டெல்லி சி.பி.ஐ. அலுவலகத்தில் அனில் அம்பானி திடீர் ஆஜர்! ஸ்பெக்ட்ரம் விவகாரம் குறித்து 3 மணி நேரம் விளக்கம்

புதுடெல்லி, பிப்.17- டெல்லியில் உள்ள சி.பி.ஐ. தலைமை அலுவலகத்துக்கு திடீரென்று வந்த ரிலையன்ஸ் நிறுவன அதிபர் அனில் அம்பானி, ஸ்பெக்ட்ரம் விவகாரம் குறித்து ஏறத்தாழ 3 மணி நேரம் விளக்கம் அளித்தார்.

ஸ்பெக்ட்ரம் முறைகேடு

2 ஜி ஸ்பெக்ட்ரம் முறைகேடு தொடர்பாக கைதான தொலை தொடர்பு துறை முன்னாள் மந்திரி ஆ.ராசா, ஸ்வான் மற்றும் டி.பி.ரியாலிட்டி நிறுவனங்களின் தலைவர் பல்வா ஆகியோரிடம் சி.பி.ஐ. காவலில் தீவிர விசாரணை நடைபெற்று வருகிறது.

நேற்று முன்தினம் யுனிடெக் நிறுவனத்தின் நிர்வாக இயக்குனர் சஞ்சய்சந்திராவிடமும் சி.பி.ஐ. அதிகாரிகள் டெல்லியில் நேற்று விசாரணை நடத்தினார்கள்.

சி.பி.ஐ. அலுவலகத்தில் அம்பானி

இந்த நிலையில், இந்தியாவின் இரண்டாவது பெரிய செல்போன் சேவை நிறுவனமான ரிலையன்ஸ் கம்யுனிகேஷன்ஸ் நிறுவனம் உள்ளிட்ட `அனில் திருபாய் அம்பானி குழும(அடாக்)' தலைவர் அனில் அம்பானி நேற்று திடீரென்று டெல்லியில் உள்ள சி.பி.ஐ. தலைமை அலுவலகத்துக்கு வந்தார்.

நேற்று மாலை 4 மணிக்கு வந்த அம்பானி, ஏறத்தாழ 3 மணி நேரம் அந்த அலுவலகத்தில் இருந்தார். அப்போது ஸ்பெக்ட்ரம் ஒதுக்கீடு முறைகேடு தொடர்பாக, சி.பி.ஐ. அதிகாரிகளின் சந்தேகங்களுக்கு அவர் விளக்கம் அளித்ததாக தெரிகிறது.

ஆனால், விசாரணைக்காக அம்பானி அழைக்கப்பட்டார் என்ற தகவலை சி.பி.ஐ. அதிகாரிகள் உறுதி செய்ய மறுத்துவிட்டனர். ஸ்வான் நிறுவனம் புதிய ஸ்பெக்ட்ரம் லைசென்சுக்காக விண்ணப்பம் அனுப்புவதற்கு முன்பு, அந்த நிறுவனத்தில் ரிலையன்ஸ் நிறுவனத்துக்கு 9.9 சதவீத பங்குகள் இருந்தது.

அம்பானி நிறுவனம் விளக்கம்

தற்போது சி.பி.ஐ.யின் பிடியில் உள்ள பல்வாவின் டி.பி.ரியாலிட்டி குழுமம் உருவாக்கியதுதான் ஸ்வான் நிறுவனம் என்பது குறிப்பிடத்தக்கது. இதற்கிடையில், அனில் அம்பானி சி.பி.ஐ. அலுவலகம் சென்றது குறித்து அவருடைய `அடாக்' நிறுவனம் சார்பில் அறிக்கை ஒன்று வெளியிடப்பட்டது.

அதில், அனில் அம்பானியின் வழக்கமான டெல்லி வருகையின் போது, சி.பி.ஐ. அதிகாரிகளை அவர் சந்தித்து ஸ்பெக்ட்ரம் பிரச்சினைகள் குறித்து விளக்கம் அளித்ததாகவும், அவருக்கு இது தொடர்பாக சம்மன் எதுவும் வரவில்லை என்றும், குறிப்பிடப்பட்டு உள்ளது. அந்த அறிக்கையில் மேலும் கூறப்பட்டு இருப்பதாவது-

ஆதாயம் பெறவில்லை

"ரிலையன்ஸ் டெலிகாம், ஆர் காம் அல்லது ரிலையன்ஸ் அடாக் குழுமத்தின் எந்த நிறுவனத்துக்கோ, அல்லது அவற்றின் தனிநபர்களுக்கோ, அல்லது அவற்றுடன் தொடர்புடையவர்களுக்கோ, ஸ்வான் நிறுவனம் ஸ்பெக்ட்ரம் லைசென்சுக்காக விண்ணப்பித்த போது அந்த நிறுவனத்தில் ஒரு பங்கு கூட இல்லை.

அத்துடன் ஸ்வான் நிறுவனத்துக்கு லைசென்சு கிடைத்ததன் மூலம் மேற்கண்ட நிறுவனங்களோ, அவற்றின் தனி நபர்கள் மற்றும் தொடர்புடையவர்களோ, பண ரீதியாகவோ அல்லது வேறு எந்த வடிவத்திலும் ஆதாயம் எதுவும் பெறவில்லை.

மேலும் கடந்த 2008-ம் ஆண்டு வழங்கப்பட்ட 13 ஸ்பெக்ட்ரம் லைசென்சுகளுக்கும் எங்கள் நிறுவனங்களுக்கும் எந்தவித தொடர்பும் இல்லை''.

இவ்வாறு அந்த அறிக்கையில் கூறப்பட்டு உள்ளது.

தினதந்தி

போங்க டா.............