தாமிரபரணி நீர் ஆதாரத்தை பாதுகாக்க மணல் அள்ளுவது தடுக்கப்படும்: ஜெ., வாக்குறுதி

திருநெல்வேலி : ""அ.தி.மு.க., அரசு ஏற்பட்டால், நெல்லை தாமிரபரணி ஆற்றில் மணல் அள்ளுவதை தடுக்க நடவடிக்கை எடுக்கப்படும்,'' என, அ.தி.மு.க., பொதுச் செயலர் ஜெயலலிதா உறுதி கூறினார். திருநெல்வேலியில் தேர்தல் பிரசாரம் மேற்கொண்ட அவர், வாகையடிமுனையில் நெல்லை அ.தி.மு.க., வேட்பாளர் நயினார் நாகேந்திரன், பாளையங்கோட்டை மார்க்சிஸ்ட் வேட்பாளர் பழனி, நாங்குநேரி ச.ம.க., நாராயணன், ராதாபுரம் தே.மு.தி.க., மைக்கேல் ராயப்பன் ஆகியோரை அறிமுகப்படுத்தி பேசியதாவது: இந்த தேர்தல், ஆட்சி மாற்றத்திற்காக மட்டும் அல்ல; தமிழக மக்களை அடிமைத்தனத்தில் இருந்து விடுவிப்பதற்காகவும் நடத்தப்படும் தேர்தல். கடந்த ஐந்து ஆண்டுகளில் பல்வேறு பொருட்களின் விலை கடுமையாக உயர்ந்துள்ளன. இதை தடுக்க கருணாநிதி நடவடிக்கை எடுக்கவில்லை.
தமிழகத்தை ஒரு ரவுடிக்கும்பல் அடக்கி ஆள்கிறது. எங்கும் ஊழல், எதிலும் ஊழல் என்பது கருணாநிதியின் தாரக மந்திரம். தமிழகத்தின் கடன், 1 லட்சம் கோடி ரூபாய். கருணாநிதி குடும்பத்தினர் ஸ்பெக்ட்ரத்தில் மட்டும் அடித்த கொள்ளை, 1 லட்சத்து 80 ஆயிரம் கோடி ரூபாய். அவரது குடும்ப தொலைக்காட்சிகள் அனைத்தும் இந்த ஊழல் பணத்தில் தான் ஆரம்பிக்கப்பட்டுள்ளன. இந்த பணம், அரசுக்கு கிடைத்திருந்தால், நாடு வளம் பெற்றிருக்கும். ஒரு குடும்பத்திற்காக ஏழு கோடி குடும்பம் அவஸ்தைப்பட வேண்டுமா?
நெசவுத்தொழில், மீன்பிடித்தொழில் பாதிக்கப்பட்டுள்ளது. விளைப்பொருட்களுக்கு விலை கிடைக்காமல் விவசாயிகள் அவதிப்படுகின்றனர். அதுபோல், திரைப்படத்துறை, ரியல் எஸ்டேட் துறையும் கருணாநிதி குடும்பத்தினரால் ஆக்கிரமிக்கப்பட்டுள்ளன. இந்த தேர்தலை பயன்படுத்தி, கருணாநிதியை குடும்பத்தோடு விரட்டியடிக்க வேண்டும். வாக்காளர்கள் ஓட்டுப் போடுவதற்காக வீட்டை விட்டுவெளியே வரவேண்டும். தமிழகத்தின் ஜனநாயக கடமையாற்ற ஓட்டளிக்க வரவேண்டும். இந்த தொகுதியில் உள்ள பிரச்னைகளையும் அறிவேன்.
திருநெல்வேலி தொகுதியில் மானூரை தலைமையிடமாக கொண்டு தாலுகா அலுவலகம் மற்றும் பத்திரப்பதிவு அலுவலம் ஏற்படுத்தப்படும். தச்சநல்லூரில் ரயில்வே மேம்பாலம் அமைக்க நடவடிக்கை எடுக்கப்படும். திருநெல்வேலியில் புறவழிச்சாலை அமைக்கப்படும். நெல்லை - தூத்துக்குடி நகர்களை இணைக்கும் வகையில், புறவழிச்சாலை அமைக்கப்படும். தாமிரபரணி நதியின் நீர்ஆதாரத்தை பாதுகாக்கும் வகையில், மணல் அள்ளுவதை தடுக்க நடவடிக்கை எடுக்கப்படும்.
மதுரை மேலூரில் தாசில்தார் மற்றும் தேர்தல் பணியில் ஈடுபட்ட ஊழியர்களை அழகிரியின் ஆட்கள் தாக்கியுள்ளனர். இதை நான் வன்மையாக கண்டிக்கிறேன். அரசு ஊழியர்களை தாக்கியவர்கள் மீது கடுமையான நடவடிக்கை எடுக்கவேண்டும் என, தேர்தல் கமிஷனை வலியுறுத்தி கேட்டுக்கொள்கிறேன். இவ்வாறு ஜெயலலிதா பேசினார்.





தினமலர்.