ஒரு ஓட்டு : பல ரூட்டு

தேர்தலுக்கு இன்னும் இரண்டு நாட்களே உள்ள நிலையில், தொகுதிதோறும் முக்கிய அரசியல் கட்சிகள் பல்வேறு வழிமுறைகளை கையாண்டு வாக்காளர்களை கவனித்து வருகின்றன. தேர்தலில் வாக்காளர்களுக்கு பணம், பொருட்கள் கொடுப்பதை வழக்கமாக வைத்துள்ள முக்கிய அரசியல் கட்சிகள், தேர்தல் கமிஷனின் கிடுக்கிப்பிடி கண்காணிப்பால் இந்த முறை சற்று திணற வேண்டியதாகி விட்டது. ஆனாலும், பல்வேறு வழிமுறைகளை பின்பற்றி வாக்காளர்களுக்கு பணமும் பரிசுப் பொருட்களும் எந்தவித தடையும் இல்லாமல் சென்றடைந்து வருகிறது.
"திருமங்கலம் பார்முலா' படி வாக்காளர்களை கவனிக்க திட்டமிட்டிருந்த தி.மு.க., இந்த முறை வித்தியாசமான வழிமுறைகளை சிந்திக்க வேண்டியதாகி விட்டது. கோவையில் அங்கொன்றும் இங்கொன்றுமாக சப்ளை செய்து கொண்டிருந்த கட்சியினர், அ.தி.மு.க., பொதுச் செயலாளர் ஜெயலலிதாவின் வருகையை சரியாக பயன்படுத்திக் கொண்டனர்.
அம்மாவை காண அடிமட்ட தொண்டர் முதல் மேல்மட்ட தலைவர் வரை வ.உ.சி. மைதானத்துக்கு சென்று விட, எந்தவித எதிர்ப்பும் இல்லாமல் அ.தி.மு.க., நேரடியாக சந்திக்கும் தொகுதிகளில் புகுந்து விளையாடினர் உடன் பிறப்புகள். தலைக்கு ஆயிரம் ரூபாய் வீதம் கிடைத்ததாக, வாக்காளர்கள் ஆர்ப்பரிக்கின்றனர்.
"நாங்களும் கொஞ்சமும் சளைத்தவர்கள் அல்ல' என்பதை நிரூபிக்கும் வகையில், 300 ரூபாய்க்கான மளிகை கூப்பன்களை வாரி வழங்கி பெண்மணிகளை தங்கள் வசம் இழுத்து வைத்துள்ளது, எதிரணி. கோவில், வீட்டு விசேஷங்களில் வாக்காளர்களை கவனித்துக் கொண்ட கட்சியினர், வேறு ஒருவர் பெயரில் ஓட்டல்களில் அறை எடுத்து முக்கிய சங்க நிர்வாகிகளுக்கு சரக்கு அபிஷேகம் செய்தது, வேறு கதை.
இந்த முறை இரு திராவிடக் கட்சிகளின் தேர்தல் அறிவிப்புகள் மட்டுமல்லாமல், "கவனிப்புகளும்' ஒரே மாதிரியாக இருப்பதால் இவற்றுக்காக செலவிட்ட பணம் முழுவதும் ஓட்டுகளாக மாறுமா என்பது இன்னும் இரண்டு நாளில் தெரிந்து விடும்.