நண்பர்களுக்காக எஸ்.எஸ்.எல்.சி. தேர்வில் ஆள்மாறாட்டம்: பிளஸ்-1 மாணவர்கள் 2 பேர் பிடிபட்டனர்

நண்பர்களுக்காக ஆள்மாறாட்டம் செய்து எஸ்.எஸ்.எல்.சி. தேர்வு எழுதிய பிளஸ்-1 மாணவர்கள் 2 பேர் பிடிபட்டனர்.

ஆள் மாறாட்டம்

எஸ்.எஸ்.எல்.சி. பொதுத்தேர்வுகள் நேற்று தொடங்கியது. நேற்று தமிழ் முதல் தாள் பரீட்சை நடந்தது. ராமநாதபுரம் மாவட்டம் பரமக்குடி கீழமுஸ்லிம் மேல்நிலைப்பள்ளி தேர்வு மையத்தில் முதுகுளத்தூரை சேர்ந்த ராஜ்குமார் என்ற தனித்தேர்வு மாணவருக்கு பதிலாக முதுகுளத்தூர் அரசு மேல்நிலைப்பள்ளியில் 11-ம் வகுப்பு படித்து வரும் வேறு ஒரு மாணவர் தேர்வு எழுதிக் கொண்டு இருந்தார்.

அப்போது அங்கு வந்த பறக்கும் படையினர் ஆள்மாறாட்டம் நடந்ததை கண்டுபிடித்து அந்த மாணவரை அந்தப்பள்ளி தலைமை ஆசிரியர் அஜ்மல்கானிடம் பறக்கும் படையினர் ஒப்படைத்தனர்.

ரூ3 ஆயிரம்

விசாரணையில் அந்த மாணவர் கூறும் போது, ``நானும் ராஜ்குமாரும் நண்பர்கள். 10-ம் வகுப்பு தேர்வில் 440 மதிப்பெண் பெற்று 11-ம் வகுப்பு படித்து வருகிறேன். ராஜ்குமார் ரூ.3 ஆயிரம் தருவதாக கூறியதால் தேர்வு எழுதினேன். பறக்கும் படையில் உள்ள ஆசிரியர் எனது பள்ளியை சேர்ந்தவர் என்பதால் என்னை கண்டு பிடித்துவிட்டார்'' என்றார்.

இதுகுறித்து தலைமை ஆசிரியர் அஜ்மல்கான் பரமக்குடி நகர் போலீஸ் நிலையத்திற்கு தகவல் தெரிவித்தார். அப்போது அந்த மாணவர் அங்கிருந்து தப்பி ஓட முயன்றார். அவரை மடக்கி பிடித்த ஆசிரியர்கள் பள்ளி அறையில் அடைத்தனர். பின்னர் பெண் போலீஸ் ஒருவர் பள்ளிக்கு வந்து அந்த மாணவரை பிடித்து ஆட்டோவில் போலீஸ் நிலையத்திற்கு அழைத்து சென்றார். ஆட்டோ சிறிது தூரம் சென்ற போது அந்த மாணவர் திடீரென ஆட்டோவில் இருந்து குதித்து தப்பி ஓடினார்.

அப்போது அந்த வழியாக வந்த 108 ஆம்புலன்ஸ் பணியாளர்கள் அந்த மாணவரை வேனில் விரட்டி சென்று மடக்கி பிடித்தனர். பின்னர் பரமக்குடி நகர் போலீசில் ஒப்படைத்தனர்.

இன்னொரு மாணவர்

இதே போல பரமக்குடி அரசு ஆண்கள் மேல்நிலைப் பள்ளியில் முதுகுளத்தூரை சேர்ந்த ரகு(வயது17) என்ற தனித்தேர்வு மாணவர் தனக்கு பதிலாக முதுகுளத்தூர் பள்ளியில் 11-ம் வகுப்பு படித்து வரும் வேறு ஒரு மாணவரை தேர்வு எழுத அனுப்பி இருந்தார். தேர்வு எழுதிக்கொண்டு இருந்த போது பறக்கும்படை சோதனையில் பிடிபட்டார். இவரும் தனது நண்பருக்காக தேர்வு எழுதியதாக கூறினார். இதையடுத்து அவரும் போலீசில் ஒப்படைக்கப்பட்டார்.

சஸ்பெண்டு

பிடிபட்ட மாணவர்கள் மீது என்ன நடவடிக்கை எடுப்பீர்கள் என்று கேட்டதற்கு அரசு தேர்வுகள் இயக்குனர் தண்.வசுந்தரா தேவி கூறியதாவது:-

முதல் கட்டமாக பிடிபட்ட பிளஸ்-1 மாணவர்கள் 2பேர்களும் பள்ளிக்கூடத்தில் இருந்து தற்காலிக நீக்கம் செய்யப்படுவார்கள். இவர்களை எழுத தூண்டிய தனித்தேர்வர்கள் மீதும் நடவடிக்கை எடுக்கப்படும்.

இருதரப்பினரும் அடுத்து தேர்வு எழுதாமல் இருக்க நடவடிக்கை எடுக்கப்படும். மாணவர்கள் இப்படிப்பட்ட ஒழுங்கீனங்களில் ஈடுபடவேண்டாம். மாணவர்களுக்கு தேவை நல் ஒழுக்கம். அதற்கு பின்னர் தான் கல்வி என்பதை தெரிந்து கொள்ள வேண்டும். என்று கேட்டுக்கொள்ளப்படுகிறார்கள்.

இவ்வாறு வசுந்தரா தேவி தெரிவித்தார்.

காப்பி அடித்தவர்கள்

மேலும் நேற்று நடந்த தேர்வில் சென்னை மாவட்டத்தில் 4 பேர்களும், விழுப்புரம் மாவட்டத்தில் ஒருவரும், திண்டுக்கல்லில் 2 பேர்களும் காப்பி அடித்தபோது பிடிபட்டனர்.

ரொம்ப புத்திசாலி மாணவர்கள் போல ஏந்தான் உலகம் இப்படி போகுதோ