திமுக. அரசின் சாதனை விலைவாசி உயர்வு, மின்வெட்டு

திருச்செந்தூர்:இலவச அறிவிப்பு மக்களுக்கு லஞ்சம் கொடுப்பதற்கு சமம் எனவும், குடும்ப அரசியல், விலைவாசி உயர்வு, மின்வெட்டு இவைகள் தான் தமிழகத்தில் திமுக.,அரசு செய்த மிகப்பெரிய சாதனைகள் என சமக.,தலைவர் சரத்குமார் திமுக.,மீது குற்றம் சாடினார்.அதிமுக.,தலைமையிலான கூட்டணியில் தென்காசி தொகுதியில் களமிறங்கியுள்ள சமக.,தலைவர் சரத்குமார் தனது மனைவி ராதிகாவுடன் திருச்செந்தூர் சுப்பிரமணிய சுவாமி கோயிலில் சுவாமி தரிசனம் செய்ய வந்தார். பல்வேறு பூஜைகளில் கலந்து கொண்டார். பின்னர் சரத்குமார் கூறியதாவது, அதிமுக.,தலைமையிலான கூட்டணி தமிழகத்தில் 234 தொகுதிகளில் போட்டியிட உள்ளது.

கூட்டணி கட்சியினர் ஒற்றுமையுடன் ஒருங்கிணைந்து மனக் கசப்பினை மறந்து வெற்றிக்காக உழைக்க வேண்டும். நான் தென்காசி தொகுதியில் நாளை (24)ம் தேதி வேட்பு மனுதாக்கல் செய்கிறேன். தமிழகத்தில் குடும்ப அரசியல், கட்ட பஞ்சாயத்து, மின்வெட்டு, விலைவாசி உயர்வு இவைகள் தான் திமுக.,அரசு செய்த மிகப்பெரிய சாதனையாக இருக்கும். தற்போது திமுக.,தேர்தல் அறிக்கையில் மக்களுக்கு மிக்ஸி, கிரைண்டர் வழங்குவதாக கூறியுள்ளார்கள். இது யாருடனோ மறைமுகமாக பேரம் பேசியுள்ளதாக தெரிகிறது.

தமிழகத்தில் 60 லட்சம் படித்த இளைஞர்கள் வேலை வாய்ப்பில்லாமல் உள்ளனர். அவர்கள் பற்றி தேர்தல் அறிக்கையில் எதுவுமில்லை. இலவசமாக பொருள்களை கொடுப்பது பொதுமக்களுக்கு லஞ்சம் கொடுப்பதற்கு சமம். தேர்தல் கமிஷன் இதனை ஆராய்ந்து திமுக.,அரசு மீது தக்க நடவடிக்கை எடுக்க வேண்டும். தேர்தல் கமிஷன் தற்போது கடுமையான விதிமுறைகளை கடைபிடித்து வருகிறது. தேர்தல் முடியும் வரை இந்த விதிமுறைகளை கடைபிடிக்க வேண்டும். அதிமுக.,தலைமையிலான கூட்டணியில் மதிமுக.,இல்லாதிருப்பது கூட்டணிக்கு எந்த வித பாதிப்பும் கிடையாது. இவ்வாறு கூறினார்.

செய்தி பகிர்வுக்கு அன்பு நன்றிகள் சிவா..