மலாய்க் குத்தகையாளர்கள், குவான் எங்கிடம் மன்னிப்புக் கேட்டனர்

இன்று, ஓர் அதிர்ச்சியூட்டும் நடவடிக்கையாக, மலேசிய மலாய்க் குத்தகையாளர் சங்கத்தின் பினாங்கு கிளைத் தலைவர் மொகமட் ஃபாட்சில் ஹசான், முதலமைச்சர் லிம் குவான் எங்கிற்கு எதிராகச் சுமத்திய பல்வேறு குற்றச்சாட்டுகளுக்காக, அவரிடம் மன்னிப்புக் கேட்டுக் கொண்டார்.

மலாய்க் குத்தகையாளர்கள் இப்போது அம்மாநிலத்துடன் இணைந்து செயல்பட விரும்புவதால் தமது குறைகூறல்களுக்காக லிம்மிடம் அவர், வருத்தம் தெரிவித்துக் கொண்டார்.

“எங்களுக்கிடையிலான பிரச்னைகளைத் தீர்த்துக் கொண்டு, ஒரு புதிய சகாப்தத்தை தொடக்க நாம் விரும்புகிறோம்,” என்றும் முகமட் ஃபாட்சில் கூறினார். அவருடன் சங்கத்தின் பல உறுப்பினர்களும் சென்றுள்ளனர்.

இன்று கொம்தாரில் அவசர செய்தியாளர் கூட்டத்தை நடத்திய லிம், குற்றச்சாட்டு அறிக்கைகளை வெளியிட்டதற்காக, மொகமட் ஃபாட்சில் தம்மிடம் மன்னிப்புக் கோரியதாகக் கூறினார். அவற்றில் பெரும்பாலான அறிக்கைகளை மலாய்ப் பத்திரிகைகள் வெளியிட்டன.

ஆகக் கடைசியாக, கடந்த மாதம் சுமத்திய குற்றச்சாட்டில், மலாய்ச் சமூகத்தினருக்கு மதிப்புக் குறைந்த, சாதாரண திட்டங்கள்தான் வழங்கப்படுகின்றன என்று மொகமட் ஃபாட்சில் தெரிவித்தார்.

அத்திட்டங்கள் குறித்த விவரங்களை வழங்கும்படி, லிம்முக்கு சவால் விடுத்ததாக அவரை மேற்கோள்காட்டி உத்துசான் பத்திரிகை செய்தி வெளியிட்டது.

மாநில அரசு, அதற்கு மறுமொழி தெரிவித்து, மலாய்க் குத்தகையாளர்களுக்கு கிட்டத்தட்ட எல்லாத் திட்டங்களையும் பக்காத்தான் ராயாட் நிருவாகம் வழங்கியுள்ளதைக் குறிப்பிடும் புள்ளி விவரங்களை இன்று
வெளியிட்டது.

இது, மலாய் குத்தகையாளர்களுக்கும் மாநிலத்துக்கும் கிடைத்த வெற்றி

மாநிலப் பொதுப் பணித் துறையின் கிட்டத்தட்ட 94விழுக்காடு குத்தகைகள் மலாய்க் குத்தகையாளர்களுக்கு
வழங்கப்பட்டுள்ளதை கோப்புகள் காட்டுகின்றன. அதே வேளை வடிகால் நீர்ப்பாசனத்துறை, தனது திட்டங்கள்
அனைத்தையும் அச்சமூகத்தைச் சேர்ந்த குத்தகையாளர்களுக்கு வழங்கியுள்ளது.

எந்த குத்தகையாளரையும், மாநில அரசு கறுப்புப் பட்டியலிடவில்லை என்றும் லிம் வலியுறுத்தினார். ஆயினும், குத்தகைகளைப் பெற்றவர்கள், அதற்குப் பொறுப்பேற்பதையும், எந்த கட்சியின் ஜால்ராவாக இல்லாதிருப்பதையும் உறுதி செய்வதற்கு நடவடிக்கைகளை அது எடுத்துள்ளது.

இத்தகைய மேம்பாடு, மூன்றாண்டுகளுக்குப் பிறகு, தாமதமாக காணப்பட்டாலும் கூட, மலாய்க் குத்தகையாளர்களுக்கும் அம்மாநிலத்துக்கும் ஒரு வெற்றியாகும் என்றாரவர்.

“நீதி, தரம் மற்றும் சிறந்த பேரத்தின் அடிப்படையிலான அணுகுமுறையை நாம் கொண்டுள்ளோம்….மாநில அரசு
நிருணயம் செய்துள்ள விதிமுறைகள் பின்பற்றப்பட வேண்டும்,” என்று கூறிய அவர், “குத்தகைகளைப் பெறுவதற்கு அம்னோ மூலமாக மலாய்க் குத்தகையாளர்கள் இனியும் செல்ல வேண்டிய அவசியமில்லை”, என்றார்.

இந்நாட்டில் சிறந்த குத்தகையாளர்களில் மலாய்க் குத்தகையாளர்களும் அடங்குவர் என்றும் அதனை தாமே நேரில் கண்டுள்ளதாயும் அவர் குறிப்பிட்டார்.

“இப்போது அம்னோ குத்தகையாளர்கள்தான் சத்தம் போடுகின்றனர் (குத்தகைகள், அவர்களுக்குக் கிடைப்பதில்லை) மலாய்க் குத்தகையாளர்கள் அல்ல”, என்றும் லிம் கூறுகிறார்.

மலேசியாஇன்று