தி.மு.க.-காங்கிரஸ் கூட்டணியை ஆதரித்து கருணாநிதியுடன் பிரசாரம் செய்வேன்; இளங்கோவன் பேட்டி!!!

திருப்பத்தூரில் இளங்கோவன் நிருபர்களிடம் கூறியதாவது:-

வேலூர் மேற்கு மற்றும் திருவாரூர் மாவட்டங்களுக்கு தலைவர்கள் மற்றும் பொறுப்பாளராக சிலரை மாநில காங்கிரஸ் தலைவர் தங்கபாலு அறிவித்துள்ளார். இது காங்கிரஸ் விதிமுறைகளுக்கு எதிரானது. குலாம் நபி ஆசாத்திடம் பேசி விட்டேன்.

வேலூர் மேற்கு மாவட்ட தலைவராக பாலூர் சம்பத், திருவாரூர் மாவட்ட தலைவராக துரை வேலு மற்றும் இப்போதைய நிர்வாகிகள் தொடர்ந்து நீடிப்பார்கள். கட்சி விரோத நடவடிக்கையில் ஈடுபடும் தங்கபாலு மீது மேலிடம் விரைவில் நடவடிக்கை எடுக்கும்.

கேள்வி:- காங்கிரஸ் தொகுதி உடன்பாடு குழுவில் உங்களை சேர்க்காதற்கு தி.மு.க. நிர்பந்தம் காரணமா?

பதில்:- அது குறித்து மேலும் பேச விரும்பவில்லை.

கே:- தி.மு.க. அரசை கடுமையாக விமர்ச்சித்த நீங்கள் இப்போது மீண்டும் அந்த கட்சிக்கு எப்படி ஓட்டு கேட்பீர்கள்?

ப:- ஆட்சியின் தவறுகளை சுட்டிக்காட்டி வந்தேன். அவ்வளவுதான்.

கே:- இப்போது தவறுகள் சரி செய்யப்பட்டு விட்டது என்றா பிரசாரம் செய்வீர்கள்?

ப:- ஆட்சியில் நடந்த நல்ல திட்டங்கள் குறித்து பேசுவேன்.

கே:- தி.மு.க., அரசின் நல்ல திட்டங்கள் என்னென்ன?

ப:- இலவச டி.வி. ஒரு ரூபாய்க்கு ஒரு கிலோ அரிசி, மருத்துவ காப்பீடு, மத்திய அரசின் முழு நிதியுதவியுடன் கூடிய 108 ஆம்புலன்ஸ் திட்டம், மத்திய அரசு குழு நிதியுடன் கான்கிரீட்ட வீடு திட்டம், மருத்துவ காப்பீடு திட்டம் உட்பட்ட திட்டங்களை பிரசாரம் செய்வேன்.

கே:- கருணாநிதியுடன் ஒரே மேடையில் பிரசாரம் செய்வீர்களா?

ப:- அழைப்பு அமைந்து மேலிடம் கூறினால் கலந்து கொள்வேன்.

கே:- தி.மு.க. கூட்டணியில் பா.ம.க. இணையுமா?

ப:- எனக்கு தெரியாது.

கே:- தி.மு.க. பொதுக்குழுவில் கருணாநிதி பேசும் போது பா.ம.க.வை நம்பிக்கைத்துரோகி என்றும் கூட்டணியில் சேர்க்க வேண்டாம் என்றும் சோனியா சொன்னதாக கூறிள்ளாரே?

ப:- சோனியா நாகரிகம் தெரிந்தவர். அப்படி பேசி இருக்க வாய்ப்பில்லை. அப்படியே பேசி இருந்தாலும் அதை வெளிப்படையாக கருணாநிதி கூறியது நாகரீக மானது அல்ல.

கே:- தி.மு.க. காங்கிரஸ் கூட்டணி வெற்றி பெறுமா?

ப:- காங்கிரஸ் இருக்கும் கூட்டணி நிச்சயம் வெற்றி பெறும்.

இவ்வாறு அவர் கூறினார்.

மாலை மலர்.