காணாமல் போகும் கிராமங்கள்!

சுனாமியில் ஜப்பான் நகரங்கள் அழிந்ததுபோல், சத்தமில்லாமல் நம்ம ஊர் கிராமங்களும் கடலுக்கு இரையாகிக் கொண்டிருக்கும் செய்தி கேள்விப்பட்டுள்ளீர்களா?.

அவை பாண்டிச்சேரி அருகில் இருந்தாலும், விழுப்புரம் மாவட்ட எல்லைக்குள் வருகின்றன. முதலில் சின்ன முதலியார்சாவடி. திருவொற்றியூர், சீனிவாசபுரம், தேவனாம்பட்டினம், உவரி என கபல் அரிப்பால் கரைந்து கொண்டிருக்கிற ஊர்களின் பட்டியலில் இப்போது சின்ன முதலியார் சாவடி. கிராமத்தைத் தொட்டவுடன் நம் கண்களில் படுவது, ஊரையே முழ்கடித்துவிடும் ஆவேசத்தில் மிக அருகில் ஆர்ப்பரிக்கிற கடல்தான்.

ஊரின் கடைக்கோடியில் இருந்த வீடுகள் அனைத்தும் சிதிலமாகிக் கிடக்கின்றன. பாதி நிர்மூலமாகிவிட்ட வீட்டுக்குள் உட்கார்ந்து ஒரு பெரியவர் சகஜமாக சாப்பிட்டுக்கொண்டிருந்தார். "உங்க வீடு எங்கே?' என சிலரிடம் கேட்டால் கடலை நோக்கி கைகாட்டுகிறார்கள். கடந்த மூன்று வருடங்களுக்குள் இவர்களின் வீடுகள் கடலுக்குள் போய்விட்டன. காரணம் கடல் அரிப்பு! கடல் அலைகள் இங்கே 160 வீடுகளைக் கலைத்துப்போட்டுவிட்டதாம். மொத்தத்தில் இந்த ஊர் வேகமாக கடலுக்குள் காணாமல் போய்க்கொண்டிருக்கிறது.

ராஜேந்திரன் என்ற மீனவரிடம் பேசினோம். "ரெண்டு வருஷத்துக்கு முன்னால் எங்க ஊர்லருந்து கடல் 100 மீட்டர் தொலைவில் இருந்துச்சு. இப்போ உள்ளே வந்து, வீடுகளை அடிச்சு, இன்னும் வேகமா நெருங்கிட்டிருக்கு, அலைகளின் சீற்றம் அதிகமா இருக்கிற மழைக்காலங்கள்லதான் கடல் வீடுகளை அடிச்சுட்டுப் போயிடுற சேதாரம் அதிகம் நடக்குது' என்று சோகத்துடன் சொல்கிறார்.

கடலின் அடுத்தகட்ட தாக்குதலுக்கு வசதியான இடத்தில் பாக்கியத்தின் வீடு இருக்கிறது. "போன வருஷம் கடல் தண்ணி எதிர்வீட்டுல புகுந்ததுல வீடு திடீர்னு இடிஞ்சு விழுந்துடுச்சி. கீழே விழுந்த சுவர்களுக்கு நடுவுல என் பையன் சிக்கிக்கிட்டான். பையன் காலை அறுத்துதான் எடுக்கணுமோங்கற அளவுக்குப் பயந்துட்டோம். காயம் ஆறி அவன் வேலைக்கு போக ரெண்டு மாசம் ஆச்சு' என்கிறார் பாக்கியம்.

அருகிலுள்ள தந்திராயன்குப்பம், பொம்மையார்பாளையம் ஆகிய கடலோரக் கிராமங்களையும் கடல் வேகமாக விழுங்கிவருகிறது. இவற்றில் தந்திராயன் குப்பத்தில் கடலோரத்தில் இரு பக்கமும் கற்சுவர் எழுப்பி, தூண்டில் வளைவு அமைக்கப் பட்டுள்ளதால் கடல் அரிப்பு கொஞ்சம் மட்டுப்படுத்தப் பட்டுள்ளது. பக்கத்தில் உள்ள கிராமத்தில் தூண்டில்வளைவு அமைக்கப்பட்டால், அண்மைக் கிராமங்களை நோக்கி கடல் நீரோட்டம் திரும்பி, அங்கே கடல் அரிப்பு அதிகமாகும் என்பது இன்னொரு வேதனை.

கடல் அரிப்பால் காணாமல் போகும் இந்தக் கிராமங்களைப் பற்றி ஐ.டி. ஊழியரும் சமூகச் செயல்பாட்டாளருமான அருணபாரதி "வெப்பம்' என்ற ஆவணப்படம் எடுத்து வருகிறார். அவர் சொல்லும் தகவல்கள் உணர்த்தும் ஒரே செய்தி, "நிலைமை கைமீறிப் போகிறது!' கடல் அரிப்பை மீனவர்களின் பிரச்னையாவே பலர் பார்க்குறாங்க. அது மொத்த தமிழகத்துக்கான பிரச்னை. மீனவ கிராமங்களை விழுங்கிட்டு, கடல் ஊருக்குள்ளதானே வந்தாகணும்? 1989-ல் புதுச்சேரியில் கடலின் இயற்கை நீரோட்டத்தை மறிச்சு கட்டப்பட்ட மீன்பிடித்துறைமுகம் இந்தக் கடல் அரிப்புக்கு முதல் காரணம். இதுபோன்ற உள்ளூர்ப் பிரச்னைகளைவிட முக்கியக் காரணம் புவிவெப்பமயமாதல்.

பூமியின் வெப்பம் கூடிட்டே போறதால, உலகம் முழுக்க பல பனிமலைகள் உருகிட்டிருக்கு. அதனால் கடல்களின் நீர்மட்டம் அதிகரிச்சுட்டே இருக்கு. இந்தியாவின் நீண்ட கடலோர மாவட்டங்களைக் கொண்ட மூன்றாவது பெரிய மாநிலம் தமிழகம்தான். அதனால் கடல் மட்ட உயர்வால் தமிழகத்தில் பாதிப்புகள் அதிகமாகவே இருக்கும்.

கடலோரத்தில் கட்டப்பட்டிருக்குற கல்பாக்கம் அணு உலை, கூடங்குளம் அணுமின் நிலையம் போன்றவை கடல் மட்ட உயர்வால் பாதிக்கப்பட்டால், இப்போ ஜப்பானுக்கு ஏற்பட்ட பயங்கரம் நம்மூரில் நடக்காதுன்னு அரசால் உறுதியாகச் சொல்ல முடியுமா? என்று கேட்கிறார் பாரதி.

கேள்வி சரிதான். பதில் யார் தருவார்?

- ஆனந்த் செல்லையா
குமுதம்