தமிழ் இனத்தை அழித்தவர் கருணாநிதி : ஒட்டன்சத்திரத்தில் விஜயகாந்த் பேச்சு

ஒட்டன்சத்திரம் : ""தமிழ் இனத்தை அழித்தவர் தமிழினத் தலைவர் கருணாநிதி,'' என, ஒட்டன்சத்திரத்தில் நடந்த தேர்தல் பிரசார கூட்டத்தில், தே.மு.தி.க., தலைவர் விஜயகாந்த் பேசினார். திண்டுக்கல் மாவட்டம், ஒட்டன்சத்திரத்தில் அ.தி.மு.க., வேட்பாளர் பாலசுப்பிரமணிக்கு ஆதரவாக ஓட்டு கேட்டு அவர் பேசியதாவது: கருணாநிதி சொல்வது போல் எமர்ஜென்சி எதுவுமே இல்லை. அரசு ஊழியர்கள் தங்களுடைய வேலையை செய்கின்றனர். எழுத்துரிமை, பேச்சுரிமை உள்ளது. மக்கள் நடமாடுகின்றனர்.
இதற்கு முந்தைய தேர்தலில், லயோலா கல்லூரி கருத்துக் கணிப்பு தனக்கு சாதமாக இருந்ததால் கருத்துக் கணிப்பை பார்த்தீர்களா என்று கூறிய கருணாநிதி, தற்போதைய கருத்துக் கணிப்பு குறித்து பேச மறுப்பதேன்? கருணாநிதியின் உயிர் என்ன, ஏழுமலை தாண்டியா உள்ளது? அவரும் நம்மைப் போல் தான். அவருக்கு மட்டும் போலீஸ் பாதுகாப்பு வேண்டும் என்கிறார். எனக்கும் தான் ஒரு லட்சம் பேர் கூடுகின்றனர்; இங்கு ஒரு போலீஸ் கூட இல்லை.
இரண்டு ஏக்கர் நிலம் தருகிறேன் என்று கூறியவர், தரவே இல்லை. ஏனென்றால், அவருடைய அமைச்சர்கள் அனைவரும் கொள்ளையடித்து, 1,000 ஏக்கர் நிலம் வைத்துள்ளனர். ஆறாவது முறை முதல்வராக வேண்டும் என்று ஆசைப்படும் கருணாநிதி, அமைச்சர்கள் சம்பாதித்து வைத்த சொத்தை எடுத்து, பொதுமக்களுக்கு கொடுக்கட்டும். மக்களை ஏமாற்ற எமர்ஜென்சி பற்றி பேசும் கருணாநிதி, விலைவாசி உயர்வு குறித்து இதுவரை வாய் திறக்காதது ஏன்?
ஒரு ரூபாய்க்கு அரிசி போட்டால் மட்டும் போதுமா? அதை ஆக்கி திங்க பருப்பு என்ன விலைக்கு விற்கிறது! தமிழ் இனத்தை அழித்தவர், தமிழினத் தலைவர் கருணாநிதி. கருணாநிதி மஞ்சள் துண்டும், கையில் சிவப்பு மோதிரமும் அணிந்திருப்பதன் காரணம் குறித்து, கடந்த நான்கு ஆண்டுகளாக கேட்கிறேன்... இதுவரை பதில் இல்லை. இவ்வாறு விஜயகாந்த் பேசினார்.



தினமலர்.