லிபியாவில் தொடர் கலவரத்தில் 84 பேர் பலி : பக்ரைனில் இந்தியர்கள் பத்திரமாக உள்ளனர்

பக்ரைன்: லிபியாவில் கடாபிக்கு எதிராக நடந்து வரும் கலவரத்தில் கடந்த 3 நாட்களில் 84 பேர் ‌கொல்லப்பட்டுள்ளனர். மேலும் பக்ரைன் போராட்டத்தில் இந்தியர்கள் யாரும் பாதிக்கப்படவில்லை என்றும் அவர்கள் நிலை குறித்து இந்திய வெளியுறவு துறை விழிப்போடு கண்காணித்து வருவதாகவும் இந்த துறைக்கான அமைச்சர் எஸ்.எம்.,கிருஷ்ணா தெரிவித்துள்ளார்.

கிளர்சியுடன் பல்வேறு அரபுநாடுகளில் மக்கள் வீதிக்கு வந்து போராட்டக்களத்தில் குதித்து வருகின்றனர். பக்ரைன், ஏமன் நாடுகளில் தொடர் போராட்டம் நடந்து வருகிறது .பக்ரைனில் இன்றுடன் 7 வது நாளாக மன்னருக்கு எதிராக போராட்டம் வலுப்பெற்றாலும் பேச்சுவார்த்தை நடத்தி முடிவுக்கு கொண்டுவர முயற்சிகள் மேற்கொண்டுள்ளார்.

பக்ரைனில் மனாமாவில் உள்ள முத்து சதுக்கத்தில் மக்கள் மீது பாதுகாப்பு படையினர் கண்ணீர் புகை வீசியும் , துப்பாக்கியால் சுட்டும் களைத்தனர். 5 பேர் பலியாகிவிட்டனர். 20 க்கும் மேற்பட்டோர் பலத்த காயத்துடன் ஆஸ்பத்திரியில் சேர்க்கப்பட்டுள்ளனர். பாதுகாப்பு காரணமாக ஏமன், பக்ரைன், லிபியா போன்ற நாடுகளுக்கு யாரும் செல்ல வேண்டாம் என தங்களது நாட்டவர்களுக்கு அமெரிக்கா, பிரிட்டன் எச்சரிக்கை விடுத்துள்ளது.

இந்தியர்கள் பக்ரைனில் சுமார் 3 லட்சத்து 50 ஆயிரம் பேர் வரை வசித்து வருகின்றனர்.

இவர்கள் நிலை குறித்து இந்தியா கவனத்துடன் கண்காணித்து வருவதாக மத்திய வெளியுறவு துறை அமைசசகம் கூறியுள்ளது.

இது தொடர்பாக மத்திய அமைச்சர் எஸ்.எம்.., கிருஷ்ணா கூறுகையில்; அரபுநாடுகளின் உள்கட்ட விவகாரம் குறித்து கருத்து எதுவும் சொல்ல முடியாது . அங்குள்ள தூதரக அதிகாரிகள் மூலம் கவனித்து வருகிறோம். தேவையான உதவிகள் செய்து கொடுக்கப்படும். இந்தியர்கள் அனைவரும் பத்திரமாக உள்ளனர். யாரும் கவலைப்பட வேண்டியதில்லை இவ்வாறு அவர் கூறியுள்ளார்.

வெளியுறவு துறை செயலர் நிருபமாராவ், மற்றும் செய்தி தொடர்பாளர் விஷ்ணு பிரகாஷ் ஆகியோர் பக்ரைனில் உள்ள இந்திய தூதரக அதிகாரிகளுடன் தொடர்பு கொண்டு நிலைமை குறித்து கேட்டு வருகின்றனர். விரைவில் அங்கு அமைதி திரும்பும் சூழல் இருப்பதாக இந்திய அதிகாரிகள் கூறியுள்ளனர்.

லிபியாவில் தொடர் கலவரத்தில் இது வரை 84 பேர் கொல்லப்பட்டுள்ளனர். பலர் காயமுற்றுள்ளனர். தொடர்ந்து அங்கு பதட்டம் நிலவி வருகிறது