இண்டர்லோக் போராட்டம்: நாடாளுமன்ற உறுப்பினர் மனோகரன் கைது செய்யப்பட்டார்

இன்று பத்துமலை சுப்ரமணியர் ஆலயத்தில் சுமார் நூற்றுக்கு மேற்பட்டவர்களுடன் இண்டர்லோக் விவகாரம் குறித்து உரையாற்றிக் கொண்டிருக்கையில் டிஎபி தெலுக் இந்தான் நாடாளுமன்ற உறுப்பினர் எம். மனோகரன் கைது செய்யப்பட்டார்.

இண்டர்லோக் மாணவர்களுக்கு ஏற்ற பாடநூல் அல்ல. அந்நூல் இந்தியர்களையும், சீனர்களையும் இழிவுபடுத்துகிறது. அந்நூல் மாணவர்களுக்கு தவறான, இனவாத அடிப்படையிலான கருத்துக்களை அவர்களின் சிந்தனையில் திணிக்க வேண்டும் என்ற நோக்கத்தை கொண்டுள்ளதாகையால், இண்டர்கோக் பெரும் தீங்கை உண்டுபன்னும் என்றும் மனோகரன் கூட்டத்தினரிடம் கூறினார்.

நண்பகல் மணி 12.00 அளவில் கோயில் வளாகத்தில் நடந்த அக்கூட்டத்திற்குள் நுழைந்த கோம்பாக் மாவட்ட போலீஸ் ஒசிபிடி மனோகரனிடம் அவரது உரையை நிறுத்துமாறு கேட்டுக்கொண்டதாக அவர் கூறினார்.

“நான் மறுத்து விட்டேன். கோயில் வளாகத்தில் கூடியிருக்கும் மக்களிடம் நான் பேசிக் கொண்டிருக்கிறேன் என்று அந்த போலீஸ் அதிகாரியிடம் கூறிவிட்டு என் உரையைத் தொடர்ந்தேன்”, என்றார் மனோகரன்.

மனோகரன் பேசுவதை நிறுத்த மறுத்து விட்டதால், அந்த ஒசிபிடி அவரைக் கைது செய்து கோம்பாக் போலீஸ் நிலையத்திற்கு கொண்டுசென்றார்.

கோம்பாக் போலீஸ் நிலையத்தில் அவர் கைது செய்யப்பட்டிருப்பதாகவும் அவரிடம் வாக்குமூலம் பதிவுசெய்யப்படும் என்றும் தெரிவிக்கப்பட்டுள்ளதாக மனோகரன் கூறினார்.

மனோகரனுடன் இன்னும் இருவரும் கைது செய்யப்பட்டுள்ளனர். அவர்களில் ஒருவர் மலேசிய தமிழ் மாணவர்கள் முன்னேற்ற கழகத்தின் எம் எஸ் அர்ஜுனன் ஆவார்.

கைது செய்யப்பட்டவர்களின் வாக்குமூலங்கள் பதிவு செய்யப்பட்ட பின்னர் இன்று பிற்பகல் மணி 2.40க்கு அவர்கள் விடுவிக்கப்பட்டனர்.

“இந்திய சமூகம் இண்டர்லோக் அகற்றப்படுவதை விரும்புகிறது. ஆனால், அரசாங்கம் இவ்விவகாரத்தில் விடாப்பிடியாக இருப்பது ஏன்? அரசாங்கம் இச்சமூகத்தை நல்ல நடத்தை இல்லாத ஒன்றாகச் சித்தரிக்க விரும்புகிறது என்பது எங்களுடைய கருத்தாகும்”, என்று அர்ஜுனன் கைது செய்யப்படுவதற்கு முன்பு கூறினார்.

இடைநிலைப்பள்ளியிலிருந்து இந்நாவல் மீட்டுக்கொள்ளப்படும் வரையில் இப்போராட்டம் தொடரும் என்று அவர் சூளுரைத்தார்.
'மலேசியா இன்று'