தமிழ்நாட்டின் மக்கள் தொகை 7 கோடியே 21 லட்சத்து 38 ஆயிரத்து 958

2011-ம் ஆண்டிற்கான மக்கள் தொகை கணக்கெடுப்பு வெளியிடப்பட்டது. தமிழகத்தின் மக்கள் தொகை 7 கோடியே 21 லட்சத்து 38 ஆயிரத்து 858 ஆக உள்ளது.

7 கோடி

ஒவ்வொரு 10 ஆண்டுகளுக்கும் ஒருமுறை மக்கள் தொகை கணக்கெடுப்பு பணி நடைபெற்று வருகிறது. 2011-ம் ஆண்டிற்கான கணக்கெடுப்பு முடிவுகளை மக்கள் தொகை கணக்கெடுப்பு இயக்குனர் கோபாலகிருஷ்ணன் சென்னையில் நேற்று வெளியிட்டார். அந்த முடிவுகளின் விவரங்கள் வருமாறு:-

சென்சஸ் கணக்கெடுப்பின் முதல் கட்டப்பணியான வீடுகள் கணக்கெடுப்பு ஜுன் முதல் ஜுலை 15 வரை தமிழ்நாட்டில் நடைபெற்றது. இரண்டாம் கட்டப்பணியான மக்கள் தொகை கணக்கெடுப்பானது நாடு முழுவதும் 2011 பிப்ரவரி 9 முதல் 28 வரை நடைபெற்றது. மார்ச் முதல் கணக்கெடுப்பு முடிவு பெற்றது.

இந்தியாவின் உத்தேச மக்கள் தொகை 1,21,01,93,422. அவர்களில் 62,37,24,248 ஆண்களும், 58,64,69,174 பெண்களும் அடங்குவார்கள். அதே நேரத்தில் தமிழ்நாட்டின் உத்தேச மக்கள் தொகை 7 கோடியே 21 லட்சத்து 38 ஆயிரத்து 958 பேர். இதில் ஆண்கள் 3 கோடியே 61 லட்சத்து 58 ஆயிரத்து 871 பேரும், பெண்கள் 3 கோடியே 59 லட்சத்து 80 ஆயிரத்து 87 பேர் உள்ளனர்.

குழந்தைகள் எண்ணிக்கை குறைவு

இந்திய மொத்த மக்கள் தொகையில் 5.96 சதவீதம் தமிழ்நாட்டின் மக்கள் தொகையாகும். இந்தியாவில் மக்கள் தொகை அதிகம் கொண்ட மாநிலங்களின் தர வரிசையில் 7-வது இடத்தில் தமிழகம் இருக்கிறது. 10 ஆண்டுகால தமிழக மக்கள் தொகை வளர்ச்சியானது 1991-2001-ல் 11.70 ஆக இருந்தது. தற்போது 2001-2011 கணக்கெடுப்பில் 15.60 சதவீதமாக உயர்ந்து இருக்கிறது. அதாவது 10 ஆண்டுகளில் மக்கள் தொகை 97 லட்சம் அதிகரித்து உள்ளது.

தமிழ்நாட்டில் பாலின விகிதமானது 2001-ல் ஆயிரம் ஆண்களுக்கு 987 பெண்கள் என்று இருந்தது. 2011-ல் ஆயிரம் ஆண்கள் என்றால் 995 பெண்கள் என்று உயர்ந்து இருக்கிறது.

குழந்தைகள் (0-6) விகிதத்தை பொறுத்தவரையில் 2001 கணக்கெடுப்பு படி ஆயிரம் ஆண் குழந்தைகள் என்ற விகிதத்தில் 942 பெண்கள் குழந்தைகள் என்று இருந்தது. 2011-ம் ஆண்டு கணக்கெடுப்பில் ஆயிரம் ஆண் குழந்தைகள் என்ற போது 946 பெண் குழந்தைகள் என்று அதிகரித்து இருக்கிறது.

தமிழ்நாட்டில் 0-6 வயதிற்கு உட்பட்ட குழந்தைகளின் மக்கள் தொகையானது 2001-ல் 72 லட்சத்து 35 ஆயிரத்து 160 ஆக இருந்தது. அதாவது 11.59 சதவீதமாக இருந்தது. தற்போது 2011 கணக்கெடுப்பில் 68 லட்சத்து 94 ஆயிரத்து 821 (9.56 சதவீதமாக) குறைந்து இருக்கிறது.

படிப்பறிவு

குழந்தைகளின் பாலின விகிதமானது 2011-ல் 946 ஆக உள்ளது. இதில் ஆண் குழந்தைகள் 35 லட்சத்து 42 ஆயிரத்து 351 பேரும், பெண் குழந்தைகள் 33 லட்சத்து 52 ஆயிரத்து 240 பேரும் உள்ளனர்.

தமிழ்நாட்டின் மக்கள் தொகை கணக்கெடுப்பின்படி தமிழ்நாட்டின் மக்கள் தொகை அடர்த்தியானது ஒரு சதுர கி.மீட்டருக்கு 555 நபர்கள் இருக்கிறார்கள். 2001-ல் 480 பேராக இருந்தது.

எழுத்தறிவு விகிதம் தமிழ்நாட்டில் 2011-ல் 80.33 சதவீதமாக உயர்ந்து இருக்கிறது. அதுவே 2001-ல் 73.45 ஆக இருந்தது. ஆண்களில் 86.81 சதவீதம் எழுத்தறிவு பெற்றவர் ஆவார்கள். பெண்கள் 73.86 சதவீதம்.

நீலகிரியில் குறைவு

மிக குறைந்த மக்கள் தொகை கொண்ட மாவட்டமாக நீலகிரி விளங்குகிறது. இங்கு 2001-ம் ஆண்டு மக்கள் தொகை 7 லட்சத்து 62 ஆயிரத்து 141 (7.3 சதவீதமாக) இருந்தது. தற்போது 2011-ம் ஆண்டுக்கணக்கெடுப்பு படி 7 லட்சத்து 35 ஆயிரத்து 71 (-3.6 சதவீதமாக) உள்ளது. மக்கள் அடர்த்தி 299-ல் இருந்து 288 ஆக குறைந்துள்ளது. குழந்தைகளின் எண்ணிக்கையும் 85 ஆயிரத்து 860-ல் இருந்து 61 ஆயிரத்து 644 ஆக குறைந்துள்ளது. இதில் ஆண் குழந்தைகள் 31 ஆயிரத்து 99 பேரும், பெண் குழந்தைகள் 30 ஆயிரத்து 545 ஆகவும் இருக்கிறது.

4 மாவட்டங்களில் மக்கள் தொகை அதிகரிப்பு

2011-ம் ஆண்டு மக்கள் தொகை கணக்கெடுப்பின் முடிவுப்படி திருவள்ளூர், விழுப்புரம், மதுரை, கடலூரில் அதிகப்பட்சமாக கடந்த 10 ஆண்டுகளில் 4 லட்சத்திற்கும் அதிகமாக மக்கள் தொகை அதிகரித்து இருக்கிறது.

திருவள்ளூரில் 2001-ம் ஆண்டு கணக்கெடுப்பின் படி 27 லட்சத்து 54 ஆயிரத்து 756 பேர் இருந்தனர். தற்போது கணக்கெடுப்பின்படி, 37 லட்சத்து 25 ஆயிரத்து 697 பேர் உள்ளனர். இது 23.1 சதவீதத்தில் இருந்து 35.2 சதவீதமாக அதிகரித்து இருக்கிறது.

மதுரையில் 2001-ம் ஆண்டு கணக்கெடுப்பின்படி, 25 லட்சத்து 78 ஆயிரத்து 201 பேர் இருந்தனர். தற்போது கணக்கெடுப்பின்படி, 30 லட்சத்து 41 ஆயிரத்து 38 ஆக உள்ளது. இது 7.4 சதவீதத்தில் இருந்து 18 சதவீதமாக உயர்ந்து இருக்கிறது.

இதே போல் கடலூரில் மக்கள் தொகை 7.7 சதவீதத்தில் இருந்து 13.8 ஆகவும், விழுப்புரத்தில் 7.4 சதவீதத்தில் இருந்து 17 சதவீதமாகவும் மக்கள் தொகை அதிகரித்து இருக்கிறது.

மக்களின் இட மாற்றம் காரணமாக மக்கள் தொகை அதிகரித்து இருப்பத1க கணக்கீட்டாளர்கள் தெரிவித்தனர்.

ithula en panku ondru ,,,,