அசாமில் தொடர் குண்டு வெடிப்பு 61 பேர் பலி!: 20 இடங்களில் பயங்கரவாதிகள் கைவரிசை

அசாம் மாநிலத்தில் கவுகாத்தி மற்றும் மூன்று மாவட்டங்களில் நேற்று காலை 11.30 மணிக்கு, ஒரே நேரத்தில் 20 இடங்களில் நடந்த சங்கிலித் தொடர் குண்டு வெடிப்பில் 61 பேர் பலியாயினர்; மேலும் 200க்கும் மேற்பட்டோர் படுகாயமடைந்தனர். இக்குண்டு வெடிப்புகளுக்கு வங்கதேசத்தைச் சேர்ந்த "ஹூஜி' அமைப்பு காரணமாக இருக்கலாம் என்று கருதப்படுகிறது.


நிலைமை மோசமானதைத் தொடர்ந்து, அசாம் மாநிலம் முழுவதும் உஷார் நிலையில் கண்காணிப்பு ஏற்பாடு செய்யப்பட்டிருக்கிறது. கவுகாத்தியில், சட்டசபை மற்றும் தலைமைச் செயலகம் போன்ற கடும் பாதுகாப்பு நிறைந்த பகுதிக்கு அருகில், மேம்பாலத்துக்கு பக்கவாட்டில் உள்ள கணேஷ் குரி காய்கறி மற்றும் பழங்கள் மார்க்கெட்டில் அடுத்தடுத்து இரண்டு குண்டுகள் வெடித்தன. முதல் குண்டு வெடித்த போது, 50 மீட்டர் சுற்றளவுக்கு அனைத்தும் வெடித்துச் சிதறின. குண்டு வெடிப்பால் அப்பகுதி தீப்பற்றி எரிந்தது. இதில் பலர் உருத்தெரியாமல் கருகினர்.


தொடர்ந்து, கவுகாத்தியின் பேன்சி பஜார், காம்ரூப் மாவட்ட துணை கமிஷனர் அலுவலகத்தின் எதிரில் உள்ள பான் பஜாரில் குண்டுகள் வெடித்தன. குண்டு வெடிப்பு நடந்த இடத்தில், மனித உடலின் பாகங்கள் சிதறிக் கிடந்தன. கரும்புகையும், தீயுமாக காட்சியளித்தது. குண்டு வெடித்த பல பகுதிகளில் நிறுத்தப்பட்டிருந்த கார்கள், குண்டு சிதறல் பட்டு சேதமடைந்து காட்சியளித்தன. குண்டு வெடிப்பால், கவுகாத்தி முழுவதும் கடும் பதட்டம் ஏற்பட்டது.

கோக்ராஜர் நகரில் மூன்று வெடிகுண்டுகளும், பொங்கைகானில் இரண்டு வெடிகுண்டுகளும், கீழ் அசாமில் பாரபெட்டா சாலையில் இரண்டு குண்டுகளும் வெடித்துச் சிதறின. கோக்ராஜரில் மக்கள் நெரிசல் நிறைந்த சந்தைப் பகுதியில் குண்டு வெடித்ததால் உயிர் பலி அதிகமாக ஏற்பட்டது. அடுத்தடுத்து 20 இடங்களில் நடந்த குண்டு வெடிப்புகளில், 61 பேர் பலியாயினர்; 200க்கும் மேற்பட்டோர் படுகாயமடைந்தனர்.


கணேஷ்குரி குண்டு வெடிப்பை நேரில் பார்வையிட்ட போலீஸ் டி.ஜி.பி., ஜி.பி. சிங்., இச்சம்பவத்தில் ஆர்.டி.எக்ஸ்., பயன்படுத்தப்பட்டு இருப்பதற்கு வாய்ப்பு இருப்பதாக தெரிவித்தார். கவுகாத்தியில் ஊரடங்கு உத்தரவு பிறப்பிக்கப்பட்டுள்ளது. அங்கு தொலைபேசி இணைப்புகள் துண்டிக்கப்பட்டுள்ளன. அசாம் முழுவதும் உஷார் நிலை அமல்படுத்தப் பட்டிருக்கிறது. அசாம் முதல்வர் தருண் கோகாய் அவசரமாக அமைச்சரவைக் கூட்டத்தைக் கூட்டி ஆலோசனை நடத்தினார். பிரதமர் மன்மோகன் சிங் நேரில் வந்து பார்வையிடுவார் என்று கூறப்பட்டது. இந்திய - வங்க தேச எல்லையில், யாரும் ஊடுருவ முடியாதபடி பாதுகாப்பு பலப்படுத்தப்பட்டு, எல்லைப் பகுதி சீல் வைக்கப்பட்டுள்ளது.


பின்னணி யார்?: அசாம் குண்டு வெடிப்புச் சம்பவத்தின் பின்னணியில் உல்பா பயங்கரவாதிகள் இருக்கலாம் என்று, அம்மாநில அரசு சந்தேகிக்கிறது. ஆனால், உடனடியாக "இ-மெயில்' மூலம் "உல்பா' அனுப்பிய செய்தியில், "என்ன நடந்தது என்பதை விசாரிக்காமலே முடிவுக்கு வர வசதியாக, இப்படி உல்பா மீது பழிபோடப்பட்டிருக்கிறது' என்று கூறியிருக்கிறது. ஆனால், ஒரு உயர் போலீஸ் அதிகாரியோ, "இம்மாதிரி அதிதீவிர குண்டு வெடிப்புத் தாக்குதலை நடத்தும் திறன் உல்பாவுக்கு இல்லை. வங்கதேச பின்புலம் கொண்ட ஹூஜி பயங்கரவாத அமைப்பும் இதற்கு காரணமாக இருக்கும் ' என்றிருக்கிறார்.

அசாமில் தொடரும் குண்டுவெடிப்புகள்!


அசாமில் நேற்று வெடித்த தொடர் குண்டு வெடிப்புகள் நாட்டையே அதிரச் செய்தன. இந்த குண்டு வெடிப்புக்கு உல்பா உதவிய போதும், காஷ்மீர் பயங்கரவாத இயக்கங்கள் இச்சம்பவத்தை நடத்தியுள்ளதாக சந்தேகிக்கப்படுகிறது. இந்த ஆண்டில் மட்டும் உல்பா பயங்கரவாத இயக்கத்தால் அசாமில் ஏராளமான உயிரிழப்புகள் ஏற்பட்டன. தற்போது பிற பயங்கரவாத இயக்கங்களும் அசாமை குறிவைக்கத் தொடங்கியுள்ளன.


செப்., 30: தின்சுகியா பகுதியில் வெடித்த குண்டு வெடிப்புக்கு ஐந்து பேர் பலியாகினர்; 52 பேர் காயமடைந்தனர்.


செப்., 24: உடால்குரி மாவட்டத்தில் குண்டுவெடித்ததில் ஒருவர் பலியானார்.


செப்., 19: பொங்கைகான் பகுதியில் வெடித்த சைக்கிள் குண்டுவெடிப்புக்கு 22 பேர் பலியாகினர்.


ஆக., 15: சுதந்திர தின அணிவகுப்பில் குண்டுவெடித்ததில் ஒருவர் காயமடைந்தார்.


ஜூன். 29: நல்பாரி மாவட்டத்தில் மார்க்கெட் பகுதியில் ஏற்பட்ட குண்டுவெடிப்பில் ஏழு பேர் பலியானார்கள்; 35 பேர் காயமடைந்தனர்.


மார்ச். 9: திப்ருகார் மாவட்டத்தில் இந்தி பேசும் வெளிமாநிலத்தைச் சேர்ந்த நால்வரை உல்பா பயங்கரவாதிகள் சுட்டுக் கொன்றனர்.


பிப்., 19: கசார் மாவட்டத்தில் தனியார் சிமென்ட் ஆலையை சேர்ந்த ஐந்து ஊழியர்களை, "பிளாக்விடோ' அமைப்பைச் சேர்ந்த பயங்கரவாதிகள் கொன்றனர்.


பிப்., 11: கசார் மாவட்டத்தில் "பிளாக்விடோ' அமைப்பின் தாக்குதலுக்கு போலீசார் உட்பட நால்வர் பலியாயினர்.


ஜன., 14: பிளாக் விடோ அமைப்பினரின் தாக்குதலுக்கு இரு போலீசார் மற்றும் பொதுமக்களில் மூன்று பேர் பலியாயினர்.