மலேசியாவில் தேசிய முன்னணியின் இணை கட்சியாக டத்தோ நல்லாவின் கட்சிக்கு அங்கீகாரம்

டத்தோ கே.எஸ்.நல்லாவின் மலேசிய இந்தியர் ஐக்கிய கட்சியை (ம.இ.ஐ.க.) தேசிய முன்னணியின் ஆதரவு கட்சியாகவும், இணை கட்சியாகவும் ஏற்றுக்கொள்ள முடிவு செய்யப்பட்டுள்ளது.

தேசிய முன்னணியின் ஆதரவு கட்சி

மலேசிய இந்தியர் ஐக்கிய கட்சியின் தலைவர் டத்தோ நல்லா ஜோகூர்பாரு நகரில் நிருபர்களுக்கு பேட்டி அளிக்கையில், தேசிய முன்னணியின் ஓர் உறுப்பு கட்சியாக இணையும் தங்கள் விண்ணப்பத்தை, தேசிய முன்னணியின் உச்சமன்றம் நிராகரித்த போதிலும், ஆதரவு மற்றும் இணை கட்சியாக ஏற்றுக்கொள்ள ஒப்புதல் வழங்கப்பட்டுள்ளதாக கூறினார்.

இதற்காக அங்கீகாரம் வழங்கி இருக்கும் பிரதமர் டத்தோஸ்ரீ நஜீப் துன் ரசாக் மற்றும் தேசிய முன்னணியின் உறுப்பு கட்சிகளின் தலைவர்களுக்கு நன்றி தெரிவித்துக்கொள்வதாகவும் அவர் குறிப்பிட்டார்.

தேசிய முன்னணியின் தலைமைச் செயலாளர் டத்தோஸ்ரீ தெங்கு அட்னான் தெங்கு மன்சூர் அனுப்பி வைத்துள்ள அங்கீகார கடிதத்தையும் அவர் வாசித்து காட்டினார்.

பொதுத் தேர்தல்

வருகிற 13-வது பொதுத்தேர்தலில் களம் இறங்கி தேசிய முன்னணிக்கு ஆதரவு திரட்ட திட்டமிட்டு இருக்கும் இந்த சமயத்தில் கட்சி உற்சாக பலத்துடன் செயல்படுவதற்கு உந்து சக்தி ஏற்பட்டு இருப்பதாகவும் பேட்டியின் போது டத்தோ நல்லா தெரிவித்தார்.

பேட்டியின் போது மலேசிய இந்தியர் ஐக்கிய கட்சியின் ஜோகூர் மாநில தலைவராக நியமனம் செய்யப்பட்டு இருக்கும் எம்.டி.சாமியை அவர் அறிமுகப்படுத்தினார். இந்த நிகழ்ச்சியில் மலேசிய இந்தியர் ஐக்கிய கட்சியின் தேசிய இளைஞர் பிரிவின் தலைவர் எஸ்.பாலன், ஜோகூர் மாநில இளைஞர் அணி தலைவர் ஆர்.கே.மணியம் மற்றும் முக்கிய பொறுப்பாளர்கள் கலந்து கொண்டனர்.

முன்னதாக செனாய் விமான நிலையத்திற்கு வந்த டத்தோ நல்லாவுக்கு சிறப்பான வரவேற்பு அளிக்கப்பட்டது. எம்.டி.சாமி அவருக்கு மாலை அணிவித்து சிறப்பு செய்தார்.