நல்லாட்சி தொடர ஓட்டளியுங்கள் : தி.மு.க., தலைவர் கருணாநிதி உருக்கம்

தர்மபுரி:""தமிழகத்தில் மீண்டும் நல்லாட்சி அமைய தி.மு.க., கூட்டணிக்கு வாக்காளர்கள் ஆதரவு தாருங்கள்,'' என, தி.மு.க., தலைவர் கருணாநிதி, பொதுமக்களிடம் உருக்கமாக கேட்டு கொண்டார்.
தர்மபுரி மாவட்டத்தில் தி.மு.க., கூட்டணி வேட்பாளர்களை ஆதரித்து, தொப்பூர், குண்டலப்பட்டி, காரிமங்கலம் ஆகிய பகுதிகளில் தி.மு.க., தலைவர் கருணாநிதி பேசினார்.
தொப்பூரில் அவர் பேசியதாவது:தமிழகத்தில் மீண்டும் நல்லாட்சி மலர்ந்திடவும், சாதனைகள் தொடரவும், தி.மு.க., கூட்டணி வேட்பாளர்களை அதிக ஓட்டு வித்தியாசத்தில் வெற்றி பெறச் செய்ய, வாக்காளர்கள் உதவ வேண்டும். தர்மபுரி பா.ம.க., வேட்பாளர் சாந்தமூர்த்திக்கு, மாம்பழம் சின்னத்திலும், பென்னாகரம் வேட்பாளர் இன்பசேகரனுக்கு, உதயசூரியன் சின்னத்திலும் வாக்காளர்கள் ஓட்டுபோட்டு வெற்றி பெற செய்ய வேண்டும். வாக்காளர்கள் தி.மு.க., ஆட்சியின் திட்டங்கள் மற்றும் சாதனைகளை நினைத்து பார்த்து, மீண்டும் தி.மு.க., கூட்டணியை வெற்றி பெற செய்ய வேண்டும். இவ்வாறு கருணாநிதி பேசினார்.
சேலத்திலிருந்து வந்த முதல்வர் கருணாநிதிக்கு, தர்மபுரி எல்லையான தொப்பூரில், வடக்கு மாவட்ட தி.மு.க., சார்பிலும், குண்டலப்பட்டி பகுதியில் தி.மு.க., தெற்கு மாவட்டம் சார்பிலும் வரவேற்பு அளிக்கப்பட்டது.
* கொடி பிடித்த சிறுவர்கள்: தொப்பூர் பகுதியில், சேலம் - தர்மபுரி சாலையில் தி.மு.க., தலைவர் கருணாநிதியை வரவேற்க, காலை 8 மணி முதல் கொடியுடன் காத்திருந்த தொண்டர்களில், 26 பேர், சிறுவர்கள். "கொடி பிடிக்க ஒருவருக்கு 20 ரூபாய் தருவதாக கட்சியினர் கூறியதால் கொடி பிடித்தோம்' என, சிறுவன் ஒருவன் தெரிவித்தான்.
தி.மு.க., தலைவர் கருணாநிதியை வரவேற்க, தொப்பூருக்கு ஐந்து சரக்கு ஆட்டோக்களில் தொண்டர்கள் அழைத்து வரப்பட்டனர். அடிக்கடி விபத்துக்கள் நடக்கும் தொப்பூர் வளைவுப்பாதையில் ஆபத்தான பயணம் செய்தவர்களை, போலீஸ் உயர் அதிகாரிகள் கண்டுகொள்ளவில்லை.
முல்லைவேந்தனிடம் ரகசிய பேச்சு: குண்டலப்பட்டி பகுதியில் பாப்பிரெட்டிப்பட்டி தொகுதி வேட்பாளர் முல்லைவேந்தன், பாலக்கோடு பா.ம.க., வேட்பாளர் செல்வம், அரூர் (தனி) வேட்பாளர் நந்தன் ஆகியோருக்கு ஆதரவு திரட்டி பேசிய தி.மு.க., தலைவர் கருணாநிதி, திடீரென முல்லைவேந்தனை காருக்கு அருகில் அழைத்து, அவரிடம், மூன்று நிமிடம் ரகசியமாக பேசினார். பாப்பிரெட்டிப்பட்டியில் போட்டியிடும் வேட்பாளர் வேலுவை பற்றி பேசியதாக, கட்சியினர் கூறுகின்றனர்.



தினமலர்.