கடாபி எதிர்ப்பாளர்கள் கிழக்கு பகுதியை கைப்பற்றினார்கள்: தலைநகரில் அதிபரின் ஆதரவாளர்கள் ஆயுதங்களுடன் வெறியாட்டம்

**சிவா** · **சிவா** Fri Feb 25, 2011 7:10 am

லிபியாவில் கலவரம் நீடிப்பு. கடாபி எதிர்ப்பாளர்கள் கிழக்கு பகுதியை கைப்பற்றினார்கள்: தலைநகரில் அதிபரின் ஆதரவாளர்கள் ஆயுதங்களுடன் வெறியாட்டம்

திரிபோலி, பிப்.25- லிபியா நாட்டில் அதிபர் கடாபிக்கு எதிராக மக்கள் போராட்டம் வெடித்து உள்ளது. அந்த நாட்டின் கிழக்கு பகுதியில், கடாபியின் செல்வாக்கு சரிந்தது. அந்த பகுதியை கைப்பற்றி விட்டதாகக் கூறி மக்கள் வீதிகளில் பட்டாசுகளை வெடித்து வெற்றி ஊர்வலம் நடத்துகிறார்கள்.

தலைநகர் திரிபோலியில், போராட்டக்காரர்களை அதிபரின் ஆதரவாளர்கள் வேட்டையாடுகிறார்கள்.

அதிபர் கடாபி

லிபியா நாட்டில் 41 ஆண்டுகளாக அதிபராக இருந்து ஆட்சி செய்து வருபவர் 68 வயதான கடாபி. இவரது ஆட்சியில் வேலை இல்லா திண்டாட்டம், விலைவாசி உயர்வு, பொருளாதார வீழ்ச்சி ஆகியவற்றால் மக்கள் பெரிதும் பாதிக்கப்பட்டு வருகிறார்கள்.

எனவே அதிபருக்கு எதிராக மக்கள் போராட்டத்தில் ஈடுபட்டு வருகிறார்கள். தலைநகர் திரிபோலியில் கடந்த 10 நாட்களாக போராட்டம் நடந்து வருகிறது. போராட்டத்தை கட்டுப்படுத்த ராணுவ ஹெலிகாப்டர்களில் இருந்து மக்கள் மீது துப்பாக்கி சூடு நடத்தினார்கள். இதுவரை போராட்டத்தில் ஈடுபட்ட 300-க்கும் மேற்பட்டவர்கள் உயிர் இழந்ததாக லிபியா நாட்டின் உள்துறை தெரிவிக்கிறது. ஆனால் 1,100-க்கும் அதிகமானவர்கள் இறந்ததாக இத்தாலி நாட்டு வெளியுறவுத்துறை மந்திரி தெரிவித்து இருக்கிறார்.

அதிபரின் ஆதரவாளர்கள் வேட்டை

இந்த நிலையில் அதிபர் கடாபி, திரிபோலி நகரில் பாதுகாப்பு பணியில் ஈடுபட்டு இருக்கும் ராணுவ தளபதிகளை அழைத்து பேசினார். போராட்டத்தில் ஈடுபடுவோரை, கண்டதும் சுட்டுக் கொல்லும்படி அவர் உத்தரவிட்டார். இதனால் பலர் தங்கள் வீடுகளிலேயே முடங்கி கிடக்கிறார்கள்.

மேலும் கடாபி தனது ஆதரவாளர்களை அழைத்து, போராட்டத்தை நடத்தும் தலைவர்களின் வீடுகளை முற்றுகையிட்டு அவர்களை தாக்க ஏற்பாடு செய்து இருக்கிறார். இதன்படி அவர்கள் ஆயுதங்களுடன் நகரில் வலம் வருகிறார்கள். வீடு வீடாக சென்று தேடுதல் வேட்டையில் ஈடுபடுகிறார்கள்.

கிழக்கு பகுதி வீழ்ந்தது

இந்த நிலையில் லிபியாவின் கிழக்கு பகுதியில் அதிபரின் செல்வாக்கு சரிந்தது. அங்கு மக்கள் வீதிகளில் கொடிகளை பிடித்துக் கொண்டு, பட்டாசுகளை வெடித்து, வெற்றி ஊர்வலம் நடத்தி வருகிறார்கள். அங்கு இருக்கும் ராணுவத்தினரும், கடாபியின் கட்டுப்பாட்டில் இல்லை என்று தெரிய வருகிறது.

கிழக்கு பகுதியில்தான், எகிப்தின் எல்லை இருக்கிறது. அந்த எல்லையை பாதுகாக்க ராணுவத்தினர் இல்லை. பாதுகாப்பு அற்ற நிலையில் எல்லைப்பகுதி இருப்பதாக அந்த பகுதி மக்கள் வருத்தம் தெரிவித்தனர்.

அமெரிக்கா எச்சரிக்கை

லிபியா நாட்டில் தற்போது நிலவி வரும் அமைதியற்ற நிலை பற்றி அமெரிக்க ஜனாதிபதி ஒபாமா நிருபர்களுக்கு பேட்டி அளித்தார். அப்போது அவர் கூறியதாவது:-

மக்கள் மீது நடத்தும் தாக்குதலை லிபியாவின் அதிபர் நிறுத்திக்கொள்ள வேண்டும். அங்கு அமைதி ஏற்பட வழிவகுக்க வேண்டும். இதற்கு உடனே கடாபி பதில் அளிக்க வேண்டும். இல்லையேல் லிபியா நாட்டின் பிரச்சினையில் அமெரிக்கா தலையிட நேரிடும்.

லிபியாவுக்கு அளிக்கும் உதவிகளை நிறுத்தவும், அந்த நாட்டுடன் உள்ள தொடர்புகளை நிறுத்துவது பற்றியும் ஆலோசிப்போம்.

இவ்வாறு ஒபாமா கூறினார்.

ஐக்கிய நாட்டு சபை

ஐக்கிய நாட்டுசபை செயலாளர் பான்கி மூன், கடந்த ஒரு வாரத்தில் மட்டும் லிபியா அதிபர் கடாபியுடன் 40 நிமிட நேரம் டெலிபோனில் பேசி இருக்கிறார். நேற்று அவர் நிருபர்களிடம் கூறுகையில், ``லிபியாவில் நிலைமை மிகவும் மோசமாக இருக்கிறது. மக்கள் மீது ராணுவ தாக்குதலை லிபியா நிறுத்திக் கொள்ள வேண்டும்'' என்றார்.

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக