தாவூத் இப்ராகிம் பற்றி பாகிஸ்தான் கூறியது பொய்; அத்வானி

உலகம் முழுவதும் கடந்த 10 ஆண்டுகளாக பின்லேடனை அமெரிக்க இராணுவமும், உளவுத் துறையும் சல்லடை போட்டு தேடி வந்தன. ஆனால், கடந்த 7 ஆண்டுகளாக பாகிஸ்தானில் இராணுவ தலைமை அலுவலகம் அருகே உள்ள அபோதாபாத் நகரில் பின்லேடன் மறைந்து வாழ்ந்துள்ளார்.

கடந்த வாரம் அமெரிக்க சிறப்பு கமாண்டோ படை நடத்திய தாக்குதலில் பின்லேடன் கொல்லப்பட்ட பிறகு இந்த தகவல் வெளியாகி உள்ளது. ஆனால், அதுவரையிலும் பின்லேடன் இருப்பிடம் தெரியாதது போலவும், அமெரிக்காவுடன் சேர்ந்து தேடுவது போலவும் பாகிஸ்தான் நடந்து கொண்டது.

இது போலவே, 1993-ம் ஆண்டு மும்பையில் நடந்த தொடர் குண்டு வெடிப்புக்கு காரணமான தாவூத் இப்ராகிமும் பாகிஸ்தானில் பதுங்கி இருப்பதாகவும் அந்த நாடு பொய் சொல்வதாகவும்` பா.ஜனதா மூத்த தலைவரும் முன்னாள் துணை பிரதமருமான அத்வானி தெரிவித்துள்ளார். இது குறித்து இணையதளத்தில் அவர் எழுதிய கட்டுரையில் கூறியுள்ளதாவது:-

இந்திய பிரதமராக வாஜ்பாய் இருந்தபோது, அவருடைய அழைப்பை ஏற்று முதன் முறையாக இந்தியாவுக்கு முஷ்ரப் வந்தார். ஜனாதிபதி மாளிகையில் அவரை நான் தான் (அப்போது உள்துறை மந்திரியாக அத்வானி இருந்தார்) முதலில் சந்தித்தேன்.

அப்போது, இந்தியா- பாகிஸ்தான் இடையே குற்றவாளிகளை நாடு கடத்தும் ஒப்பந்தம் குறித்து பேச்சு வார்த்தை நடந்தது. முதலில், சுமூகமான முறையில் பேசிய முஷரப், `தாவூத் இப்ராகிமை இந்தியாவுக்கு நாடு கடத்தி அனுப்புவது' பற்றி நான் பேசியதும் முகம் சிவந்தார்.

மேலும், முகத்தை விரோத மனப்பான்மையில் வைத்துக் கொண்டு, `பாகிஸ்தானில் தாவூத் இப்ராகிம் இல்லை' என உறுதியாக தெரிவித்தார். அந்த சூழ்நிலையின் இறுக்கத்தை உடனடியாக மாற்றும் வகையில் நான் பேசினேன். 2001-ம் ஆண்டு ஜுலை 14-ந் தேதி நடந்த அந்த சந்திப்பின்போது உடன் இருந்த பாகிஸ்தான் அதிகாரிகளில் ஒருவர், பின்னாளில் என்னை சந்தித்தார்.

அப்போது அவர், `அன்றைய தினம் தாவூத் இப்ராகிம் பற்றி எங்களுடைய ராணுவ ஜெனரல் கூறியது அனைத்தும் அப்பட்டமான பொய்' என என்னிடம் தெரிவித்தார். அப்போது, கராச்சியில் தாவூத் இருப்பதாக தகவல் கிடைத்தது. குற்றவாளிகளை நாடு கடத்தும் ஒப்பந்தம் குறித்த பேச்சு வார்த்தை இறுதி கட்டத்தை அடையும் தறுவாயில் தாவூத் பற்றி பேசியதும் அந்த இடத்தின் சூழ்நிலை முழுவதும் உடனடியாக மாறியது.

பேச்சு வார்த்தை நடந்தபோது, இந்திய தரப்பில் 5 அதிகாரிகளும் பாகிஸ்தான் தரப்பில் 5 அதிகாரிகளும் இருந்தனர். தாவூத் குறித்து இந்தியாவிடம் அப்பட்டமான பொய் கூறியது போலவே, பின்லேடன் பற்றியும் அமெரிக்காவிடம் பல ஆண்டுகளாக அப்பட்டமான பொய்யை பாகிஸ்தான் கூறி வந்திருக்கிறது.

பின்லேடன் பதுங்கி இருந்த அபோதாபாத் மாளிகை, முஷரப் அதிபராக இருந்தபோது 2005-ம் ஆண்டில், கட்டப்பட்டு இருக்கிறது. பின்லேடனும், குடும்பத்தினரும் பதுங்கி இருந்த இடம் குறித்து 3 விதமான கதைகள் வெளியாகி உள்ளன. அவற்றை எல்லாம் வைத்து பார்க்கும்போது, நாட்டின் ஒட்டு மொத்த நிலைமையும் ஜெனரல் முஷரப் கட்டுப்பாட்டிலேயே நடந்திருக்கின்றது.

அதாவது, முஷரப்பின் முழு கட்டுப்பாட்டிலேயே ராணுவ தலைமை அலுவலகம் அருகில் அபோதாபாத்தில் பின்லேடனுக்கு பதுங்கு மாளிகை கட்டி முடிக்கப்பட்டுள்ளது. இவ்வாறு அத்வானி தெரிவித்துள்ளார்.
கேசரி

இன்று தினத்தந்தியில் படித்தேன் இப்போழ்து தாவுது பாகிஸ்தானில் இருந்து எஸ்கேப்