குற்றம் சாட்டப்பட்ட போலீஸ்காரர்களுக்குத் தனிச் சலுகையா?

ஒரு வியாபாரியான சியா புவாங் ஹிங்கைத் தாக்கியதாகக் குற்றம் சாட்டுள்ள ஐந்து போலீஸ்காரர்களும், பெட்டாலிங் ஜெயா மெஜிஸ்ரேட் நீதிமன்றத்தில் செய்தியாளார்களின் கண்ணில் படாமல் விசாரணைக் கைதிகளுக்கான நுழைவாயில் வழியாக வெளியே அழைத்துச் செல்லப்பட்டனர்.

இன்று இரண்டாம் நாள் விசாரணைக்குப் பின்னர் அவர்கள் ஐவரும் அந்த வழியில் அழைத்துச் செல்லப்படுவதைக் கண்டு வெகுண்ட சியாவின் வழக்குரைஞர் லிம் லிப் எங், “என்ன இது மெஜிஸ்ரேட் அவர்களே! உங்கள் கண் முன்னாலேயே இப்படி நடக்கிறதே”, என்று ஆத்திரத்துடன் கூறினார்.

அதற்கு மெஜிஸ்ரேட் நிக் முகம்மட் பட்லி அஸ்லான், அவ்விசயத்தில் போலீசாருக்கு உத்தரவிடும் அதிகாரம் தமக்கில்லை என்றார்.

இதற்கு முன்னர்கூட அந்த ஐவரும் புகைப்படக்காரர்களைத் தவிர்ப்பதற்காக நீதிமன்றத்துக்கு உள்ளே வரும் வழியாக வெளியில் அழைத்துச் செல்லப்பட்டது பற்றி லிம் புகார் செய்திருக்கிறார்.

“சட்டத்துக்குமுன் அனைவரும் சமம். (முன்னாள் போக்குவரத்து அமைச்சர்) லிங் லியோங் சிக், (முன்னாள் சிலாங்கூர் மந்திரி புசார்) டாக்டர் முகம்மட் கீர் தோயோ போன்றோர் எல்லாம் பிரதான வாயில் வழியாகத்தான் வெளியில் சென்றார்கள். இந்த ஐவருக்கு மட்டும் ஏன் இந்தத் தனிச் சலுகை?”, என்று லிம் வினவினார்.

அது விசாரணைக் கைதிகளை உள்ளே கொண்டு வருவதற்கான வழி என்றவர் கூறினார்.

பின்னர் செய்தியாளர்களிடம் பேசிய லிம், பெட்டாலிங் ஜெயா நீதிமன்ற பதிவாளரிடம் விரைவில் புகார் செய்யப்போவதாகக் கூறினார்.

“மெஜிஸ்ரேட் நீதிமன்றத்தை அவமதித்திருக்கிறார். நீதிமன்ற நடைமுறைப்படி அந்த வழியாக குற்றம்ச்சாட்டப்பவர்களை அழைத்துச் செல்லக்கூடாது. அது விசாரணைக் கைதிகள் நிறுத்தி வைக்கப்படும் இடம்.

“ஆனால், மெஜிஸ்ரேட் கண்முன்னால் நான் மறுப்புச் சொல்லியும்கூட அது நடந்தது. ஒன்று மெஜிஸ்ரேட்டுக்குச் சட்டம் தெரியவில்லை அல்லது அவர் குற்றம் சாட்டப்பட்ட அந்த ஐவருக்கும் சார்பாக இருக்கிறார்.

“நீதிமன்றத்தில் மெஜிஸ்ரேட்தான் உச்ச அதிகாரம் படைத்தவர். நீதிமன்றத்தில் யாராவது பிரச்னை செய்கிறார்கள் என்று நினைத்தால் அவர்களைக் கைது செய்யும்படி போலீசுக்கு உத்தரவிடும் அதிகாரம் அவருக்கு உண்டு. தொலைபேசியைப் பயன்படுத்தினால் அதைப் பறிமுதல் செய்யும் அதிகாரம் உண்டு”, என்றாரவர்.

கடந்த ஆண்டு டிசம்பர் 19-இல்,சியாவைத் தாக்கிக் காயம் உண்டுபண்ணியதாக நான்கு போலீஸ் கான்ஸ்டபில்கள்- முகம்மட் அஸ்வான் ஹசன், நோர்சாலி ரோஸ்லே, அஹ்மட் சைபுல்லா ஒஸ்மான், அலிசுல்ஹபிஸ் அப்துல் கப்பார்-மீது குற்றம் சுமத்தப்பட்டுள்ளது.

ஐந்தாவது நபரான லான்ஸ் கார்ப்பரல் மகாதி ஆடம்மீது இதே சம்பவம் தொடர்பில் உத்தரவுக்குக் கீழ்ப்படிய மறுத்தார் என்று 1967 போலீஸ் சட்டம் பகுதி 20 (3)-இன்கீழ் குற்றம் சாட்டப்பட்டுள்ளது.

இக்குற்றச்சாட்டுகள் மீது ஏப்ரல் 11-13 வரையிலும் மே 9-11 வரையிலும் விசாரணை நடைபெறும் என மெஜிஸ்ரேட் நிக் முகமட் பட்லி அறிவித்திருந்தார்.

டிசம்பர் 19-இல், ஒரு சாலைத் தடுப்பில் தம்மைத் தடுத்து நிறுத்திய போலீசார் தம்மைத் தாக்கியதுடன் தம்மிடமிருந்து 13,000 ரிங்கிட்டைத் திருடிக்கொண்டதாகவும் சியா கூறுகிறார்.

டிசம்பர் 19இலிருந்து டிசம்பர் 22 வரை போலீஸ் காவலில் வைக்கப்பட்டு தொடர்ந்து அடிஉதைக்கு ஆளானதாகவும் அவர் கூறியுள்ளார்.

மலேசியாஇன்று

சட்டத்துக்குமுன் அனைவரும் சமம்.