மும்பை கிரிக்கெட் மைதானத்தில் போலீசார், தரை, கடல், வான்வழிகள் தீவிர கண்காணிப்பு

பலத்த எதிர்பார்ப்பை ஏற்படுத்தியுள்ள உலகக்கோப்பை கிரிக்கெட் இறுதிப்போட்டி இன்று நடக்கிறது. போட்டி நடைபெறுகிற வான்கடே மைதானம் மும்பை போலீசின் பாதுகாப்பு வளையத்தின் கீழ் வந்தது. தரை, கடல், வான்வழிகள் தீவிர கண்காணிப்புக்கு உட்படுத்தப்பட்டுள்ளன.

இறுதிப்போட்டி

பெரும் எதிர்பார்ப்பையும், பரபரப்பையும் ஏற்படுத்தி விட்டிருக்கிற உலகக்கோப்பை கிரிக்கெட் போட்டியின் இறுதி ஆட்டம், இந்திய-இலங்கை அணிகள் இடையே இன்று மதியம் 2.30 மணிக்கு மும்பை வான்கடே மைதானத்தில் நடக்கிறது. 33 ஆயிரத்து 317 பேர் அமர்ந்து பார்க்கத்தக்க இருக்கை வசதியை இந்த மைதானம் கொண்டுள்ளது.

இந்தப் போட்டியை இந்திய ஜனாதிபதி பிரதீபா பட்டீல், இலங்கை அதிபர் ராஜபக்சே, மராட்டிய முதல்-மந்திரி பிரதிவிராஜ் சவான், சர்வதேச கிரிக்கெட் கவுன்சிலின் தலைவரும், மத்திய மந்திரியுமான சரத் பவார் உள்ளிட்ட வி.வி.ஐ.பி.க்கள் நேரில் கண்டுகளிக்கின்றனர்.

மும்பை போலீஸ்வசம் மைதானம்

உலகக்கோப்பை இறுதிப்போட்டியின்போது, தீவிரவாதிகள் ரசாயனக்குண்டு வீசக்கூடும் என்ற அச்சுறுத்தலின் காரணமாக முன் எப்போதும் இல்லாத அளவுக்கு மும்பை வான்கடே மைதானத்தினுள்ளும், வெளியேயும் கோட்டைபோல பாதுகாப்பு பலப்படுத்தப்பட்டுள்ளது.

மைதானம் நேற்றே மும்பை போலீசின் பாதுகாப்பு வளையத்தின்கீழ் வந்து விட்டது. போலீஸ் அனுமதியின்றி யாரும் மைதானத்தில் நுழைந்து விட முடியாது. மும்பை மாநகர போலீசாருடன் தேசிய பாதுகாப்புபடை கமாண்டோக்கள், மராட்டியத்தின் கமாண்டோ படை, அதிவிரைவு பதிலடிபடை, அதிரடிப்படை, மாநில ஆயுதப்படை வீரர்கள் குவிக்கப்பட்டு, தீவிர கண்காணிப்பு பணியில் ஈடுபடுத்தப்பட்டுள்ளனர்.

போலீஸ் கமிஷனர் பேட்டி

இதுதொடர்பாக மும்பை போலீஸ் கமிஷனர் அருப் பட்நாயக் கூறியதாவது:-

மும்பை இதுவரை முன் எப்போதும் கண்டிராத வகையில் வான்கடே மைதான பாதுகாப்பில் சுமார் 5 ஆயிரம் போலீசார் குவிக்கப்பட்டுள்ளனர். இதுவரை இப்படி ஒரு பாதுகாப்பை என் பணிநாளில் நான் கண்டதில்லை. பாதுகாப்பு படையினர், மைதான ஊழியர்கள், போட்டி அமைப்பாளர்கள் அனைவருக்கும் மைதானத்தினுள் செல்வதற்காக பயோமெட்ரிக் கார்டுகள் வழங்கப்பட்டுள்ளன.

ரசிகர்களுக்கு மூன்றடுக்கு சோதனை நடைபெறும். எனவே போட்டி தொடஙகுவதற்கு 3 மணி நேரம் முன்னதாகவே (சுமார் 11.30 மணிக்கு) ரசிகர்கள் மைதானத்துக்கு வந்து விடுவது நல்லது. அனைத்து வாயில்களும் 5 மணிக்கு மூடப்பட்டு விடும்.

வீரர்களுக்க பாதுகாப்பு

`கேட்வே ஆப் இந்தியா'வின் அருகில் அமைந்துள்ள தாஜ்மகால் ஓட்டலில் இரு நாட்டு வீரர்களும் தங்கி உள்ளனர். அவர்களது பாதுகாப்புக்கு சிறப்பு ஏற்பாடுகள் செய்யப்பட்டுள்ளன.

ஆன்லைன் வழியே டிக்கெட் வாங்கியவர்கள், வெளிநாட்டினர் சோதனைக்கு உட்படுத்தப்பட்டுள்ளனர். எல்லா டிக்கெட்களும் விற்கப்பட்டு விட்டன. தேவையின்றி மைதானத்துக்கு வெளியே மக்கள் கூடக்கூடாது என கேட்டுக்கொள்கிறேன். போலீசுடன் அனைவரும் ஒத்துழைக்க வேண்டும். நாக்பூர், பெங்களூர், மொகாலியில் நடைபெற்றது போன்ற தடியடி சம்பவங்கள் மீண்டும் நடக்கக்கூடாது என்று விரும்புகிறோம்.

இவ்வாறு அவர் கூறினார்.

விமானங்கள் பறக்கவும் தடை

போலீஸ் அதிகாரிகள் மேலும் கூறுகையில், "விமான எதிர்ப்பு பீரங்கிகள் தயார் நிலையில் வைக்கப்பட்டுள்ளன. மும்பை அருகில் உள்ள விமானப்படை தளங்கள், கடற்படை தளம், கடலோரக்காவல் படை தளம் ஆகியன உச்சக்கட்ட உஷார் நிலையில் வைக்கப்பட்டுள்ளன. தரை, கடல், வான் வழிகள் என மூன்றடுக்கு கண்காணிப்பு ஏற்பாடு செய்யப்பட்டுள்ளது. கிரிக்கெட் மைதானம் அமைந்துள்ள வான்வழியில் விமானங்கள் பறக்கவும் தடை விதிக்கப்பட்டுள்ளது'' என்றார்.

அடேங்கப்பா... இவ்வளவு பாதுகாப்பா...?

அபப்டின்னா நான் ஸ்டேடியம் போகலைப்பா... வீட்டில் இருந்தே கண்டு களிக்கிறேன்..!

அன்பு நன்றிகள் செய்தி பகிர்வுக்கு சிவா.... இந்திய அணி வெல்லனும் பகவானே...

அப்ப லீவா கலை உனக்கு இன்று? மாட்ச் பார்த்துக்கிட்டு இருக்கியா? எஞ்ஜாய்ப்பா இந்திய அணி வெல்ல வேண்டிக்கோ கலை.....