கழிவிலிருந்து எரி பொருள்

சாக்கடை நீர் மற்றும் மனிதக்கழிவிலிருந்து சமையல் எரிவாயு பெற்று சமைக்கும் முறையை சத்தியமங்களம் அருகில் இருக்கும் கொமாரபாளையம் கிராம மக்கள் உபயோகப்படுத்துகிறார்கள்.

கொமாரபாளையம் தலித் காலனியை “பண்ணாரி அம்மன் ரூரல் பவுண்டேசன்” என்ற அமைப்பு தத்து எடுத்து உள்ளது. அவர்கள் முதல் கட்டமாகக் கழிப்பிடம் ஒன்றை கட்ட முடிவு செய்தனர். ஊராட்சி சார்பில் மாவட்ட ஊரக வளர்ச்சி முகமையின் நிதியைப் பெற்று ஆண்களுக்கும் பெண்களுக்கும் என தனித்தனியாகக் கழிவறைகள் கட்டப்பட்டன. அப்பகுதி மக்கள் அதனை பயன்படுத்தினார்கள். அப்போது அந்த அமைப்பின் தலைவர் திரு பாலசுப்பிரமணியத்திற்கு நினைவுக்கு வந்தவர், கழிவுகளில் இருந்து எரிவாயுவை உருவாக்கி சமூக புரட்சியை மேற் கொண்டுவரும் சமூக விஞ்ஞானி திரு.வி.ஆர்.ராஜேந்திரன் அவர்கள்தான்.

திரு ராஜேந்திரன் கன்னியாகுமரி மாவட்டம் அழகிய மண்டபம் அருகே உள்ள விலவுர் கிராமத்தில் பிறந்தவர். கழிவு நீரைப் பயனுள்ள நீராக மாற்றும் ஆராய்ச்சியில் ஈடுபட்ட இவர் சாக்கடையிலிருந்தும் மனிதக் கழிவுகளிலிருந்தும் மின்சாரத்தை தயாரிக்க முடியும் என்று நிரூபித்தவர்.

அவரிடம் மனிதக் கழிவிலிருந்து சமையல் எரிவாயு தயாரிக்கும் பொறுப்பை ஒப்படைத்தார்கள். அவர் தனது ஆராய்ச்சி திட்டத்தை அங்கே அரங்கேற்றினார். பொதுக்கழிப்பிடத்தில் இருந்து வெளியேறும் கழிவுகளை சேகரிக்க சிலிண்டர் அமைப்பிலான எரிகலன் தொட்டி கட்டப்பட்டது.அதிலிருந்து எரிவாயு வெளியேற வசதியாக குழாய்கள் பொருத்தப்பட்டன. கழிவு தண்ணீர் வெளியேறவும் தனியாக குழாய்கள் அமைக்கப்பட்டன. சில நாட்களிலேயே எரிகலன் தொட்டியிலிருந்து எரிவாயு வெளியேறியது. அந்த எரிவாயுவை முறைப்படுத்தி அடுப்பில் பொருத்திப்பற்ற வைத்தபோது தீப்பிடித்தது. அந்த எரிவாயுவைப் பயன்படுத்தும் விதத்தில் அருகிலேயே பொது சமையல் கூடம் ஒன்றைக் கட்டினார்கள். அதில் 14 பேர் சமையல் செய்யும் விதத்தில் வசதிகள் செய்யப்பட்டன. அதில் அக்கிராம மக்கள் பயன்படுத்தி பலன் பெற்று வருகின்றனர்.
இந்தியாவிலேயே மனித கழிவிலிருந்து எரிவாயு உற்பத்தி செய்து சமையலுக்குப் பயன்படுத்தும் முதல் கிராமமாக கொமாரபாளையம் திகழ்கிறது.

இந்த இயற்கை எரிவாயுத் திட்டம் உலகளவில் பெரும் வரவேற்பைப் பெறும் என்று நம்பலாம்.

நன்றி குடும்ப மலர் 06.03.2011தினத்தந்தி.

ஆராய்சியாளர் திரு.ராஜேந்திரன் அவர்களின் இந்த முயற்சிக்கு மத்திய அரசும் மற்றும் பல்வேறு அமைப்புகளும் விருதுகளை அளித்து கௌரவித்துள்ளனர்.