ஸ்டெர்லைட் ஆலை ஆய்வு ; வைகோ விளக்கம்

மதிமுக பொதுச்செயலாளர் வைகோ வெளியிட்டுள்ள அறிக்கையில்,



"ஸ்டெர்லைட் ஆலையால் சுற்றுச்சூழல் எந்த அளவிற்குப் பாதிக்கப்படுகிறது என்பதை ஆய்வு செய்து அறிக்கை தரும்படி நாகபுரியில் உள்ள மத்திய அரசின் தேசிய சுற்றுச்சூழல், பொறியியல் ஆராய்ச்சி நிறுவனத்துக்கு உச்ச நீதிமன்றம் உத்தரவிட்டது.



வழக்குத் தொடுத்தவன் என்ற முறையில் நானும் (வைகோ) மத்திய அரசின் மாசு கட்டுப்பாட்டு வாரியமும்,தமிழ்நாட்டின் மாசு கட்டுப்பாட்டு வாரியமும் பங்கேற்கும் விதத்தில் ஆய்வு நடத்த வேண்டும் என்று ஆணை பிறப்பித்தது. ஆனால் உச்ச நீதிமன்றம் உத்தரவு பிறப்பித்த 40 நாட்களுக்குப் பிறகே நீரி நிறுவனம் ஆய்வு நடத்த கடந்த 6-ம் தேதியன்று வருகை தந்தது.






இந்த ஆய்வின்போது ஸ்டெர்லைட் வளாகத்திலும், சுற்று வட்டாரத்திலும், நிலத்தின் மீதும், நிலத்தின் அடியிலும் உள்ள நீரையோ, மண்ணையோ சோதிப்பதற்கு மாதிரிகளை எடுக்கப் போவதில்லை என்றும், இனி ஒருமுறை வந்துதான் எடுக்கப்படும் என்று நீரி நிபுணர் குழு தெரிவித்தது. இதை நான் கடுமையாக ஆட்சேபித்தேன்.



உத்தரவு பிறப்பித்த 10 நாள்களுக்குள் வந்திருக்க வேண்டும். நாற்பது நாள்கள் கழித்து வந்திருக்கிறீர்கள். இதனால் பல உண்மைகளை மூடி முறைக்க ஸ்டெர்லைட் நிர்வாகத்திற்கு வாய்ப்பு அளிக்க முயல்கிறீர்கள்.

எனவே கண் துடைப்புக்காக நடத்தப்படும் இந்த ஆய்வில் நான் கலந்துகொள்ள மாட்டேன். இதை உச்ச நீதிமன்றத்திலும் தெரிவிப்பேன் எனக் கூறினேன்.



இதன்பின் நீரையும், மண்ணையும் சோதனைக்கு மாதிரி எடுக்க நீரி நிபுணர் குழு ஒப்புக்கொண்டது. ஆனால் ஸ்டெர்லைட் நிறுவனத்திற்குள் நீரையும், மண்ணையும் சோதிப்பதற்கு நாங்களும் மாதிரிகள் எடுக்க வேண்டும் என்றபோது ஸ்டெர்லைட் நிர்வாகம் அடியோடு மறுத்ததால் நீரி நிபுணர் குழு எங்களை அனுமதிக்கவில்லை. இதைப்போல நீரி நிபுணர் குழுவினர் காற்று மண்டலம் மாசுபடுவதைச் சோதிக்கும் உபகரணங்களையும் கொண்டு வரவில்லை என்றார்கள்.



ஆனால் உண்மையில் காற்றில் கலக்கும் நச்சுத்தன்மையைக் கண்டறியும் உபகரணங்கள் ஒரு வாகனத்தில் கொண்டு வரப்பட்டிருந்தன. பின்னர் அவை வெளியில் அனுப்பப்பட்டுவிட்டன. இந்தக் குறைகளை எல்லாம் எழுத்து மூலமாகவே நிபுணர் குழுவிடம் தெரிவித்துள்ளேன். போபாலில் ஏற்பட்ட ஆலை விபத்தால் பல மனித உயிர்கள் பலியானதுபோல ஸ்டெர்லைட் ஆலையின் நச்சுத்தன்மையால் உயிர்கள் அழியும்.



எனவே பொதுமக்கள் நலனைப் பாதுக்காக்க ஸ்டெர்லைட் நச்சு ஆலையை அகற்றும் போராட்டத்தைத் தர்மயுத்தமாகவே தொடர்வோம்’’ என்று கூறியுள்ளார்.

nakkeran

தொடருங்கள் வைகோ அவர்களே! உங்களை கட்சியில் விட்டு தூக்க சொன்னதே இந்த நிறுவனம் தான்!