பூ விழி

பூவிழிக்குள் விழுந்தபிம்பம் கோடி - உன்
பொன்உருவம் போல வரு மோடி ?
பாவழிக்குள் வந்து தடம்
பதித்தவளே பதம் முழுக்கக்
கூவிளமும் கருவிளமும்
கொள்ளைஎனத் தருபவளே
நாவழியே நடந்த உனை நாடி - புகழ்
நாட்டிடவோ நல்லதமிழ்ப் பாடி ?

கோபம்எலாம் ஏனடியோ கொள்ளை - உளம்
கொண்டுநின்று மிழற்றுகிற கிள்ளை
தாபமுடன் தவிக்கிறது
தான்அடங்க மறுக்கிறது
ஞாபகமோ நீவிதைத்த
நடவுக்குள் விளைகிறது
தீபவிழி பாய்ச்சுதடி கள்ளை - அதில்
திளைக்கின்றேன் தீருதடி சள்ளை

காட்சிஎலாம் தருவதற்கேன் காலம் - மிகக்
கடத்துகிறாய் நிலைமைஅலங் கோலம்
ஆட்சிஎலாம் மதுரையிலே
ஆள்வதனால் என்னபயன்
மாட்சிமையாய் அரசாள
மனதேசம் விற்பனைக்குப்
போட்டுவைத்தேன் அன்புமட்டும் போதும் - அது
பொன்விலைக்கு நேர்விலைஎப் போதும்

கச்சிறுக்கும் கலசமது் ஆடும் - அதில்
கனகமணிச் சரமிரண்டு பாடும்
பச்சைஒளிக் கிரணம்எனைப்
பற்றிஉயிர்ப் பாகவரும்
உச்சிமுதற் பாதம்வரை
ஊறிடுந்தீம் பாகுவரும்
துச்சமென உலகமெலாம் தோணும் - இவள்
சொல்லுவதால் பிறக்குதிந்த ஞானம்.

மேகலையில் ஆடிவரும் நாதம் - தான்
மேதினியி லேஎனக்கு வேதம்
யோகநிலை காட்டுவதும்
உச்சரித்துப் போற்றுவதும்
மோக ஒளிச் சோதிஇது
முன்புவரக் காணாமல்
போகுமெனில் என்னுரைப்பேன் தாகம் - இவள்
பூங்கரத்துள் சிக்குறுதல் போதும்

சுற்றியுளோர் எண்ணமெலாம் சூழ - நான்
சோர்வுறவா வாழுகிறேன் தாழ
வெற்றியுடன் வளைந்திடும் திக்
விசயமதில் உனக்கிணையாய்
உற்றிடுநாள் என்றுகொலோ
ஓதடியோர் வார்த்தைஎன
பற்றுகிறேன் பாசவெறி மூள - எனை
பாகமென ஆக்கிவிடு ஆள
கண்டகண்ட மடமனிதர் மத்தி - இதில்
காணுதிலை அந்தரங்க சுத்தி
கொண்டதெலாம் குறையாகக்
குற்றுயிரோ குலையாக
பிண்டமட்டும் அலையுதடி
பிணமாகத் திரியுதடி
தெண்டனிட்டேன் உள்ளம் எனும் புத்தி - நின்
சேவடிக்குள் ஆக்கிவிடு பொத்தி

பார்ப்பவரின் கண்வலைக்குள் பட்டு - மிக
பரிதவிப்பில் ஆளுகிறேன் கெட்டு
மூர்த்தணிய மாகவரும்
மோகவெறி யாகமனம்
ஆர்த்தெழுங்கால் அடக்கடியோ
அடைக்கலநின் சேவடியோ
தீர்தெழுங்கா லம்எதுவோ தொட்டு - நின்
திருக்கரத்தால் வைஇரண்டு கொட்டு

மனக்குழப்பம் அதிகரிக்கும் தோஷம் - இதில்
மாட்டியவன் பாடுமிக மோசம்
தினக் குழப்பம் தீரவிலை
சேர்ந்தவரின் திருஷ்டியிலே
வனக் கிளீ நான் வாடுகிறேன்
வருத்தமுடன் பாடுகிறேன்
கனக்குதடி நான்நடிக்கும் வேஷம் - இதில்
காணுதிலை எங்கேசந் தோஷம்

சுற்றியவர் வீச்சுகளில் சொக்கி - நான்
துடிதுடித்தேன் மாயவலை சிக்கி
எற்றுதைக்க ஏலுதிலை
இல்லைஎன ஆகுதிலை
முற்றியதோ தீரவிலை
மோகவலை மோகவலை
வெற்றுயிராய் உனதடியே விக்கி - நான்
வீழுகிறேன் விஷம்எல்லாம் கக்கி

மகுட தீபன்

சாரி..எனக்கு கொஞ்சம் புரியல..

அருமையான கவிதை

meenuga wrote:சாரி..எனக்கு கொஞ்சம் புரியல..

என்ன புரியவில்லை மீனு!

எனக்கு அர்த்தமே புரியல ஷிவா அண்ணா ..எனக்கு கவிதை என்றா
ரொம்ப ரொம்ப பிடிக்கும்..சோ இரண்டு வாட்டி படித்தும் பார்த்தேன் சில
வரிங்க புரிந்தது..பல வரிங்க புரியலை ..

இது சற்று செயுள்நடை கலந்து எழுதியிருக்கு அதுதான் புரியலை உங்களுக்கு மீனு
சங்க இலக்கியங்கள் இதைவிட கடினமானவை அவை எனக்குப்புரியாது அவ்வளவு கடினமானவை

மீனுவிற்குப் புரியவில்லையாம் ரூபன்! என்ன செய்யலாம்...

நான் நான் நான் சொல்லிக்கொடுக்கிறேன்

thanks ruban.