இணையதளத்தில் பெண்களை ஏமாற்றிய அமெரிக்க வாழ் இந்தியருக்கு 42 மாத சிறை தண்டனை

**சிவா** · **சிவா** Sat Apr 09, 2011 9:22 am

இணையதளம் மூலம் பெண்களை ஏமாற்றி பணம் பறித்த அமெரிக்க வாழ் இந்தியருக்கு அமெரிக்க கோர்ட்டு 42 மாத சிறைத்தண்டனை விதித்தது.

இணையதள அரட்டை

அமெரிக்காவின் பிலடெல்பியா பகுதியை சேர்ந்தவர் ஜெய்தாஸ் தானோவ் (வயது 27). இவர், இந்திய வம்சாவளி வாலிபர் ஆவார். இணையதளத்தில் சமூக வலைப் பக்கங்களில் உள்ள அரட்டை சேவை மூலமாக ஏராளமான பெண்களுடன் தொடர்பு வைத்திருக்கிறார். தன்னிடம் தொடர்பு கொள்ளும் பெண்களிடம் தான் ஒரு அமெரிக்கன் என்றும் டட்சி வங்கி மற்றும் சர்வதேச நிதியத்தில் பணிபுரிவதாகவும் கூறியுள்ளார்.

இதற்கு ஆதாரமாக சில போலி பாஸ்போர்ட்டுகளையும் காண்பித்துள்ளார். ஜெய்தாஸ் தெரிவித்த தகவல்களில் மயங்கும் பெண்களிடம் கிரெடிட் கார்டு கணக்கு தொடங்குமாறும் அதிகாரப்பூர்வ உபயோகிப்பாளராக தனது பெயரை சேர்க்குமாறு கூறுவது ஜெய்தாசின் வழக்கம். அது போல செய்யும் பெண்களிடம் காதல் மொழி பேசி மயக்கி இருக்கிறார். நேரிலும் சிலரை சந்தித்துள்ளார்.

ரூ.5 லட்சம் வரை

இவ்வாறு காதல் நெருக்கம் அதிகரிக்கும் சமயத்தில் கிரெடிட் கார்டு மூலமாக பணத்தை சுருட்டி விட்டு தப்பியோடி விடுவார். பல்வேறு அமெரிக்க பெண்களிடம் இது போன்று லீலை செய்து பணம் பறித்துள்ளார். ஒவ்வொருவரிடமும் வெவ்வேறு தொகை எடுத்துள்ளார். அதிகபட்சமாக ரூ.5 லட்சம் வரை மோசடி செய்திருக்கிறார். ஆனால், கிரெடிட் கார்டு நிறுவனம் மூலமாக இந்த மோசடியை அறிந்த ஒரு பெண் மட்டும் கடந்த ஜனவரி மாதம் போலீசில் புகார் செய்தார்.

ஜெய்தாஸ் மீது அடையாள எண்ணை திருடுதல், வங்கியை ஏமாற்றுதல், அமெரிக்கர் என போலியாக கூறுதல் என்பது போன்ற பல்வேறு குற்றச்சாட்டுகளின் கீழ் வழக்கு பதிவு செய்யப்பட்டது. அதைத் தொடர்ந்து, ஒரு ஓட்டலில் மற்றொரு பெண்ணுடன் இருந்த போது அவரை போலீசார் கைது செய்தனர். மேலும், மாவட்ட கோர்ட்டிலும் அவர் மீது வழக்கு தொடரப்பட்டது.

அபராதம்

வழக்கின் விசாரணை முடிந்த நிலையில், நேற்று தீர்ப்பு வழங்கப்பட்டது. அப்போது, இணையதளம் மூலமாக பெண்களை ஏமாற்றி பணம் பறித்த ஜெய்தாசுக்கு 42 மாத சிறைத்தண்டனை விதித்து நீதிபதி உத்தரவிட்டார். மேலும், ரூ.1 லட்சத்து 25 ஆயிரம் அபராதமும் விதித்தார்.

தினதந்தி!