இந்தியர் கறுப்பு பணம் பற்றி சுவிஸ் வங்கி விவரம் கொடுக்கும்: சுவிட்சர்லாந்து அரசு தகவல்

மீனு · மீனு Mon 7 Sep 2009 - 12:52

சுவிஸ் வங்கிகளில் உள்ள இந்தியர்களின் கறுப்பு பணம் பற்றிய தகவல்களை வரி ஏய்ப்பு ஆவணங்களுடன் விண்ணப்பித்தால் இந்தியா பெறலாம் என்று சுவிட்சர்லாந்து தெரிவித்துள்ளது.

சுவிஸ் வங்கிகளில் குவிக்கப்பட்டுள்ள இந்தியர்களின் கறுப்புப் பண விவகாரம், கடந்த லோக்சபா தேர்தல் பிரசாரத்தின்போது சூடுபிடித்தது. கணக்கில் வராத கறுப்புப் பணத்தை யார் யார் சுவிஸ் வங்கிகளில் டெபாசிட் செய்துள்ளனர் என்பதை கண்டுபிடித்து, அதை திரும்பக் கொண்டு வர வலியுறுத்தப்பட்டது.

இதுதொடர்பாக உச்ச நீதிமன்றத்தில் பொது நல வழக்கும் தொடரப்பட்டு, விசாரணை நடந்து வருகிறது. முதல்கட்ட விசாரணையின்போது, சுவிஸ் வங்கி கறுப்புப் பணத்தை மீட்பதில் அரசின் நடவடிக்கை போதாது என்று நீதிபதிகள் குற்றம்சாட்டி இருந்தனர்.

இந்நிலையில், சுவிஸ் வங்கிகளில் இந்தியர்களின் டெபாசிட் விவரங்களைத் தருமாறு சுவிட்சர்லாந்து அரசிடம் மத்திய அரசு கோரியிருந்தது. தனிப்பட்ட வங்கிக் கணக்குகளின் விவரங்களை அளிப்பது வங்கிகளின் நம்பகத்தன்மைக்கு எதிரானது. எனவே, சட்டரீதியான வழிகளில், உரிய ஆவணங்களுடன் விண்ணப்பிக்குமாறு பதில் அளித்திருந்தது.

சுவிஸ் பொருளாதார விவகாரங்கள் துறை அமைச்சரும், துணை அதிபருமான டோரிஸ் லுதர்ட் இப்போது உலக வர்த்தக அமைப்பின் கூட்டத்தில் பங்கேற்க இந்தியா வந்துள்ளார்.

இந்த விவகாரம் பற்றி டெல்லியில் அவர் கூறியதாவது:

இந்தியா, சுவிட்சர்லாந்து இடையே இரட்டை வரி தவிர்ப்பு ஒப்பந்தம் ஏற்கனவே அமலில் உள்ளது. அதன் அம்சங்களை கடுமையாக்க திட்டம் உள்ளது. அதற்கான இருதரப்பு பேச்சு வார்த்தை டிசம்பரில் தொடங்கும். புதிய ஒப்பந்தம் ஏற்பட்டதும், இந்தியா கேட்கும் தகவல்களை அடுத்த ஆண்டு அளிக்க முடியும்.

சுவிஸ் வங்கிகளில் கணக்கு வைத்துள்ள எல்லோரது தனிப்பட்ட விவரத்தை தருவது சரியாகாது. உலகில் எங்கும் இதுபோல தரப்படுவதில்லை. சர்வதேச விதிகளை சுவிஸ் அரசு கடைபிடிக்கிறது. அதேநேரம், வரி ஏய்ப்புக்கான ஆவணங்களுடன் விண்ணப்பித்தால் விவரங்களை அளிப்பதில் பிரச்னையில்லை.

இவ்வாறு டோரிஸ் கூறினார்.

சுவிஸ் வங்கிகளில் பணம் குவித்துள்ளவர்கள் பற்றிய விவரங்களைப் பெறுவதில் அமெரிக்கா, சுவிட்சர்லாந்து இடையே கடந்த மாதம் ஒப்பந்தம் ஏற்பட்டது. அதன் தொடர்ச்சியாக, வரி ஏய்ப்பு அடிப்படையில் 4,450 பேரின் கணக்கு விவரங்களை அமெரிக்காவுக்கு சுவிஸ் அரசு அளித்தது.

இந்தியாவுடன் புதிய ஒப்பந்தம் அடுத்த ஆண்டு தொடக்கத்தில் ஏற்பட்டதும், கறுப்பு பணக் குவிப்பு விவரங்களை சுவிட்சர்லாந்து அளிக்கும் என்று எதிர்பார்க்கப்படுகிறது.

இந்தியர் கறுப்பு பணம் பற்றி சுவிஸ் வங்கி விவரம் கொடுக்கும்: சுவிட்சர்லாந்து அரசு தகவல்

இந்தியர் கறுப்பு பணம் பற்றி சுவிஸ் வங்கி விவரம் கொடுக்கும்: சுவிட்சர்லாந்து அரசு தகவல்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக