400 தற்கொலை தீவிரவாதிகளுக்கு பாகிஸ்தானில் பயிற்சி

இஸ்லாமாபாத், ஏப்.10- பாகிஸ்தானில் 400 சிறுவர்கள் தற்கொலை படையில் சேர்க்கப்பட்டு, அவர்கள் தற்கொலை தீவிரவாதிகளாக பயிற்சி அளிக்கப்பட்டு உருவாக்கப்பட்டு வருகிறார்கள்.

தாக்குதல் நடத்திய 14 வயது சிறுவன்

பாகிஸ்தானில் வடமேற்கு எல்லைப்புற மாநிலத்தில் உள்ள வடக்கு வசீரிஸ்தானில் தலீபான் தீவிரவாதிகள் 400 சிறுவர்களை தங்கள் இயக்கத்தில் சேர்ந்து, அவர்களை தற்கொலை தீவிரவாதிகளாக மாற்றுவதற்காக பயிற்சி அளித்து வருகிறார்கள். அவர் கள் தற்கொலை தீவிரவாதிகளாக வளர்க்கப்பட்டு வருகிறார்கள்.

இந்த தகவல் 14 வயது சிறுவன் ஒமர் பிடாயீ மூலம் கிடைத்து உள்ளது. இவன் கடந்த 4-ந் தேதி டெரா காசி கான் என்ற இடத்தில் உள்ள 13-ம் நூற்றாண்டை சேர்ந்த சுபி வழிபாட்டு தலத்தின் மீது கையெறி குண்டை வீசி தாக்குதல் நடத்தினான். இதில் 50 பேர் பலியானார்கள். ஆனால் அவன் மட்டும் காயத்துடன் உயிர் பிழைத்தான். அவனை அருகில் உள்ள ஆஸ்பத்திரியில் சேர்த்தனர். அங்கு சிகிச்சை பெற்றபடி அவன் நிருபர்களுக்கு பேட்டி அளித்தான். அப்போது அவன் கூறியதாவது:-

400 தற்கொலை தீவிரவாதிகள்

என்னை போன்ற சிறுவர்கள் 400 பேர் தலீபானின் தற்கொலை இயக்கத்தில் இருக்கிறோம். எங்களை மிக சிறிய வயதிலேயே இயக்கத்தில் சேர்த்து எங்களுக்கு தற்கொலை தாக்குதல் பயிற்சி அளித்து வருகிறார்கள். நாங்கள் தற்கொலை தாக்குதல் நடத்துவதற்காகவே வளர்க்கப்பட்டு வருகிறோம்.

வடக்கு வசிரீஸ்தானில் உள்ள மீர் அலி என்ற இடத்தில் எங்களுக்கு பயிற்சி அளிக்கப்பட்டு வருகிறது. தொடக்கத்தில் ஆப்கானிஸ்தானில் உள்ள முஸ்லிம் அல்லாதவர்களை கொல்வதற்காக என்னை அந்த நாட்டுக்கு கடத்த திட்டமிட்டு இருந்தார்கள். பிறகு அதை கைவிட்டு என்னை டெரா காசி கான் என்ற இடத்துக்கு அழைத்து வந்தார்கள். அப்போது இங்கு காபிர் (முஸ்லிம் மதத்தில் நம்பிக்கை இல்லாதவர்கள்) யாரும் இல்லையே என்று கேட்டேன். அதற்கு அவர்கள் இங்கு உள்ள மனிதர்கள் காபிர்களை விட மோசமானவர்கள் என்று கூறினார்கள்.

இவ்வாறு அந்த சிறுவன் நிருபர்களிடம் கூறினான்.

தினதந்தி!