மரணம் நிச்சயம்!

இனியவன் ஸ்ரீனிவாசன் · 28/10/2010

வாழ்வின் சுவர்களில்
கொட்டை எழுத்தில்
எழுதப்படுகிறது மரணம்
படிக்க மட்டுமே நாளாகிறது!
எத்தனையோ பேரின் மரணத்தில்
நிகழ்வதில்லை பாடம்
என் வீட்டின் ஒரு சின்ன மரணம்
மாற்றி விடுகிறது என் பாதையையும்
வாழ்க்கையையும்,
வாழ்க்கையை கடைசியாய் புரட்டும் நாளில்
பாடம் புகுத்தப்பட்டுள்ளது புரியும் புள்ளியில்
நிகழ்கிறது -
தனக்கான மரணம்!
யாரும் பயந்துவிடாதீர்கள்
பயம் கொள்வதால்
விட்டா செல்கிறது மரணம்?
விட்டு செல்லுங்கள் மரணத்தை
துணிவிருந்தால் வந்து நம்மை
பெற்றுக் கொள்ளட்டும் மரணம்
பெறாத மரணத்தில்
எனக்கென்னவோ வாழ்வதாகவே
தெரியவில்லை -
நிறைய பேரின் வாழ்க்கை!
என்ன தான் மனிதன்
செய்தாலும் - மனிதனை
செத்து தொலை என்று
சொல்ல விடுவதேயில்லை மரணம்
மீறி சிலர் சொல்கிறார்கள்
ஏன் கொலை கூட செய்கிறார்கள்
மனிதரற்றோர்
மரணம் அவர்களை
மன்னிப்பதேயில்லை, மாறாக
தினம் தினம் கொள்கிறது,
கடைசி ஓர்நாளில்
அவர்கள் சடலம் மட்டும் எரிக்கவோ புதைக்கவோ
தூக்கி எங்கேனும் வீசவோ செய்யப்படும் நாளில்
அவர்களை இறந்ததாக -
கருதி மட்டுமே கொள்கிறது (அவர்களின்) உடல்!
பெரிய மிராசுதார்
பிச்சைக்காரன்
ஆண்
பெண்
சாமி
குடிகாரன்
திருடன்
நல்லவன்
கெட்டவன்
யாரையுமே பார்ப்பதில்லை மரணம்
ஆனால் -
நெருங்கும் முன்
நன்றாகப் பார்த்துக் கொள்கிறது!

செய்தாலி · செய்தாலி Wed 23 Mar 2011 - 12:22

ஆஹா அற்புதம் கலகீட்டீங்க வரிகள் சூப்பர்
கருத்து அதைவிட சூபர் நல்ல சிந்தைக்கு பாராட்டுக்கள் நண்பா

இந்த பதிவைத் துவங்கியவர் நன்றி கூறியுள்ளார் செய்தாலி

balakarthik · balakarthik Wed 23 Mar 2011 - 12:26

நவீன பட்டினத்தார் கவிதை அருமை

**அருண்** · **அருண்** Wed 23 Mar 2011 - 12:33

ஆக உண்மையில் மரணம் நிச்சயம்! சூப்பருங்க

**Manik** · **Manik** Wed 23 Mar 2011 - 12:36

மரணத்தை எதிர்கொள்ள கூட ஒரு துணிவு வேண்டும் என்பது மிகவும் உண்மை நண்பா

மஞ்சுபாஷிணி · மஞ்சுபாஷிணி Wed 23 Mar 2011 - 12:37

மரணத்தின் ஓலை யார் வீட்டையும் விட்டு வைப்பதில்லை..
உண்மையே.... இங்கே லஞ்சமும் வேலைக்கு ஆவதில்லை....
விடும் கண்ணீரும் பயன் தருவதில்லை.....

அருமையான வரிகள் ஸ்ரீனிவாசன்... கொஞ்சம் பிழை திருத்தம் செய்தால் அசத்தல்பா....