ஈரானில் அரசுக்கு எதிரான பேரணியில் ஆயிரக்கணக்கான எதிரணி ஆதரவாளர்கள் பங்கேற்பு ஆர்ப்பாட்டக்காரர்களுக்கு அமெரிக்கா பலத்த ஆதரவு

நிசாந்தன் · நிசாந்தன் Sun Feb 20, 2011 12:10 pm

ஈரான் தலைநகர் தெஹ்ரானில் ஆயிரக்கணக்கான எதிரணி ஆதரவாளர்களால் நடத்தப்பட்ட பேரணியில் ஆர்ப்பாட்டக்காரர்கள் பாதுகாப்பு படையினருடன் மோதலில் ஈடுபட்டுள்ளனர்.

டியூனீஸி யா மற்றும் எகிப்தில் இடம்பெற்ற மக்கள் கிளர்ச்சியைத் தொடர்ந்து தமது பலத்தை வெளிப்படுத்தும் முகமாக தெஹ்ரானில் நடைபெற்ற இப்பேரணியின் மீது கண்ணீர்ப் புகைக்குண்டுப் பிரயோகத்தை மேற்கொண்ட பொலிஸார் அதிகளவானோரைத் தடுத்தும் வைத்துள்ளனர்.

இதன்போது ஒருவர் உயிரிழந்துள்ளதாகவும் சில தகவல்கள் தெரிவிக்கின்றன.

இதேவேளை, இவ்வாறான ஆர்ப்பாட்டங்கள் இஸபஹான்,மஸ்ஹாட் மற்றும் சிராஸ் ஆகிய நகரங்களிலும் இடம்பெற்றதாகத் தகவல்கள் தெரிவிக்கின்றன.

முன்னதாக எதிரணித் தலைவர் மிர் ஹுசைன் மௌசவி வீட்டுக்காவலில் வைக்கப்பட்டதாக அவரது இணையத்தளம் தெரிவிக்கின்றது.

இந்நிலையில் ஈரானில் பேரணிகளை நடத்திய எதிரணி ஆதரவாளர்களுக்கு அமெரிக்கா தமது பலத்த ஆதரவை வெளிப்படுத்தியுள்ளது.

எகிப்தின் நிலைமையைப் பார்த்தவர்களுக்கு அதேபோல் தமது நிலைமைகளையும் மாற்றுவதற்கு உரிமை உண்டு எனத் தெரிவித்துள்ள அமெரிக்க வெளிவிவகார அமைச்சர் ஹிலாரி கிளிண்டன் ஈரான் தனது அரசியல் முறைமையைப் பகிரங்கப்படுத்த வேண்டுமென வலியுறுத்தியுள்ளார்.

மேலும் ஈரானிய ஆர்ப்பாட்டக்காரர்களுக்கு மிகவும் தெளிவாகவும் நேரடியாகவும் அமெரிக்கா ஆதரவு வழங்குமெனவும் தெரிவித்துள்ளார்.

இதேவேளை பேரணியில் பங்குபற்றிய நூற்றுக்கணக்கானவர்கள் கைது செய்யப்பட்டுள்ளதாக எதிரணி வட்டாரங்கள் தெரிவிக்கின்ற போதும் உத்தியோகபூர்வமாக இது உறுதிப்படுத்தப்படவில்லை.

மேலும் நூற்றுக்கணக்கான கலகத் தடுப்பு பொலிஸார் தொடர்ந்தும் வீதிகளில் குவிக்கப்பட்டுள்ளதாகத் தெரிவிக்கப்படுகிறது.

2009 இல் ஜனாதிபதி தேர்தல் முடிவுகளுக்கு எதிராக இடம்பெற்ற ஆர்ப்பாட்டங்களின் பின்னர் நடைபெற்ற மிகப்பெரிய ஆர்ப்பாட்டம் இதுவாகும்.

தெஹ்ரானின் மத்தியிலுள்ள அஸாடி சதுக்கத்திலேயே இவ் ஆர்ப்பாட்டங்கள் நடைபெற்றபோதும் அதற்கருகிலுள்ள அஸெர்பைஜான் வீதியிலேயே கடும் மோதல்கள் இடம்பெற்றுள்ளன.

இம்மோதல்களின்போது அதிகளவானோர் காயமடைந்ததாகவும் கூறப்படுகிறது.

இவ் ஆர்ப்பாட்டங்களுக்கு அனுமதி வழங்கப்படவில்லை என அரசாங்கம் தெரிவித்துள்ள அதேவேளை அமைதி வழியிலான பேரணிகளுக்கு அனுமதி பெறவேண்டிய தேவை இல்லையென எதிரணியினர் தெரிவித்துள்ளனர்.

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக