ஓட்டுக்களை வேட்டையாட பெண்களுக்கு சுடிதார், கவரிங் நகைகள் விநியோகமா...!

கோவில்பட்டி:கோவில்பட்டியில் நடந்த வாகன சோதனையில் திமுக இளைஞரணி அமைப்பாளர் நான்கு சூட்கேஸ்களில் காரில் கொண்டு வந்த ஆயிரக்கணக்கான ரூபாய் மதிப்புள்ள சுடிதார் துணிகளை தேர்தல் பறக்கும் படையினர் கைப்பற்றினர். தமிழகத்தில் வரும் ஏப்.13ந்தேதி சட்டசபை தேர்தல் நடக்க உள்ளதால் வாக்காளர்களுக்கு பணம் மற்றும் அன்பளிப்பு கொடுக்கப்படுவதை தடுக்க தேர்தல் கமிஷன் பல்வேறு உஷார் நடவடிக்கைகள் எடுத்து வருகிறது. இதில் ஒவ்வொரு தொகுதியிலும் பறக்கும் படைகளை அமைத்து வாகன சோதனை நடத்தி வருகிறது. கோவில்பட்டி தோட்டிலோவன்பட்டி விலக்கில் கோவில்பட்டி வட்ட வழங்கல் அலுவலர் முருகானந்தம் தலைமையில், சப் இன்ஸ்பெக்டர்கள் முத்து, சித்தன் மற்றும் பறக்கும் படை குழுவினர் தீவிர வாகன சோதனை நடத்தி வந்தனர். அப்போது சேலத்தில் இருந்துவந்த காரை நிறுத்தி பறக்கும்படை அதிகாரிகள் சோதனை செய்தனர். இதில் காரில் நான்கு சூட்கேஸ்களில் சுமார் 139 சுடிதார்மெட்ரீயல்கள் மற்றும் பேண்ட் துணிகள் இருந்ததையடுத்து காரில் வந்தவர்களிடம் சுடிதார்களுக்குரிய ஆவணங்களை பெற்று ஆய்வு செய்தனர்.

அதில் சேலத்தில் இருந்து மதுரையிலுள்ள பிரபல ஜவுளிக்கடைக்கு சுடிதார்கள் வந்தது தெரிய வந்தது. ஆனால் மதுரையை கடந்து கோவில்பட்டி நோக்கி கொண்டு வரப்படுவதற்கான ஆவணங்கள் எதுவும் இல்லையென கூறப்படுகிறது. இதையடுத்து அதிகாரிகள் குழுவினர் காரில் வந்த கமலக்கண்ணன் மற்றும் கார் டிரைவரான சேலம் மாவட்டம் கருக்கல்வாடி கேஆர் தோப்பை சேர்ந்த சித்தன் மகன் முருகவேல் (34) என்பவரிடமும் விசாரணையை தீவிரப்படுத்தினர். இதில் சுடிதார்கள் கோவில்பட்டி கடலைக்கார தெருவிலுள்ள பிரபல ஜவுளிக்கடைக்கு சேம்பிள் காட்டுவதற்கு கொண்டு செல்லப்படுவதாக தெரிவித்தனர். மேலும் காரில் வந்தவர்களில் கமலக்கண்ணன் என்பவர் சேலம் மாவட்டம் மகுடங்சாவடியில் திமுக இளைஞரணி அமைப்பாளராக இருந்து வருவதாக தெரிவித்தனர். தொடர்ந்து சம்பந்தப்பட்ட ஜவுளிக்கடையை அதிகாரிகள் தொடர்பு கொண்டபோது தங்களுக்கு சம்பந்தமில்லை என்று தெரிவித்ததால் அதிகாரிகள் சுடிதார்களை கைப்பற்றி தாலுகா ஆபிசிற்கு கொண்டு வந்து தேர்தல் துணை அலுவலரான தாசில்தார் காளிமுத்துவிடம் ஒப்படைத்தனர். இந்நிலையில் ஜவுளிக்கடை தரப்பினரும், பிடிபட்டவர்களும் ஒருவரை ஒருவர் சரிக்கட்டி பேசுவதிலேயே குறியாக இருந்ததால் முறையான ஆவணங்களை ஆர்டிஓவிடம் காட்டிவிட்டு சுடிதார்களை பெற்று செல்லுமாறு அதிகாரிகள் தெரிவித்தனர். மேலும் கோவில்பட்டி வாகன சோதனையில் கைப்பற்றப்பட்ட சுடிதார்கள் சுமார் ரூ.25 ஆயிரம் இருக்கலாமென தெரிவித்தனர். தொடர்ந்து திமுக பிரமுகருடன் ஆயிரக்கணக்கான மதிப்புள்ள சுடிதார்கள் கைப்பற்றப்பட்டதால் தேர்தலை முன்னிட்டு பொதுமக்களுக்கு சுடிதார் விநியோகம் செய்ய கொண்டு வரப்பட்டதா என பறக்கும் படை அதிகாரிகள் தீவிர விசாரணை நடத்தி வருவதாகவும் தெரிவித்தனர்.

தூத்துக்குடியில் 2லட்சம் மதிப்புள்ள கவரிங் நகைகள் பறிமுதல்தூத்துக்குடி 3வது மைல் செக்போஸ்டில் நேற்று நடந்த வாகனசோதனையில் 2 லட்சம் மதிப்புள்ள கவரிங் நகைகள் பறிமுதல் செய்யப்பட்டது.உரிய ஆவணங்கள் இல்லாமல் திருநெல்வேலியில் இருந்து தூத்துக்குடிக்கு கொண்டு வரப்பட்டதாக கூறப்பட்டது.மேலும் கவரிங் நகைகளுக்குரிய சரியான ஆவணங்கள் எதுவும் கொண்டுவரப்படவில்லை. காரில் வந்த நெல்லை சுவாமி சன்னதி தெருவைச் சேர்ந்த தவமணிமகன் செல்வராஜ்(32) மற்றும் கார் டிரைவர் ஆறுமுகநேரி முத்துகுமார் ஆகி யோரிடம் இதுகுறித்து தேர்தல்பறக்கும் படை அதிகாரிகள் விசாரணை நடத்திவருகின்றனர்.

தினமலர்

அடடா வட போச்சே,பாழா போன வெளிநாட்டுக்கு வந்ததுல இருந்து நமக்கு எதுவும் கிடைக்க மாட்டேங்குது