2ஜி உரிமம் வழங்கியதில் எனக்கு எந்த தொடர்பும் இல்லை: பிரதமர் மன்மோகன் சிங்

ஜி அலைக்கற்றை ஒதுக்கீடு வெளிப்படையாகவும், சட்டப் பூர்வமான வழிகளில் ஏலம் விடுவதன் மூலமும் அமைய வேண்டும் என்று வலியுறுத்தி தான் கடிதம் எழுதியதாகவும், அதற்கு தொலைத் தொடர்பு அமைச்சராக இருந்த ஆ.இராசா விரிவான பதில் கடிதத்தை அதே நாளிலேயே தனக்கு எழுதியதாகவும் கூறிய பிரதமர் மன்மோகன் சிங், அதன் பிறகு உரிமம் வழங்கியது உள்ளிட்ட அனைத்தும் தொலைத் தொடர்பு அமைச்சகமே செய்தது என்றும், அதில் தனக்கு எந்தத் தொடர்பும் இல்லை என்றும் கூறினார்.

நாட்டின் முன்னணி தொலைக்காட்சியின் செய்தியாளர்களை இன்று தனது இல்லத்தில் சந்தித்துப் பேசிய பிரதமர் மன்மோகன் சிங்கிடம், ஆஜ்தக் ஆசிரியர் அரூண் பூரி, 2ஜி அலைக்கற்றை ஒதுக்கீட்டில் முறைகேடு செய்த இராசாவை மீண்டும் அதே துறையின் அமைச்சராக நியமிக்க எப்படி ஒப்புக் கொண்டீர்கள் என்று வினா எழுப்பினார். இதற்கு மன்மோகன் சிங் விரிவாக பதிலளித்தார்.

“2ஜி அலைக்கற்றை ஒதுக்கீடு செய்வது தொடர்பாக பல பிரச்சனைகள் உள்ளதையும், அது தொடர்பான எனது கவலைகளையும் தெரிவித்து, இதையெல்லாம் நீங்கள் கவனத்தில் கொள்ள வேண்டும் என்று கூறி 2007ஆம் ஆண்டு நவம்பர் 2ஆம் தேதி தொலைத் தொடர்புத் துறை அமைச்சர் ஆ.இராசாவிற்கு கடிதம் எழுதினேன்.

அலைக்கற்றை ஒதுக்கீடு நியாயமானதாகவும், சம வாய்ப்பு அளிப்பதாகவும், வெளிப்படையானதாகவும் இருக்க வேண்டும். சட்டப் பூர்வமான ஏலத்தின் மூலம் அதனை செய்யலாம் என்று கூறியிருந்தேன். அதே நாளில் இராசா எனக்கு பதில் எழுதினார். அலைக்கற்றை ஒதுக்கீடு வெளிப்படையாக இருக்குமென்றும், அது தொடர்பாக நீங்கள் உறுதியாக இருக்கலாம் என்றும் கூறியிருந்தார். மேலும் ஏலம் விட்டு அதனை ஒதுக்கீடு செய்ய வேண்டும் என்று டிராய் பரிந்துரை செய்யவில்லை என்றும், தொலைத் தொடர்பு ஆணையமும் அப்படி வலியுறுத்தவில்லை என்றும் கூறியிருந்தார். அது மட்டுமின்றி, 2003ஆம் ஆண்டு (பா.ஜ.க. ஆட்சியில்) எடுக்கப்பட்ட அமைச்சரவை முடிவின் படியே இதனைச் செய்யப்போவதாகவும் கூறியிருந்தார்.

அதன் பிறகு உரிமம் வழங்கப்பட்டது, அதற்கான நிறுவனங்கள் தேர்வு செய்யப்பட்டது, முதலில் வருபவருக்கு முதலில் என்ற கொள்கை கடைபிடிக்கப்பட்டது என்கிற அனைத்தும் தொலைத் தொடர்புத் துறையால் செய்யப்பட்டதே தவிர, அதில் எனக்கு எந்தத் தொடர்பும் இல்லை” என்று கூறினார்.

ஆ.இராசாவை மீண்டும் அமைச்சராக்கியது ஏன் என்ற கேள்விக்கு இறுதியில் பதிலளித்த பிரதமர், அது ஐக்கிய முற்போக்கு கூட்டணியில் உள்ள கட்சிகளின் பரிந்துரை என்றும், அதில் தாங்கள் செய்வதற்கு ஏதுமில்லை என்றும் கூறினார்.

2ஜி அலைக்கற்றை ஒதுக்கீட்டில் ஒரு பைசா கூட அரசுக்கு இழப்பில்லை என்று தொலைத் தொடர்பு அமைச்சர் கபில் சிபல் கூறியுள்ளதை ஏற்கிறீர்களா என்று வினவியதற்கு, “அதனை எவ்வாறு மதிப்பீடு செய்வது என்பதை முடிவு செய்த பின்னரே அது பற்றிக் கூற முடியும்” என்று பிரதமர் பதிலளித்தார்.

ஒரு மாணவன் தேர்வறையில் புத்தகத்தை வைத்து பிட் அடித்து எழுதும்போது அந்த வழியாக வந்த உயர் அதிகாரியிடம் மட்டிகொண்டானாம் .... அவரிடம் தேர்வறையில் இருந்த ஆசிரியர் சொன்னாராம் "அய்யா!, நான் அவனிடம் முதலிலேயே இது தவறு என்று சொல்லிவிட்டேன், அதன் பிறகும் தொடர்ந்து அவன்தான் எழுதினான் - அதற்கு நான் பொறுப்பா ??!!! "
---- இப்படி உள்ளது நம் பிரதமரின் விளக்கம்

அரரா அர்ரா அர்ர்ரா

அவருக்கு ஒண்ணும் கிடைக்கலயேன்னு ஆதங்கத்துல சொல்றார்