மலாக்கா-மெர்லிமாவ்,பாகாங்-கெர்டாவ் சட்டமன்றத் தொகுதிகளுக்கான இடைத்தேர்தல் வாக்களிப்பு தொடங்கியுள்ளது

வாக்களிப்பு நேரம்: காலை மணி: 8.00 – மாலை மணி 5.00 வரையில்

வாக்குகள் எண்ணப்படுவது மாலை மணி: 6.00 க்குத் தொடங்கும்

முடிவுகள் அறிவிக்கப்படும் நேரம்: இரவு மணி 8.00 க்கு மேல்

மெர்லிமாவ், கெர்டாவ் தொகுதிகளில் கடந்த எட்டு நாட்களாக நடந்த பிரச்சாரத்துக்குப் பின்னர் அவற்றின் வாக்காளர்கள் தங்களது பேராளரைத் தேர்வு செய்ய இன்று காலை எட்டு மணிக்கு வாக்களிக்கத் தொடங்கினர்.

இரண்டு தொகுதிகளும் அம்னோவுக்கும் பாஸ் கட்சிக்கும் இடையிலான நேரடிப் போட்டி ஆகும்.

அவ்விரண்டுமே பிஎன் கோட்டைகள் எனக் கருதப்படுவதால் ஆளூம் கூட்டணி வெற்றி பெறும் என எதிர்பார்க்கப்படுகிறது.

பெரும்பாலான அரசியல் ஆய்வாளர்கள் பெரும்பான்மை வாக்குகள் பற்றியும் எத்தனை வாக்காளர்கள் திசை மாறுவர் என்பது பற்றியும் மட்டுமே கருத்துத் தெரிவித்துள்ளனர்.

கெர்டாவில் மலாய் சமூக ஆதரவு எந்தக் கட்சிக்கு உள்ளது என்பது முடிவு செய்யப்படும்.

அங்கு மொத்தம் 13 வாக்குச் சாவடிகள் அமைக்கப்பட்டுள்ளன. வாக்காளர்களில் 90 விழுக்காட்டினர் மலாய்க்காரர்கள் ஆவர். மொத்த வாக்காளர் எண்ணிக்கை 8,999 ஆகும்.

அங்கு வானிலை இன்று நன்றாக இருக்கும் என அறிவிக்கப்பட்டுள்ளது.

அங்கு பிஎன் சார்பில் சையட் இப்ராஹிம் சையட் அகமட் நிறுத்தப்பட்டுள்ளார். பாஸ் வேட்பாளர் ஹசானுதீன் சலிம் ஆவார். இவர் 2008 தேர்தலில் போட்டியிட்டு பிஎன் வேட்பாளரிடம் தோல்வி கண்டவர்.

அந்தத் தொகுதிக்கான பிஎன் பேராளர் ஸாஹாருதீன் அபு காசிம் பிப்ரவரி 12ம் தேதி காலமானதைத் தொடர்ந்து அங்கு இடைத்தேர்தல் நடத்தப்படுகிறது.



மெர்லிமாவ் தொகுதி நிலவரம் சற்று மாறுபட்டதாகும்.

அது பல இனக் கலப்புத் தொகுதியாகும். அங்குள்ள வாக்காளர்களில் 64.9 விழுக்காட்டினர் மலாய்க்காரர்கள். சீனர்கள் 20.8 விழுக்காட்டினர். இந்தியர்கள் 14.8 விழுக்காட்டினர். 0.2 விழுக்காட்டினர் மற்றவர்கள்.

பகுதி கிராமப்புறத் தொகுதியான மெர்லிமாவ் இடைத்தேர்தல் முடிவுகள், கலப்பு தொகுதிகளில் கட்சிகளின் நிலை எவ்வாறு இருக்கும் என்பதை முடிவு செய்யும்.

மொத்தம் ஏழு வாக்குச் சாவடிகள் அமைக்கப்பட்டுள்ளன.

பிஎன் சார்பில் அங்கு ரோஸ்லான் அகமட் நிறுத்தப்பட்டுள்ளார். யூஹைஸாட் அப்துல்லா பாஸ் வேட்பாளர் ஆவார்.

மெர்லிமாவில் இன்று பிற்பகல் இடியுடன் மழை பெய்யும் என எதிர்பார்க்கப்படுவதால் முன்கூட்டியே வாக்களிக்குமாறு தேர்தல் ஆணையம் வாக்களர்களுக்கு வேண்டுகோள் விடுத்துள்ளது.

அந்தத் தொகுதிக்கான பிஎன் பேராளர் முகமட் ஹிடிர் அபு ஹசான் ஜனவரி 30ம் தேதி காலமானதால் அந்த இடம் காலியானது.

மலேசியா இன்று!