போலீசைத் தற்காப்பது என் கடமை: ஹிஷாமுடின்

உள்துறை அமைச்சர் ஹிஷாமுடின் உசேன் போலீசுக்காக பரிந்து பேசியிருப்பதுடன் பிகேஆர் நடப்பில் தலைவர் சம்பந்தப்பட்ட செக்ஸ் வீடியோவில் போலீசுக்கும் தொடர்புண்டு என்று கூறும் மாற்றரசுக் கட்சியினர் அதை நிரூபிக்கத் தயாரா என்றும் சவால் விடுத்துள்ளார்.

செக்ஸ் வீடியோ காண்பிக்கப்பட்டதை வைத்து, 1998-இல் அன்வாரின் முதலாவது குதப்புணர்ச்சி வழக்குக்கு முந்திய சம்பவங்கள் மீண்டும் அரங்கேறுவதாகக் கூறப்படுவதை ஹிஷாமுடின் மறுத்தார்.

“இப்போது நான் சும்மாயிருக்கப் போவதில்லை. இவ்விவகாரத்தை அவர்கள் அரசியலாக்குவதற்கு விட மாட்டேன். போலீசின் நேர்மையைத் தற்காக்கும் கடமை எனக்குண்டு”,என்று இன்று நாடாளுமன்றத்தில் நடைபெற்ற செய்தியாளர் கூட்டமொன்றில் அவர் கூறினார்.

“எனக்கும் போலீசுக்கும் களங்கத்தை உண்டுபண்ண விதம் விதமாகக் கதை கட்டப்படுகிறது. டிஎன்ஏ ஒரு சதித்திட்டமாம்.சைபுல் ஒரு சதித்திட்டமாம். (செக்ஸ்) வீடியோ ஒரு சதித்திட்டமாம்….என்னையும் போலீசையும் குற்றம் சொல்வோருக்கு சவால் விடுக்கிறேன்; அதை நிரூபிக்க முடியுமா?”

நேற்று அன்வாரின் வழக்குரைஞர் சங்கரா நாயர், செக்ஸ் வீடியோ காண்பிக்கப்பட்டதில் “போலீசும் உடந்தை”யாக இருந்திருக்கலாம் என்று தம் கட்சிக்காரர் ஊகிப்பதில் தவறில்லை என்றார்.

நேற்று அன்வார் செய்த போலீஸ் புகாரை அடிப்படையாக வைத்து அவர் கைது செய்யப்பட்டுக் குற்றம் சாட்டப்படலாம் என்றும் 1998-இல் முதலாவது குதப்புணர்ச்சி வழக்கில் அதுதான் நடந்தது என்றும் கூறினார்.

திங்கள்கிழமை கார்கோசா ஸ்ரீநெகாராவில், செய்தியாளர்களுக்கு செக்ஸ் வீடியோ திரையிடப்பட்டது போலீசுக்குத் தெரியாதிருக்காது என்றும் சங்கரா தெரிவித்தார்.

உள்துறை அமைச்சும் போலீசும் அவருக்கு எதிராக சதி செய்வதாக பலமுறை குற்றம் சுமத்தியுள்ள அன்வார்மீது சிவில் வழக்கு தொடுக்கும் சாத்தியங்களை தம் வழக்குரைஞர்கள் ஆராய்ந்து வருவதாக ஹிஷாமுடின் கூறினார்.

“எனக்காக அல்ல, போலீசின் நேர்மையையும் நல்ல பெயரையும் காக்க வேண்டும் என்பதற்காக அவர்மீது வழக்கு தொடுப்பது பற்றி ஆராய்வேன். இந்த (செக்ஸ் வீடியோ) விவகாரத்தின் உண்மையைக் கண்டறியும் விருப்பம் எங்களுக்கும் உண்டு.”

அதன் தொடர்பில் அரச விசாரணை ஆணையம் (ஆர்சிஐ) அமைக்கப்பட வேண்டும் என்று கூறப்படுவதையும் ஹிஷாமுடின் ஏற்கவில்லை.

“ஆர்சிஐ அமைப்பது என் அதிகாரத்துக்கு உட்பட்டதல்ல. நான் அதைப் பற்றி முடிவு செய்ய இயலாது. அப்படியே ஆர்சிஐ அமைக்கப்பட்டாலும் போலீசார் அவர்களின் கடமையைச் செய்ய அது தடையாக இருக்காது”, என்றாரவர்.

யார் வேண்டுமானாலும் ஆர்சிஐ அமைக்க வேண்டும் என்று முன்மொழியலாம் என்று கூறிய அமைச்சர் போலீசாரைப் பொறுத்தவரை இவ்விவகாரம் மீது விசாரணையைத் தொடங்கி விட்டார்கள் என்றார்.

ஆனால், அந்த விசாரணை எந்த அளவில் உள்ளது என்பது பற்றித் தமக்குத் தெரியாது என்பதை ஹிஷாமுடின் திரும்பத் திரும்ப வலியுறுத்தினார்.போலீசார் “தொழில்நெறிமுறைக்கேற்ப நடந்து” கொள்வார்கள் என்றவர் உறுதி கூறினார்.

“போலீஸ் விசாரணை பற்றி அவர்களைத்தான் கேட்க வேண்டும். அவர்கள் நியாயமாகத்தான் நடந்துகொள்ள வேண்டும். ..நேற்றுத்தான் போலீசில் புகார் செய்யப்பட்டுள்ளது.போலீசை விசாரிக்க விடுங்கள்.

“ஐஜிபி (இஸ்மாயில் ஒமார்)-யும் போலீசும் அதைச் சரியாக செய்து முடிப்பார்கள் என்று என்னால் உறுதிகூற முடியும்.பொதுமக்கள் ஆர்வம் காட்டும் ஒரு முக்கிய விவகாரம் என்பதால் உண்மைகள் சரியாக இருப்பதை உறுதிப்படுத்திக்கொள்ள வேண்டும் என்றும் தொழில்நெறிமுறைக்கேற்ப உண்மை கண்டறியப்பட வேண்டும் என்றும் ஐஜிபியிடம் கூறியுள்ளேன்”, என்றார்.

போலீசார் டத்தோ டியின் ஒத்துழைப்பை நாடுவார்களா என்று வினவப்பட்டதற்கு அது விசாரணையின் போக்கைப் பொருத்திருக்கும் என்று ஹிஷாமுடின் கூறினார்.

“போலீஸ்தான் அது குறித்து முடிவு செய்ய வேண்டும். போலீஸ் புகாரில் என்ன சொல்லப்பட்டிருக்கிறது என்பதுகூட எனக்குத் தெரியாது.அதெல்லாம் எனக்குத் தெரிய வந்தால் பின்னர் அதையும் ஒரு சதித்திட்டம் என்று கூறுவார்கள்”, என்று நக்கலாகக் கூறினார்.

மலேசியாகினி