சுற்றுலாத் தளம்: வாகமன்

**சிவா** · **சிவா** Wed Mar 30, 2011 12:06 am

வாகமன். கேரளாவிலுள்ள இடுக்கி மாவட்டத்தில் இருக்கிறது. "அடடா மழைடா அட மழைடா....' "கிரீடம்' படத்தில் "அக்கம் பக்கம்...' போன் பாடல்கள் படமாக்கப்பட்டது இங்குதான். கடல் மட்டத்திலிருந்த 1100 அடி உயரத்தில் உள்ளது வாகமன். தமிழ்நாட்டிலிருந்து குமுளி வழியாகவும் வாகமனுக்கு வரலாம்.

கோட்டயம் தாண்டி பாலா என்ற ஊர் அருகே உள்ளது வாகமன் புல்வெளி. மலைப்பகுதியில் பஸ் ஏறும் போது மனது கொண்டாடத் துவங்கி விட்டது. பரந்து விரிந்த மலைக்குன்றுகள், பச்சைப்பசேல் பாறைகள் மனசுக்கு இதம் தருகின்றன.

இடுக்கி மாவட்டம் என்பதால் முக்கால்வாசிப்பேர் தமிழர்கள்தான். பல்லாண்டுகளுக்கு முன்பு தேயிலைத்தோட்ட வேலைக்காக இங்கே வந்தவர்கள் இங்கேயே செட்டிலாகிவிட்டார்கள். அதனால் தமிழர்களுக்கு மொழிப் பிரச்னையில்லை. ஊட்டி, கொடைக்கானல் போல "சைட் சீயிங்' விஷயங்கள் ஏராளம் உள்ளன.

வாகமன் மிடோஸ், குட்டியாறு அணைக்கட்டு, சூசைட் பாயிண்ட், குருசுமலை, பைன் பாரஸ்ட், தங்கல் பாறை, முருகன் ஹில்ஸ், வனவிலங்கு சரணாலயம் என பார்ப்பதற்கு பல இடங்கள் உள்ளன. பைன் ஃபாரஸ்ட்டில் நேர்த்தியாக வளர்க்கப்பட்டிருக்கும் பைன் மரங்கள் ஒரு ஆச்சர்யம்தான். "பேராண்மை' படத்தின் பெரும்பாலான காட்சிகள் இங்கே தான் படமாக்கப்பட்டது என்கிறார்கள்.

சூசைட் பாயின்ட்டில் நின்று கீழே பார்த்த போது நமக்கு தலை சுற்றியது. எந்த வித பாதுகாப்பு வேலியும் இன்றி இயற்கையாகவே இப்பகுதி உள்ளது. சுய கவனமுடன், கட்டுப்பாட்டுடன் இப்பகுதியை ரசிப்பது நல்லது.

இங்குள்ள குருசு மலை புனித செபாஸ்டின் சர்ச் நிர்வாகத்தின் கீழ் ஆஸ்திரேலிய பசுக்கள் வளர்க்கப்பட்டு இப்பகுதி முழுமைக்கும் பால் சப்ளை செய்யப்படுகிறது. மலையுச்சியில் சிலுவை அமைக்கப்பட்டுள்ளது. புனித தோமையார் வருகைதந்த இடம் இது என்பதால் இந்த இடத்தை மிகவும் புனித இடமாக கிறிஸ்தவர்கள் வணங்குகிறார்கள்.

இப்போதுதான் பிரபலமாகி வருவதால் சுமார் 30 ரிசார்ட்டுகள்தான் இங்கு உள்ளன. லாட்ஜுகளில் 300 ரூபாய்க்கு ரூம் கிடைக்கும். ரிசார்ட்டுகள் 700 முதல் 15000 ரூபாய் வாடகைக்கு கிடைக்கிறது.

இன்னொரு விஷேசம் என்ன தெரியுமா?

இங்கே ஏப்ரல் மாதத்தில் நடைபெறும் பாராகிளைடிங். தெற்காசியாவிலேயே ஒரே நேரத்தில் 75 கிளைடர்கள் பறப்பது இங்குதானாம். பாராகிளைடில் கிளப் ஆண்டுதோறும் இந்த சாகச நிகழ்ச்சியை நடத்தி வருகிறது. அப்போது சுற்றுலாப் பயணிகளின் வருகை அதிகமாக இருக்கும்.

தென்றல் காற்று, கண்ணுக்கு தென்படும் இடமெல்லாம் பச்சைப்பசேல் புல்வெளிகள் என பூலோக சொர்க்கத்தில் சுற்றி வந்த உணர்வே நமக்கு ஏற்பட்டது. இந்த கோடை விடுமுறைக்கு வாகமனுக்குச் செல்ல தயாராகிவிட்டீர்கள்தானே...!

எப்படிப் போகலாம்?

கேரளாவின் கோட்டயம் ரயில் நிலையத்தில் இருந்து 70 கி.மீ. தொலைவில் உள்ளது. குமுளியில் இருந்து 63 கி.மீ. தொலைவில் உள்ளது.

-குமுதம்