King's Speech படத்துக்கு 4 ஆஸ்கார் விருதுகள்: Tom Hooper சிறந்த டைரக்டர்.

**சிவா** · **சிவா** Tue Mar 01, 2011 6:49 am

லாஸ் ஏஞ்சல்ஸ், மார்ச்.1- சினிமா உலகத்துக்கான மிக உயர்ந்த விருதான ஆஸ்கார் விருது நேற்று அமெரிக்காவில் நடந்த விழாவில் வழங்கப்பட்டது. இதில் `தி கிங்ஸ் ஸ்பீச்' என்ற படத்துக்கு 4 விருதுகள் கிடைத்தன.

சிறந்த டைரக்டருக்கான விருது இந்த படத்தை இயக்கிய டாம் கூப்பருக்கும், சிறந்த நடிகருக்கான விருது இந்த படத்தில் நடித்த பாலின் பிர்த்துக்கும், சிறந்த நடிகைக்கான விருது பிளாக் ஸ்வான் படத்தில் நடித்த நேட்டாலி போர்ட்மேனுக்கும் கிடைத்தது.

83-வது ஆண்டாக

ஆலிவுட் சினிமா படங்களில் நடித்த கலைஞர்களில் திறமையை வெளிப்படுத்திய சிறந்தவர்களுக்கு ஆஸ்கார் எனப்படும் மிக உயரிய விருது ஒவ்வொரு ஆண்டும் வழங்கப்பட்டு வருகிறது. 83-வது ஆண்டாக நேற்று இந்த விருது வழங்கு விழா லாஸ் ஏஞ்சல்ஸ் நகரில் நடந்தது.

இதில் ஆலிவுட் சினிமா உலகின் நடிகர் நடிகைகள் இயக்குநர்கள், இசை அமைப்பாளர்கள் கலந்து கொண்டனர். தமிழ்நாட்டின் இசை அமைப்பாளர் ஏ.ஆர்.ரகுமானும் கலந்து கொண்டார்.

திக்குவாய் மன்னர்

இதில் கிங்ஸ் ஸ்பீச் என்ற படத்துக்கு 4 விருதுகள் கிடைத்தன. இந்த படம் இங்கிலாந்து நாட்டு மன்னர் 6-ம் ஜார்ஜ் பற்றியது. அவர் பேசும்போது நாக்கு குளறும். வாய் திக்கும். இந்த குறையை அவர் ஆஸ்திரேலிய ஸ்பீச் தெரப்பிஸ்ட் ஒருவர் உதவியுடன் ஜார்ஜ் மன்னர் களைந்தார். இதற்காக அவர் பட்ட கஷ்டங்கள், பாடுகள் தான் இந்த படத்தின் கதை. இந்த படத்தை டாம் கூப்பர் டைரக்டு செய்து இருந்தார். இதில் 6-ம் ஜார்ஜாக நடிகர் காலின் பிர்த் நடித்து இருந்தார். இந்த படத்துக்கு 4 விருதுகள் கிடைத்தன.

சிறந்த படம்

சிறந்த இயக்கம், சிறந்த நடிகர், சிறந்த திரைக்கதை அமைப்பு ஆகியவற்றுக்கான 4 விருதுகளையும் இந்த படம் தட்டிச்சென்றது. சிறந்த டைரக்டருக்கான விருதை டாம் கூப்பரும், சிறந்த நடிப்புக்கான விருதை கதாநாயகனாக நடித்த காலின் பிர்த்தும், சிறந்த திரைக்கதை அமைப்புக்கான விருதை டேவிட் சீல்டரும் பெற்றனர்.

சிறந்த நடிகைக்கான விருது நடிகை நேட்டாலி போர்ட்மேனுக்கு கிடைத்தது. பிளாக் ஸ்வான் படத்தில் அவர் மிகச்சிறப்பாக நடித்ததற்காக இந்த விருது அவருக்கு கிடைத்தது.

4 விருதுகள் பெற்ற இன்னொரு படம்

கிங்ஸ் ஸ்பீச் படம் போலவே 4 விருதுகளை பெற்ற இன்னொரு படம் இன்செப்ஷன். சிறந்த ஒளிப்பதிவு, ஒலிக்கலவை, ஒலித்தொகுப்பு, விசுவல் எபக்ட்ஸ் ஆகிய 4 பிரிவுகளிலும் இந்த படத்தில் பணியாற்றிய கலைஞர்களுக்கு விருது கிடைத்தது.

தி சோஷியல் நெட்வொர்க் படத்துக்கு 3 விருதுகள் கிடைத்தன. சிறந்த படத்தொகுப்பு, சிறந்த இசை அமைப்பு சிறந்த திரைக்கதை ஆகியவற்றுக்காக விருது பெற்றது.

தி பைட்டர் என்ற படத்துக்கு 2 விருதுகள் கிடைத்தன. சிறந்த துணை நடிகருக்கான விருது இந்த படத்தில் நடித்த கிறிஸ்டியன் பேல், சிறந்த துணை நடிகைக்கான விருது இந்த படத்தில் நடித்த மெலிசா லியோ ஆகியோருக்கு கிடைத்தது.

சிறந்த வெளிநாட்டு படத்துக்கான விருது

டென்மார்க்கில் தயாரிக்கப்பட்ட டேனிஷ் மொழிப்படமான இன் ஏ பெட்டர் வேர்ல்டு சிறந்த வெளிநாட்டு படத்துக்கான விருதை பெற்றது.

கவுரவ ஆஸ்கார் விருதுகள், பழம் பெரும் டைரக்டர்கள் ஜீன் கோடார்டு, பிரான்சிஸ் போர்டு கொப்போலா, நடிகர் ஏலி வாலச் ஆகியோருக்கு கிடைத்தன.

ஏ.ஆர்.ரகுமான்

தமிழ்நாட்டை சேர்ந்த ஏ.ஆர்.ரகுமானுக்கு இந்த முறையும் ஆஸ்கார் விருது கிடைக்கும் என்று எதிர்பார்க்கப்பட்டது. 127 ஹவர்ஸ் என்ற படத்துக்கு அவர் இசை அமைத்து இருந்தார். அவர் பெயரும் இந்த முறை ஆஸ்கார் விருதுக்கு பரிந்துரை செய்யப்பட்டு இருந்தது. ஆனால் அவருக்கு விருது கிடைக்கவில்லை.

King's Speech படத்துக்கு 4 ஆஸ்கார் விருதுகள்: Tom Hooper சிறந்த டைரக்டர்.

King's Speech படத்துக்கு 4 ஆஸ்கார் விருதுகள்: Tom Hooper சிறந்த டைரக்டர்.

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக