்பதற்கான சோப்பு, பற்பசை, வேஷ்டி, கைலி, சேலை, நைட்டி, துண்டுகள் மற்றும் படுக்கை விரிப்புகள் ஆகியவை அடங்கிய நிவாரணப் பொருட்களை 80 ஆயிரம் குடும்பங்களுக்கு வழங்க தனித்தனி பார்சல்கள் தயார் செய்யப்பட்டுள்ளன. முதல் கட்டமாக தமிழக அரசு அளிக்கும் 2,000 டன் எடையுள்ள இந்த நிவாரணப் பொருட்கள் சென்னையில் இருந்து கப்பல் மூலம் கொழும்பு துறைமுகத்துக்கு கொண்டு செல்லப்பட்டு, அங்குள்ள இந்திய தூதரிடம் ஒப்படைக்கப்படும். அவரிடமிருந்து, செஞ்சிலுவைச் சங்கத்தின் பன்னாட்டுக் குழுமத்திடம் ஒப்படைக்கப்பட்டு, பாதிக்கப்பட்டுள்ள 80 ஆயிரம் தமிழ் குடும்பங்களுக்கு பகிர்ந்து அளிக்கப்படும். இந்தப் பொருட்கள் இலங்கைக்கு கொண்டு செல்லப்படுவதையும், தமிழர்களுக்கு இவற்றை வழங்க இந்தியத் தூதரகம் மேற்கொள்ளும் ஏற்பாடுகளையும் கண்காணிக்கும் பொறுப்பை மத்திய வெளியுறவுத் துறை ஏற்றுள்ளது.


இலங்கைக்கு அனுப்பவுள்ள நிவாரணப் பொருட்களை முதல்வர் கருணாநிதி நேற்று பார்வையிட்டார். அப்போது, செஞ்சிலுவைச் சங்க பன்னாட்டு குழுமத்தின் கொழும்புக்கான ஒருங்கிணைப்பாளர் தாமஸ் ரீஸ், மத்திய வெளியுறவுத் துறை அதிகாரி ஐ.எம்.பாண்டே, தலைமைச் செயலர் ஸ்ரீபதி மற்றும் உயரதிகாரிகள் உடனிருந்தனர். நிவாரணப் பொருட்களை வழங்குவது குறித்து செஞ்சிலுவைச் சங்க அதிகாரி தாமஸ் ரீஸ், நிருபர்களிடம் கூறும் போது, ""உணவு, உடை மற்றும் மருந்துப் பொருட்கள் மத்திய அரசு மூலம் இலங்கைக்கு அனுப்பி வைக்கப்படுகிறது. இந்த பொருட்கள் தரமானதாகவும், மக்களுக்கு உபயோகமானதாகவும் உள்ளன. இவற்றை வன்னி மற்றும் இதர பாதிக்கப்பட்ட பகுதிகளில் வினியோகிப்போம். இவை கொழும்பு செல்ல இரண்டு வாரங்களாகும். இப்பொருட்களை, இலங்கை அரசின் உதவியுடன் இம்மாத இறுதிக்குள் வினியோகித்து முடிப்போம்,'' என்றார்.